Love Song Thawi’ Jesuh Hmuaktu Kan Si Pang Maw?

Boney M
By/ Siang Lian Uk Kianghrol
Chinmi khawvel ahcun Christmas le Boney M. timi hi tthen theih lo vek a si. December thla sung a rung thlen cun Boney M. pawl ih hla hi hmun tin ah kan suah cio. Germany ram ih dinsuah mi Boney M. awnmawi band hi an awnmawi fehdan a ttha in, an aw khal a rak ttha ih mawi ding ih hlasak dan khal an thiam. 1970 kum nelam pawl ihsin tuini tiang in, leitlun disco awnmawi khawvel ah an cuai thei lo. Chinmi khawvel khal ahhin kan hngilh can um hman sehla Christmas a rung thlen cun an ra suak thar sal ringring.

Asinan Mirang ttong kan thiam lo ruangah simaw, a hla sullam hnakin a awnmawi kan ngai thupit sawn ruangah simaw, Boney M. pawl ih love song (fala tlangval ngaiawknak hla) le Christmas thawi’ pehpar aw lo mi sullam nei hla tam zet cu Christmas hla ah ruat in kan suah cih ttheu. Carol vahnak ah, biakinn hauhruang sungah, le hmun dangdang khal ah Boney M. pawl ih love song hi Jesuh Khrih rung suah rak hmuahnak le sunlawihnak ah ngai in kan suah tel ttheu in a lang.

Boney M. hin official ih an suah mi album pawl cu Take The Heat Off Me (1976), Love for Sale (1977), Nightflight to Venus (1978), Oceans of Fantasy (1979), Bonoonoonoos (1981), Christmas Album (1981), Ten Thousands Lightyears (1984), Eye Dace (1985) pawl an si. Lehhnu ah an hla lakih a lar hleice pawl lawrkhawm ih suah mi khal an nei hai.

Boney M. pawl in Christmas album an rak suah mi ah “Little Drummer Boy, White Chritmas, Feliz Navidad, Jingle Bells, Winter Fairy-Tale (Instrumental), Mary’s Boy Child – Oh My Lord, Christmas Medley (Silent Night, Holy Night/Stille Nacht, Heilige Nacht, Snow Falls Over The Ground, Hear Ye the Message), Petit Papa Noel, Zion’s Daughter, When a Child Is Born, Darkness Is Falling, I’ll Be Home for Christmas” tivek hlapawl an tel. An sak mi Christmas hla dang tthenkhat cu “Oh Christmas Tree, Hark! The Herald Angels Sing, The First Noel, Oh Come All Ye Faithful, Joy To The World, Mother and Child Reunion, Merry Christmas Everyone” tivekpawl an si.

An hlapawl lak ah Auld Lang Syne (thlahawknak hla), By The Rivers of Babylon, I Shall Sing,” tivekpawl hi cu Christmas hla an si hran lo nan Christmas can ih suah khal ah hnak an dohdan a zia um deuh.

An hla lar pawl lakah Christmas hla thawi’ kan suah rawi ttheu mi hla tthenkhat cu Daddy Cool, Sunny, Baby Do You Wanna Bump, No Woman No Cry, Fever, Got A Man on My Mind, Lovin’ or Leavin’, Ma Baker, Love for Sale, Belfast, Motherless Child, Silent Lover, A Woman can Change A Man, Still I’m Sad, Rasputin, Painter Man, King of the Road, Nightflight to Venus, Brown Girl in the Ring, Heart of Gold, Let It All Be Music, Gotta Go Home, Bahama Mama, Horay Horay It’s A Holi-Holiday, Montego Bay, Two of Us, Ribbons of Blue, Oceans of Fantasy, El Lute, Bononoonoos, Jimmy, Homeland Africa, Malaika (Angel), Breakaway, Sad Movies, Where Did You Go?, 10,000 Lightyears, I Feel Good, Somewhere in the World, Living Like a Moviestar, Dizzy, Jimmy, Young Free and Single, Give It Up, My Cherie Amour, Eye Dance, Dreadlock Holiday, Bang Bang Lulu, Boat on The River tivekpawl an si.

Fala tlangval ngaiawknak, siangpahrangnu tiang uire ding ih thlemthlu innunau tam zet ttangttawm sualnak tuahpitu hminthang Rasputin ih thuhla tivek, le Christmas rim nam lo lawlaw hla hi zat liangluang hi Jesuh Khrih rung piansuah rak hmuahnak ah kan hmang tel ttheu. Mi tampi tla cu kan thlarau a sat phah hiamhiam hmel sapbai!

Boney M. pawl in Christmas sunlawihnak ih an sak mi hlapawl hi cu kannih khal in Christmas sunlawihnak hrangih kan rak ngai ding mi an si ko. Kan ngainat khal ah mawhnak a um lo ding a bang. Asinan Christmas sunlawihnak hla an sak ruangah an hlapawl hi a zate’n Christmas hla an si thluh tinak a si cuang lo. An Christmas hla tthenkhat hman hi an thufun ah sakhawlam rong kai tuk lemlo an um hnuaihni.

Kan Chinmi tampi cun love song sak dah pawl in Pathian thangtthatnak hla an sak tikah kan rel sia, kan sunsak duh lo. “Amah a thlarau misa lo tuk” ti’n kan hnong ttheu.Cuvekpawl in teh love song sak tamsawntu Boney M. pawl hi ziangtin an hmu ding timi khal theih hiar a um nasa.

Love Song hi amah le a zawn ih hman ahcun thil ttangkai le ttha a si ih, miphun pakhat hrangih thil thupi zet khal a si. Minung dinhmun ah fala le tlangval duhdawtawknak hi um ding hrimhrim a si ih, cumi phuansuahnak khal um ding hrimhrim a si ti sehla a tlangpithu cun a dik ko ding. Asinan kan Bawipa Jesuh ih suahcam rak hmuahnak ding ahcun a civa lo ding a bang. Ziangkim hin anmah le zawn an nei cio. Khohrik khal khi amah le a zawn ah ttangkai zet hman sehla, tidai khainak ahcun a ttangkai lemlo ding.

Chinmi tampi hrang ahcun Christmas le Boney M. hi tthentthek ngaingai a theih lo tla a si thei. Asinan Christmas can ih Boney M. pawl ih hla kan suah ding tikah an Christmas hlapawl deuh hril in suah thei sehla a tthat a zum um. Kan rak theih lo ruangih kan ti pang mi a si ahcun Pathian in in ngaidam hram sehla, tuihnu tal ihsin ralrin cio kan tum pei. Cuti a si lo ahcun love song thawi’ Jesuh rak hmuaktu ah kan cang pang thei a si.

(Visited 695 times, 1 visits today)

Comments

comments

One Comment

  1. ti awk ter hlah says:

    Ziang ee

Comments

%d bloggers like this: