Ma Zin Mar Oo ih Inntek le Agency An Zoihnit Thok

Šianglianuk Ķianghrol 

Singapore ih condo dot 19 ihsin a dawp that mi Myanmar hnen-um Ma Zin Mar Oo ih thihnak san thawn pehpar in Singapore palik in a inntek Indian miphun le a thlahtu Agency an zingzoi thok ih a inntek innsang an zawihnit thok tiah Myanmar rampalai zung ih Ma Sandar Win in a sim.

Ma Zin Mar Oo ih ruak vuinak thuhla ah a innsang pawl Singapore ih hruai ding khal in Myanmar rampalai zung in a tawlrel thu a sim fawn. A innsang hnenah a ruak thiar tlung maw, Singapore ih phum an duh tiih an sut tikah Singapore ih phum an duh thu an sim ruangah Singapore ih hruai an tumnak a si.

Kum 20 mi Ma Zin Mar Oo hi June 12 siimlam nazi 7 hrawng ahkhan Interlace Condo ih dot 19 ihsin a dawp that mi a si. A dawp hlan ah runsuak tumtu pawl thawn nazi pakhat le hrek sung an be aw. Singapore ih hna a ttuannak hi thla riat luan fang a si lai. Thawhhlam hi zinglam nazi 9:30, a cancan ah 10 lole 11 hrawng ah a ei thu, suncaw hi siimlam nazi 2, 3, a cancan ah 5 ah a ei ih, zanriah cu nazi 9:30 hrawng lawng ah a ei thu, a rualnu Indonesian nunau hnenih bomnak a dil mi ca ihsin theih a si. A agent phone number cu 95051149 a si thu khal a tarlang.

Ma Zin Mar Oo hi Rakhine ramkulh, Mrauk-u peng, Kutalungkya khaw mi a si ih, Mro miphun a si. A nu in a thihsannak a rei zo ih, a pa in nupi dang a neih ruangah a pi le pu hnenah a um. Innsang rethei zet an si ih, ca a ngan ta mi khal ah pi le pu zoh theitu si leh a tum thu a ngan.

An venghnen mi pakhat in Singapore ah hnattuan ding a um a ti ruangah, Yangon ah feh in, Yangon ihsin Singapore ah a thleng. A fehsuah hnu kum khat sungah vei khat lawng inn lam thawn an pehtlaih aw ngah. Inn lam ah paisa vei khat hman a kuat ngah hrih lo. A thih thu an theih ihsin kum 85 mi a pu cu a harhdamnak a hnget nawn lo tiah kum 75 mi a pi in a sim.

Singapore ahhin hnen-um hmuhsuamnak hi a um phahphah ih, 2016 October thla khal ah inntek ih zahmawhlam hmuhsuamnak le hremnak tuartu hnen-um 30 cu bawmtu pawlkom HOME ah an rak tlan dah.

Tui’ dinhmun ahhin Singapore ah hnen-um 200,000 lenglo an um ih, Indonesia rammi 100,000 lenglo, Philippine rammi 70,000 lenglo le Myanmar rammi 40,000 lenglo an um. Hnen-um kuat thu ih soiselnak a um ruangah 2014 ihsin Myanmar Hnattuanlam Tlangbawizung cun hnen-um kuat hi tlaitluan ih a bansan thu a phuang.

Asinan tui’ thla (June) tiang ah ni khat ah hnen-um 40-60 hrawng an lut ringring lai tiah hmun-tthawn hnattuantu pawl bawmtu HOME pawlkom ih Ma Khin Lay in a sim. Singapore ram dan ah kum 23 kim zo pawl lawng hnattuantu ih lak theih asinan hnen-um tampi cu kum kim lo an si thu khal a sim.

Kan dung zarh khal ah kum 15 mi Myanmar hnen-um pakhat cu Singapore ih inn dot kua ihsin a tla. Asinan dot 7-nak ih tukvirh ah a tang ih, a khel ruh lawng kuai in, a nun cu a him. Cumi nu khal a passport ahcun kum 25 ti’n an tuah ih, a hmin, miphun le umnak hmun pawl khal a taktak thawn tampi an dang aw tiah Ma Khin Lay cun a sim bet. Himi nu kuattu Agency hi minung zuar-leinak dan thawn thubuai tuah in an hawl rero lai thu Ramdingkhawm Tlangbawi U Thein Shwe in June 9 ah a sim.#

Source: 7Day Daily, Myanmar Times, စလုံး facebook page.

Comments

comments

Comments

%d bloggers like this: