Luatnak Taktak

July 4

Nipi Ni 

Luatnak Taktak 

Siar:

Galati 4:21-5:1 

Khrih in in luatter zo ih miluat kan si zo. Curuangah fekte in ding uhla sal cang saal nawn hlah uh.    – Galati 5:1 

Kumkhat Sung Baibal:

–   Job 28-29

–   Tirhthlah 13:1-25

 1776 kum ah Saklam America ih British colonies ramtthen 13  pawl in England siangpahrang ih Daan a pekmi pawl an duh lo ruangah an dokalh ih an zuamnak ruangah mahte uk awknak a neimi America ram thar a hung suak. Cuih ram thar in uk awknak daan a suah ih cuih an ca suahmi cu atu ah Zalennak Thuthan (Decalaration of Independence) ti’n hminthang roca ah a rung cang.     

Kan dunglam kum 2000 zikte ah Jesuh in thinglamtah parin, “Ka ttheh zo,” tiah a aunak aw-thawng cu zumtu pawl ih kan “zalennak thuthan” a si. Kan zate in ttihnungza a simi sualnak le thihnak kut hnuai ah kan um. Hmanseh sualnak nei lo Khrih cu Calvary tlang parah kan sualnak ruangah thihnak a tuar. Amah thawngin a zumtu hmuahhmuah Pathian in mi dingfel ah in canter.     

Paul in, “Khrih cu camsiat mi ah a cang ih camsiatnak daan sung ihsin in tlen zo (Galati 3:13). Atu cu Khrih Jesuh thawn a pehzom awmi hrang ahcun sual thutthennak a um nawn lo. Ziangahtile… nunnak in petu Thlarau daan in sualnak le thihnak daan sung ihsin in luatter zo (Rom 8:1-2). Khrih ih luatter mi hmuahhmuah cu fek te’n ding uhla sal ah cang saal nawn hlah uh,” (Galati 5:1) tiin forhnak a nei.

Mahte ram sungah zalenzet ih um theinak a neitu hmuahhmuah cun luatnak in petu Pathian hnenah lungawithu sim ringring ding kan si. Ahleice in, Jesuh Khrih thawngin luatnak kan ngah z0 ti a theitu poh cun khuitawk hmun ih a um khal ah Pathian thangtthat ding a si.    – Richard De Haan 

Atu kan luat zo, hnonnak a um nawn lo,

Jesuh in a famkimmi rundamnak in pek;

“Ka hnenah ra uh,” ti ih A kawhnak aw ngai aw!

Ra aw- Amah in kumkhua hrangah in ruun suak zo. – Bliss 

Zalennak tumbik cu sualnak ihsin luatnak hi a si.

 

 

Comments

comments

Comments

%d bloggers like this: