Lungput Khawthim Neitu

Ni khat ah ramtawipa pakhat in a uico cu, danglam zet in, tidai parah a tlan turto thei ti a hmu. Cumi thil danglam cu a rualpi hmuhter a duh ruangah vate a pel ni ah amah thlun ding in a sawm.

An rualvah in tiva pakhat kiangih hramlak thingkung ah a um mi vate pawl cu meithal thawn an kap vivo. An kap ngah mi vate pawl cu tivate sungah an rung tla ttheu. Vate an rung tlak tinte’n ramtawipai’ uico cu tidai parah a va tlan ih vate cu a va sar ttheu. Sunvu in vate an pel ih, tam zet an ngah hnu, siimlam ah an tlung.

Ramtawipa cun tidai parih a uico a tlan turto lai zoh in a rualpa cu a mang a bang zet ding ih, a fak ding tiah sunvute’n a rak hngak. Asinan a rualpa cun an tlun tiang ah uico thu zianghman a rel lo.

A netnak ah ramtawipa cu a sup aw thei nawn lo ih tlun zin ah, “Tuini ah ka uico thawn pehpar in thil danglam na hmu lo maw?” tiah a sut.

Cutikah a rualpa cun, “Na uico hin danglamnak a nei. Ziangahtile tidai leuh a thiam lo,” tiah a sawn.

Himi thuanthu hi hnihsuak vek asinan minung tthenkhat ih lungput a tarlang. Mi tthenkhat cun ziangtik hman ah a tthalam ih thlir lo in, tlaksamnak lawng an hmu thiam ttheu. Khua a thim mi lungput kan ti pei.

Na zuamnak ruangih hlawhtlinnak na ngah can ah a lo lungawipi ding ih na beisei zet mi lak ihsin a lo lungawipi theilotu, lo lungawipinak cang thiamlotu tivek na ton tikah ramtawipai’ rualpa vek a si ti kha va mangsuak ttheu aw.

Credit: Bama Thein Pe ih “Yay Paw Pay Tae Khwe.”

-Sianglianuk Kianghrol

Comments

comments

Comments

%d bloggers like this: