Lungawinak Thuthup (The secret of happiness)

speaking_of_joyHi leitlunah milai sinak keng in kan rak suak ih, hi leitlunah tthanglian in kan nung taktak duh a si ahcun lungawinak hi kan ttul cio a si. Minung tampi cu kan nung naan, kan nung taktak lo. Nung cingih thi vek kan si ttheu. A ruangcu milai in a suahkeh ihsin a haal mi lungawinak thawn an hlat-awk ruangah a si.  Lungawinak timi ttongfang nih cun  hnangamnak, luatnak, deihnak leh thinnaumnak pawl tla hi a huap telcih. Taktak cun; lainnak, hlawhtlinnak leh dinhmunsaang co duhnak pawl kan hawl ciamco-nak  ih  a san khal cu lungawi diriamnak kan hmu duh ruangah a si. Ziangtluk in va hlawhtling khal awla lungawinak na nei lo ahcun, na nunnak hi manhla leh surlam nei tuk in na ngai cuanglo ding. Minung in a suah ihsin a hawl taktak mi hi ziang a si?. Hi thusutnak cu awlsam te’n let a theih ko. Mitampi cu tufang ah camibuai awngnak tla hi kan saduh-thah-bik mi a si men thei. Hmanseh, kha mi cu tlawng na kai ruangah a si. Cui tlawng na kai hlan ihsin na hawl mi taktak cu lungawinak a si lo ding maw si. Tuisun ih naute suak pek khi vun zoh awla, leitlun cu a hrangah a fiak zet lai. Peisa ih surlam hman a thei hrihlo. Hmanseh, cui naute cun lungawinak hi si a hawl ve thotho. Cui lungawi hnagamnak nih a tlansan caan ahkhin thup men loin a ttap ih cutin hringtu a nu in a ttang sungah a cawi hnuah, hnangam in lungawinak a hmusal hnu ah a ngam sal ttheu a si. Cui milai ih hawl mi nunnak sungih nungnak vitamin a si mi lungawinak cu ziangtin ka hawl pei? Ka rual a tanglam ah I run thlun hrih awla cui lungawinak ih thuthup pawl hawl tlangin ka titi ding aw.

Lungawinak thuthup pakhat a si mi cu peknak hi a si. Ih, peknak hi cu ngahsalnak ih hrampi a si. Peknak kan ti tik ahhin na thinlung ah ra suak dukdi mi cu peisa a si men thei. Hmanseh hi lungawinak ahcun peisa cu kan ttul bik lo. Cui pawl hnak in duhdawtnak, bawmsannak, velngaihnak, zawnruahnak, ngaihsaknak leh zaangfahnak pawl hi an si. Mitamzet cu ziangruangah lungawinak kan hmu theilo kan ti a si ahcun, a ngah lam leh a co-lam sinak in lungawinak kan rak hawl ruangah a si. Zonih si; I bawm ding, I zoh ttha ding, ziang tluk in si in duhdawt, ziang ruangah a mah nih I biak lo tiah midang hnenin ngah ding mi lawnglawng hngak in sunni kan tlak. Hmanseh, lungawinak taktak na hmu duh a si ahcun ka rual pektu sinak rak hril thlang aw. Khatlam in kan sim a silen midang nih anlo biak hmai kha hngak loin nangmah nih biak hmai aw. Psychology pawlin minung ziaza an zirnak ah an hmuhsuak mi cu, nauhaak khal ah a rualpi pawl a teertu pawl khi cui teer a co-tu nauhaak pawl hnak in lungawinak an hmu in an co tam deuh ti a si.

Peknak hi cu Christan mi kan bible hmun tampi ah inzrih in insimfiang ih, thutharpi leh thudanglam pi a si tuk lo men ding. Sikhal-sehla, hi hngasalnak ih hram, peknak hi cu a nungmi milai hnenlawngih a um mi daan a siloih hi daan hi cu leitlung tel ni leh thlapi arsi zate’n ih hlawmawk mi daan (universal law) a si. Newton physicist, scientist hminthang ih a hmuhsuak mi daan ahcun “ziang hmauhhmauh ih neih mi caangveihnak nihcun a bangrep mi cangveihnak cu a hngahkir sal” ti a si. TTN, lungto cu leitang ah phom awla na phom ngahmi leitang ih a tuar mi hmual cekci cu cui na phomnak lungto cun a tuar kir ve thotho. Hi daan cu khi thlapa kainak ih an hmanmi rocket ih cet tuahnak hrangih an hman mi ruahnak thlaici ah a run cang. Cui rocket in a tanglam ihsin a suahmi hmaul a na deuhdeuh a silen cui a hmaul ihsin a ra kir sal mi hmaul khal cun na deuhdeuh in van ah a tuul sal a si. Cu vek in ka rual na pek vek cekci in na ngah ding a si.

Tuisun ah na co mi na duh zawng a silo ahcun na pek mi kha rak cek aw. Na pek mi a ttha ko ahcun na ngahsal mi cu a sia lo hrimhrim. Caan tampi ahcun mahlam lawng thlir in duh ham a awl zet. Hmanseh, lungawinak taktak hmuah kan duh a si ahcun a co-tu sinak cu hnongin pektu sinak hi kan hril miangmo a ttul thlang a si. Mi pakhat kan va bawmnak nih cu kan nunnak ih surlam leh a man pawl tla cu in theifiang ter ih nunman a nei mi ah in tuah lawng si loin lungawinak hi in co ter bet a si. Mipakhat nih ” dam ee, nangmah sawn?”  a lo ti ahcun nangmah nih ” na dam maw?” tiah na biak hmai ruangah a si. Na pek mi cu na ngahkir sal tengteng ding ka rual. Cu ruangah mi pakhat hrangah lungawinak a tlung dingmi thil kha rak thauh thok aw. Ni khat ah veikhat, veihnih cutin tam sinsin in zuam aw. Cui na thuhmi thlaici cu so khaw pathain nih na ttho dingmi lungawinak a phurtu thlairah a cangter ve ding. Hi peknak hi na caan pek in rak ruat awla na rualpi leh na innsaang hnenih na pek mi awkam leh ziaza sungah thleng a ttul kha rak thlengin, a thar in thilttha na pek hai a si ahcun an nunnak cu manhla leh surlam a nei sinsin ding ih cuticun a netnak lamzin na thlen zik ahkhal sir awk loin kan nunnak cu lungawinak in kan hmang a si tiah lungawi leh diriam zet in na um thei ding a si.

 

(Visited 234 times, 1 visits today)

Comments

comments

Comments

%d bloggers like this: