LUNG A LENG E!!! (TRUE STORY)

LUNG A LENG E!!! (TRUE STORY)

By: Hniangsinpa

Duhnak hi ka hrangah a um nawn ding ka zum lo. Duhtu ka tawng dingih, duhmi ka nei ding ti khalin ka ruataw nawn lo. Nunau in ka thinlung ah hmun an co dingih, ka hnatuan leh ihthah tiang an ti thaw nawn lo ding ti khal ka ruat dah nawn lo. Duhnak cu veikhat hrang a siih, kan tawng cingcing lo timi thu in ka hnemaw theu. Zoso maw in dem ngam ding? Nupi neih cu ka duh lo a si lo, tum lo khal ka silo nan, veikhat duhnak in in dung tun zo hnu cun, hnatuan le leitlun nawm cen tilo cu buaipi tlak ah ka neih nawn lo.

Laitlangah ka tlawngih, lamzin cu ka ruahdan hnakin a rak siat sawn lai. Mawtaw to maw kan si ih, ke ih feh sawn ti hman theihthiam a har can a tam. Fur lai a siih, kei Laipa lakih niam tuk ce lo hrang hmanah, ka awm/taang cancan cenbek dai a tul can a um lai. Hmansehla, khua ka cuan ih, ‘Hring dildel kan Lairam’ timi hla thu cu a dik zia ka hmu fawn. Camera siava te ka ken mi cu ka zuk phahphah, mawi ka ti tuk aw… umtu ngai nei lo hmansehla, a mawinak cu a kel thotho.

Thlennak in pakhat ih kan thlen laiah, nupi nu pakhat thawn kan kawmaw ih, an umnak ka sut, anih khal cun in sim ih, “A sile, nan umnak kan thlen dtikah, nan in ah kan thleng ding” tiah ka ti. Anih khal cun, “Kan nufa lawngin in kan hlum ih, nan duh ahcun a ngah tuk ko” tiah in sawn. Ka hna beng a verh vurvo. “Na fanu cu pasal nei lai maw, an pa teh khui lamah so?” tiah beisei nei thup phah thawn ka vun sut. “Pasal nei lai a si lo” tiih in vun sawn hnu ah, a fanu hmin a vun sal, cucun ka hna i fah sinsin ih, ka thinlung sungah a fanu hmuh duhnak in ka khat cih.

Cumi hnu ah zarh tam zet cu Laitlangah ka um laiih, kan nauhak lai ihsin a thuanthu kan rak theih mi, kan rak tih thup phah mi le, thuanthu nei tam zet, Rih lam khal ah cun ka feh vivo. Hmansehla, Pu Tuan ih hla, “A neih hman neih hlan ih” a ti vek deuh in, “A hmuh hman hmuh hlan ih” ti dingin, ka thinlung sungah, nu pakhat ih fanu hmuh duhnak cun in luah khat deuhdeuh.

Ukathah (Khaw hotu) pakhat cun rawlei mi a sawm ih, cumi thawn thunuam kan rellaiah, an makpa a ra lut ih, Laimi a si lo nan, a lung a tluang zet ti thu ih in tekpa in a rak thup mawi hnu ah, “Anih khal hi ralkap a siih, a nupi (Ka fanu) a ngai a si ding, a tlan. Hmansehla, kan ram hrilawknak in uknak a thleng beisei in, kei khalin inn ah ka um ter” tiah, kan ram uknak thlengawk a hiar thu thawn i ruah.

Ka khualtlawn tikcu a cem ih, cui ka hmuh duhmi tei umnak lam pan in kan suak. Hmuh ka duh nan, ziang tin in rak ruat ding ti ka thei fawn lo. Ka lungsung cu a sualaw butbo. An in kan thleng nan, kei cu ka hmu ngam ciah hrih lo. An in tlun ah ka thleng ih, hmansehla, a zan kha khawm can a siih, khawmnak ahcun hmuh beisei in ka um nan, zo a si ti ka thei hrih fawn lo.

A thaizing khua a hung vangih, ka ningzahnak hmuahhmuah tan in, an inn ahcun ka vung, ka hmu ih, hmu lo bangin ka um nan… ka hmu fiang zet. A thaisun khawmnak ahcun amah hmuh theinak ding ah ka to ih, Camera siava te cun amah lang ding in ka hei zuk thup ih, cu mi hnu ah, ngam le ngam lawn amah cu ka hei zoh… kan mit a tawngaw cu… ka hmul thi hmuahhmuah khi thingkung vek in an ding sualso khin ka thei.

Cui a mit mawi zia cu, van arsi tleu sersi vek khi siin ka thei, a hmur vam hemhi le a hnih zawngih biang sum vek rung lang cu… ka sim fiang thei lo. Kai Solomon ih hla in rak phuahsak mi ka ti ding, “Ka dum nan, iang ka nei” timi hrang ahcun, a ni cu van cung thaihliak a si bik ko…

Can a hung rei deuh ih, ka biak phahphah, ka suupaw thei nawn lo…ka duhnak ka sim ih, anih khalin in rak co hlan sak… ka khualtlawn tumnak hmuah khal ka hngilh ih, a kiangih um cu ka khawp thei lo. Amah hmu lo in, zing ni veihnih a suak pang ding ti ka phang bik. Anih khalin, ka kiangih um nuam a ti thu le thenawk a duhlo thu in sim ko nan, ka zum ciah silo, ka zumlo siang fawn lo. Ka duhtuk, kan pahnih ih kan um can ah a mit ka zoh khawp thei lo, a hnar ngul mawi zet le a hmai ka duh zawng a si fawn.

Kutsihaw dingin ka sawm nan, tuah ding dang a neih lai thu in sim ih, ka el ngam fawn lo. Ka duhnak cun, keimah le keimah ka duhawknak cu in hnuk niam ih, a thu cu ka ret thupi bik thlang.

A tuah ding mi tuah ding cun a liam ih, ka thlah ngam lo. Hngaktu si a harzia ka theih phah rori. A liam hnu cun, zan ka ih zawngah amah ruatlo in ka um thei lo. Ka zing thawh zawng khalah amah ruat lo in ka um thei lo. An in ah cun ka man can ah ka feh ih, phar ih an tar mi a zuk zoh cu ka co tawk a si. Ka ngai duahdo. Ka duh duahdo. A can len amah parih zumnak ka ret mi cu ka rinhmai zikzik.

Ka hawl, ka thinlung in, khui tinkim ka hawl, tu khui tawk an thleng ding, khui nah a um ding, ziang tin a um ding. A ra sal ding, kan tawngaw ding… ti thu cu nitin ih ka lungsungih um a si.

Hngak theilo zikzik ih ka um can ka um nan, ka duhnak cun zumnak le ruahsannak thar in pek ih, in thlamuan sal theu. Ka duh, nupi ding khalah ka iai lo men a si lo, neih ka duh, kumkhua ih ka hnen um dingih ka duh zia khal amah cun a thei ko ding. A kumkhaw ruun inn mawi tertu dingih i hril ahcun, kei khal in ka ti hni (Laugh) thei lo hmanah a mitthli tla tertu si ka tum lo.

Ziang a si khallen, himi ka ngan laiah kan tawngaw hrih lo ih, a thinheng nak ka rak ngan pang ding, ka duh tawk hrih ding.

(Visited 73 times, 1 visits today)

Comments

comments

4 Comments

  1. Ram dang um pawl hrang ah cun a man hla tuk, India tlawng ka kai lai kha ka ngai ruangro aw. Photo 1,2,3 nak pawl cu ka experience cung ih um an si ih a tha tuk ngan sinsin aw Hniangsinpa, maw.

  2. sorry, (experience cung) kha experience sung tinak si

  3. Tha tuk aw!! Tawng hrih lo pawl par ah khal siseh… Nu le Pa pawl par le inn sang nei zo pawl par khal ah, ruahnak tha a suahpi zet ding…!!!

  4. Nun thu leng na ngan mi ka rak siar theu ih na thiam nasa. Tu mi lawng te cu ka sel ding. Tui tum ih na ca cun thin lung a la tuk lo. na ca tong kam le ca tlar siar a nuam tuk lo. sammi a nei. A thu cu a tha tuk nan asung ti thlum a pem ngai ngai lo. ka siar nawlh rero nan kei mah ah cun ka lung kim lo riai. Kawl pawl ih (ya tah) timi a pem lo in ka thei. Nun thu leng ngan cu a awl lo tih ka thei nan tu hnak ih tha na ngan vivo ding ruahsan nak thawn,
    Salai Mitthli

Comments

%d bloggers like this: