Lungawi Uh

Lungawi
By/ Thian Awi Sang
*Lungawithu simnak malte sawn hin thil ttha tampi a hring suak.(Hansa Proverb)

*”Ka Lungawi” timi ttawngkam cu a mal zet nan, thinmuril thuk bikah mangbangza in a pil theu a si.(Felix Frankfurter)

Lungawithu simnak ttawngkam kan dawng cun tuahsak bet a phur um zet theu si si. Tuahsak theimi malte hmanah. Asinain, duhsaknak thawn tuahsak rero hmanah lungawithu sim lo, relsiar rero bettu cu ziangtin a si thei ding? Cuvek in kan ttul mi zate in pe ringringtu PATHIAN hnen ih lungawithu kan sim lo hlei ah kan aihram rero theu cu kan mawh lawlaw ko lo maw?

Khrih zumtu pawl tlacun ziang vek can khalah Pathian hnenah lungawi thusim ringring ding kan si. Thil man awl deuh in kan leitheinak dingah nep thei pitawp thil man kan nep vek khan lungawinak ding khal kan nep thiam a ttul. A um khal a um ringring fawn.

Ziangvek harsatnak kan tawn can khalah Pathian hnenah lungawithu sim ding a um thotho. Ziangahtile, siat hloralnak ihsin kumkhaw nunnak vanram cu kan ro ah in pe zo (Johna 3:16). Kan ruahsannak cu vanram a si ruangah Pathian hnenah lungawithu sim ding kan nei ring ring.Curuangah Paul cun leithlun thil cu hnawmhne vekah a ruat thluh ih van malsawmnak si a cuan sawn men.(Filipi 3-)

Habakuk in Bawipa a thei fiang ngah hnu cun ziang vek harsatnak khal thleng seh “Ka lungawi in ka thin a nuam thotho ding; Ziangahtile Bawipa Pathian cu i runtu a si.Cungnungbik Bawipa in thazaang i pek; Zukneng bangin ka ke a fekter,Tlangsang parah himte in i ret.(Habakuk 3:17) a ti daih mai a si kha.

Harsatnak kan tawn can lungawi sawn ding kan si.Kan nun fimkhur thiam ko in zirhtu le mah le mah zoh awknak hlalang, tanlak thiam sinsinnak le thlacam thaw tertu sawn an si.In raltu par khalah lungawithu sim ding kan si. Rom 12:20 “Na ral a riil a rawng a sile rawl pe aw; a ti a haal a sile tidai pe aw; cutiih na tuah a sile a lu-thlungah meiling na ret a si ding.” a ti sawn riangri.

Minung hnenih lungawithu sim thiam cun mit hmai ttha an ngah cingcing. Bawipa hnenih lungawithu sim thiam cun nun ropi luangliam an ngah ve thung.”Lungawi ringring uh.Catbang loin thlacam uh.Ziangkimah LUNGAWITHU SIM UH; ziangahtile, cucu khrih Jesu ah nanmai hrangah Pathian duhzawng a si.”(1Thess 5:16-18)

*”Bawipa ka lungawi” timi na thlacamnak tein na nunnak hmuahhmuah diriam ko a lo tuah ding.(Meister Eckhart)

*Lungawithu simnak hi thil ttha sawn hnak in a ttha deuh.Cumicun thil ttha tampi a suahpi theu. (Alfred Painter)

*Every time we remember to say “thank you”, we experience nothing less than heaven on earth.(Sarah Ban Breathnach)

(Visited 320 times, 1 visits today)

Comments

comments

Comments

%d bloggers like this: