Lungawiza Pai' Ni

Lungawiza Pai’ Ni

– By Rev Run Cung Mang

Mi zo khal Pa (Father) pakhat an si thei.

Asinan PaPa (Dad) ti ih kawh co ding cun

Cehleinak neih a ttul.

Fahniang pawl in hringtu an Pa le pawl upat sunlawihnak an pek ding Ni cang suak dingin ruahnak pakhat sersuahnak cu Spokane, Washington, USA ihsin hram a rak thok. Sonora Smart Dodd an timi nunau nu in “Pai’ Ni (Father’s Day)” cangsuak dingin a thuruahnak cu 1909 kum ih “Nui’ Ni (Mother’s Day)” ah Pastor pa ih thuthangttha simmi a ngai rerolai ah a rak neihmi khuaruahnak a si.

A pa William Jackson Smart in a nu ih a thihsan hnu ah an unau ruk in tthanglian pitling le milai ngai cang thluh ko ih a rak cawmzohmi an si ih, Sonora cun ah a Pa cu a parah a nasazet mi le a tthatuk mi Pa a sizia a vun thei suak. A Pa hi an unauza parah nucan (motherhood) pacan (fatherhood) ah dingin nu le pa in fanau pawl parih an tuah ttulmi ziangkim kha thinsau lungfual le duhdawtnak taktak thawn a rak tuamhlawm hngai zia a theifiang. A fanu ih thinlung sungah le mitthlam ahcun a Pa cu pumpektu, mi raalttha le mai’ zawn lawng ruat loin duhdawtnak thawn a khat mi upat sunlawih tlak Pa a si zia a theifiang. Sonora pa William Jackson Smart hi June thla sung ih suak mi a si ruangah Sonora Smart Dodd in hringtu pa sunlawihnak pei ni: “Pai’ Ni (Father’s Day)” hi June thla sungah siseh ti’n a hril ih, a hmaisabik Pai’ Ni cu Spokane, Washington, USA ah June 19, 1910 Nipi Ni ah hram rak thok a si.

1926 kum ah Rampi huap Pai’ Ni (National Father’s Day) cang suak ko tawlreltu ding Committee cu America ram New York khua ah dinsuah a rak si. Cuticun Pai’ Ni cu Joint Revolution of Congress in 1956 kum ah a theihpi.  Cule 1972 kum ah, American President Richard Nixon in rampi huap in Pai’ Ni cu kumtin June thla a zarh thumnak Nipi Ni ah tuah ringring siseh ti’n thu a rak suah.  Cuih ni ihsin thokin tuni tiang kumtin sunglawizet ih run tuah ringringnak a si.

Curuangah Pai’ Ni cu fanu fim pakhat ih khuaruah thiamnak le hringtu a Pa ih tthatnak le duhdawtnak parih lungawi thusim thiamnak ihsin a keuhmi Ni sunglawi pakhat a si. Sonora Smart Dodd in amah hringtu a Pa le leitlun hmuntin ih Pa ttha tampi pawl upat sunlawihnak pek dingah ni hleice (special day) ni khat cu Nui’ Ni ih hringtu Nu pawl upat sunlawih an si vekin Pa pawl tla upat le sunlawih si ve hngai seh timi a saangzetmi thuruah thiamnak ihsin ra cang suakmi a si.

reference: internet web site

(Visited 37 times, 1 visits today)

Comments

comments

Comments

%d bloggers like this: