Lungawi tein

SiarSaam 100

Maw leilungtlun minung  pawl, Bawipa thangtthatnak hla lungawi in sak uh.

– Saam 100:1 
 

Kumkhat Sung Baibal:

–       Hosea 10-12

–       Thufim 21:1-10 

Saam number 100 nak hi kan Baibal sungih Pathian hnenah lungawi thangtthat hla maksak pakhat a si ve. Hih hla hin kannih cu Pathian ih sersiammi, A taa kan si (c. 3-4), timi le Amah ih tthatnak, zaangfahnak le rintlak a sinak thangtthat ding in fial.

      Hih hla ka siar tikah ka thinlung i khoihzettu ttongfang cu, “Aipuang in Bawipa cu biak uh” (c. 2) timi hi a si. Hih ttongfang hin thathozet le lungawizet ih Pathian thangtthat ding in zirh. Caan tampi cu Pathian kan biak tikah lungawi aipuangzet ih biak hnakin lungawi lemlo, paih cuca lo vekin kan biak ttheu. Keimah khal Pathian parih ka ttuanvo cu ka tuah ko nain cuih ka tuahmi parah ka lung a awi thei lo.

      “Harsatnak, thinbangnak hi Pathian ih duhnak a si” ti am zawng hlir ih ruat ding kan si lo. Ziangahtile thinlung takih lungawinak sawn hi Pathian ih in siter duhmi a si” tiah Oswald Chambers ih thusimmi in ka nun i sawh ngahzet. Kan parah vansiatnak thil pawl a thlen tikah thinbaang le riahsiazet in ”Hih tuarnak cu Pathian ih duhnak, remruatnak a si” kan ti ringring ahcun Pathian ih huham cahnak kan nunnak ah ziangti’n a lang thei ding.

      Lungawinak taktak cu kan ngahmi parah si loin Bawipa thawn kan pawlkom awknak ah a si sawn. Culawng ah lungawi, aipuang te’n Amah kan rian thei ding.

                                                                               Leimi le vanmi hmuah in,

Sunlawinak, huham le fimnak thawn;

Biak tlak a simi Pathian cu biak in,

A hmun i A duhdawtnak parah lungawi uh. 

Khristian hrang ahcun, Lungawithu sim cu nikhat hrang lawng si loin kan nun lamtluan hrangah a si.

(Visited 35 times, 1 visits today)

Comments

comments

Comments

%d bloggers like this: