Lungmuril ih Pekhlannak

Šianglianuk Ķianghrol

Ka tleirawl lai, kum 13 hrawng ka si, ah ka nu in ka hngilh thei nawn lo ding mi thil mankhung zet pakhat i rak zirh. Ni khat cu innsang thilri zuarnak dawr te pakhat ih kan dawrawk lai ah, dawr sungah sungkua pakhat an rung lut ti ka hmu ngah. Nu, a fanu le a tunu an si a bang. An thiangfai ko nan an hnipuan a ttet ih, an neinung lo ti a fiang zet. Dawr sungah norleng an nor vivo ih, khimkhuahte’n thilri an hril. An hril mi cu innsang thilri zaran le a ttul mi ei-in pawl hlir an si.

Ka nu thawn thilri hril kan ttheh tikah dawr cazi hnenah paisa pe ding in kan feh. Cutawk kan thlen tikah ka rak hmuh mi sungkua cu kan hmailam ah an rak um. Kan karlak ah mi pakhat lawng a um. Cumi sungkua in thilri norsuahnak kuang ih thilri an ret lai cu ka zoh rero. Innsangnu cun dawr cazi hnenah thilri man kom ziangzat a si timi a sut leuhleuh. Ziangahtile paisa tampi a nei lo. Cuti’n tawkfang sung an um tikah kan hmai ih umtu cu a thin a tawi ih, a phunciar. A phunciar awn cu ka theih tum mi a si hran lo nan ka rak thei ngah men. Dawr cazi in thilri man zate kom a tuah ngah tikah, innsangnu cun paisa a nei daih lo.

Curuangah ret sal ding mi ei-in dangdang a hril sal. Culai ah ka nu cun a paisabawm a pur ih dollar 20 ca a phorh hnu ah cumi innsangnu cu a pe. Cumi innsangnu cu a mang a bang zet ih, “Ka la thei lo!” a ti. Cutikah ka nu in cui’ innsangnu cu hmaton ih zoh in dimte’n, “Na la thei tuk lam. Laksawng ah ruat aw. Khimi norleng ahkhin nan ttul taktak lo mi zianghman a um lo. Curuangah zangfahte’n cohlang aw,” tiah a sim. Cu thluh cun innsangnu cun paisa cu a la ih, malte sung ka nui’ kut a hum hnu ah, a biang ih mitthli rung luang phah in, “Ka lung a awi tuk. Hivek ih i tuahsaktu zohman an rak um dah lo,” a ti.

Dawr ihsi kan suah lai ah ka mitthli a tla ti ka thei. Cumi cu kumkhua ih ka lunghmuitertu ding a si ti khal ka thei. Zoh hman awla, ka nu le pa hin fa paruk in cawm pitling ih, paisa tampi an kut ah a um dah lo nan, ka tlaksam lai ka thei dah lo. Ka nui’ lainatnak thinlung ih ro ka run co ti ka rel thei mi hi ka lung a awi. Ngah sal duhnak um riai lo in pekhlannak ka rak tuah ttheu. Leitlun ah cumi tluk ih thin nuamtertu an um lo.

Hram: Dee M. Taylor ih “Giving from the Heart” – A Cup of Chicken Soup for the Soul by Jack Canfield, Mark Victor Hansen, Barry Spilchuk.

Comments

comments

Comments

%d bloggers like this: