Lt.Col. Kap Cung Nung suahcam

Lt.Col. Kap Cung Nung Suahcam

Francis Lal Uk
DE, USA
Friday, January 11, 2013

Kap Cung Nung

Lt.Col. Kap Cung Nung

Mual in liamsan zo khal awla, “Happy Birthday Pu Kap Cung Cung”

In dampi lai bang awla tuisun hi na kum 87 kim ni a si ding….

Asi, Pu Kap Cung Nung,

Hih cangantu kei cu i thei lo ding, kei khalin ka lo cing lo. Sinan tuisun cu ka mitthlam ah na lang.
Na thuanthu a nunglai tinak a si cu…

Ka Pu in, “Pu Kap Cung Nung cu, ‘Bawipa’ ti’h kawh ding khal a si lo, amah rori hna a t’uan ciamco” tiah a lo rel ka thei dah.

“Christian biakinn cu innhmun t’habik pek ding” na rak ti, titla ka thei. Curuangah siding tu, Falam Baptist Biakinn le RC biakinn ah na kut thlam a tang lai.

Salai Sun Ceu ih, “Ciarbeek lawng a khat kan lamzin” timi hla ruangah, “Ciarbeek um nawnlo ko kan tuah ding” ti’h rak t’ong dah tule t’uan hram thok taktak tu tla na si ti ka thei.

“Lairam ah Kum 10 tal Pu Kap Cung Nung um hrih sehla cu aww!” ti’h saduhthat tu putar pawl tla ka thei ruri baan.

Ahleice in suul nan rak sah ta mi Surbung Airfield tla kum 40 sikte rei hnu ah lo hma thawh sal a si hokhaw. Hnuzulh tu an um lo ee, tiah na phun na hrang ko ding. Ziangaw tit’ha….
Na caan neta lam tiang, “Surbung ih vaanzam a t’um hmuta lo ih!” tiah na ti t’heu titla mi in an rel…
Na leennak zautlang in run cuan awla kum tam hlanah na run hmu ko ding….

Surbung tlangih vaanzam thawih ka va t’um hmaisabik ni ah, ringtak in na hmin ka au leh ding, in run cuan hrih law….!!!

Comments

comments

Comments

%d bloggers like this: