Lungawi Suahcam ‪#‎Eiffel‬ Dawlsang

eiffel
Šianglianuk Ķianghrol
Eiffel Tower hi Paris khawlipi ih hmuihmel a si lawng si lo in, ningthiamphunglam kutsuak ropi (technological masterpiece) khal a si fawn. French cozah in 1889 kum ah French Dothlengnak (French Revolution) kum za kimcam sunlawihnak hrangih Ramtamhuap Thilri Phosuah Puaipi a tuah tum tikah, hngilhlonak dawlsang hrangih design suai zuamawknak a tuah cih. Ruahmannak 100 lenglo thehluh an si. Cumi lakah Kum Za Kimcam Committee (Centennial Committee) in lilawn engineer Gustave Eiffel ih thehluh mi design a hril. Eiffel Dawlsang hi pii 984 (metre 300) ih sang a si ih a zate deuhthaw in thir hraw hmangih dinsuah mi a si. Himi design hi mak ti zet tu siseh, a selam ih thlirtu siseh, thlimthluainaklam thlirnak (aesthetic grounds) ihsi dotu siseh, tam zet a nei hai. An saksuah ttheh tikah Dawlsang cu thilri phosuah puai luhnak kotka ah an hmang.

Amah lawng in a pak ih a ding mi dawlsang lakah Eiffel Dawlsang vek hi an um lo. Rome khawlipi ih St. Peter Biakinn asilole Giza mualpawng ih Pyramid Ropi hnak in a let hnih in a sang sawn. Cuihleiah St. Peter Biakinn le Pyramid Ropi tivek cu a saksuahnak ah caan reipi an rak hmang. Eiffel Dawlsang cu kum hnih hrawng (1887-89) ah saksuah a si ih, hnattuantu khal an tam lo, cemliam a tam fawn lo. Eiffel hin thir hraw ih umtudan a rak theih fiang ruangah a san lai ih thil um dah lo a rak ruahman thiam. 1889 March 31 ih onnak puai an tuah tikah Eiffel Dawlsang cu mi hip thei zet a sizia amahte’n a pholang aw a si bik.

Eiffel Dawlsang hi amah lawng ah pii 984 a sang cia ih, a dinnak hmun hi pii 17 a sang cia fawn. Curuangah a tlun ih um mi TV antenna thawi’ tah cun a zate’n pii 1,063 (metre 324) a sang. 1929 kum ah New York Khawlipi ih Chrysler Building an saksuah hlan sung kha cu milai ih saksuah mi lakah a sangbik mi dawlsang a rak si.

Sirhsan: “Eiffel Tower.” Encyclopædia Britannica. Encyclopædia Britannica Ultimate Reference Suite. Chicago: Encyclopædia Britannica, 2015.

http://calaideirel.blogspot.com/2015/03/eiffel-dawlsang.html

(Visited 125 times, 1 visits today)

Comments

comments

Comments

%d bloggers like this: