Linguistic Assimilation & Vernacularisation

LINGUISTIC ASSIMILATION & VERNACULARISATION

(Miphun lungphum hngetbik cu lungrualnak hi a si)

Kan Thuken: Kan tawng a bangawklonak pawl hi kan buainak si sawn loin kan lennak a si sawn ti hi thei camcin in Vernacularisation ih kan fehtlang theinnak dingah Linguistic Assimilation hi sirah hnawlin Lai mino hmuahhmuah tho uhsi law. Harmony in diversity hi a takin hmang ve uhsi law.

PAKHATNAK: Linguistic assimilation & nationalism. Mai tawng ih phunhnam dang nehkhuh/cimral theh tumnak, linguistic assimilation ti mi le nationalism hi nupa vek an si ih, hi tei nupaih an tumtahbik mi cu miphun kan cak ih kan hngehkhoh theinak ding kha a thupitterbik ruangah ‘ ram pakhat sung, state pakhat sungih a khawsatlang mi miphunpawlih tawng hmuahhmuah lak ihsin hman tambik mi tawng kha Tlawnginn le hmunkip ah hman theh, zir theh tengteng ding’ ti hi a si.

Hi policy ih a lungthlitum ah cun common language kha a thupitterbik ih, phunhnam mal deuhpawlih tawng kha cu hlo theh seh ti rori hi a si; hivek hi Mizoram mihrekkhat khalih an fehpi sual theu mi a si ve. Indonesia khalah an cozah in Bahasa Indonesia cu common language ah a puang ih, a hlawhtling tiih ruat khal an um vek nan, Timor le Irian Jaya pawl cun an duh lo nasa ih, neta lamah cun East Timor tla cu inn dang a suak ta riai a si hi. Mizoram YMA-pawlih an fehpi nat deuh can ah tla cun kan unau Paihte mifimpawl an meeting rupro ve mai. Tubaite Aizawl ah CAN-pawlin mithiam pakhat (a hmin ka thup) rawlkho kilpi in Mizo tawng common language ih an relpi tla hi cu, tulai Saudi Arabia Cozah ih nunau lawng umnak khawpi a din tum vek a si; hivek hi Mirang cun, ‘NO MAN’ LAND’ an ti san men hai sokhaw.

Tuluk ram Chin dynasty san ih Siangpahrang Sih Huang Ti (BC 221-202) kha cun cangandan bangrep theh dingin tan a rak la nasa ih tu tiang khalah a hlawhtling lanta; tawng dangdang cu a tampi ko nan Mandarin hi an hmangtlang theh thei ti ding a si. Hitawk ih kan theih tul mi pakhat cu, Tuluk hi an political unification, lungrualnak a that vivo ruangah a si sawn ti hi a si. Malaysia hi Acozahpi ih tanlaknak ruangah kum 20 sung hrawngah tui an hman mi Bhasa khi tlang tawngah an tuah thei. Japan hi tawng pakhat an hmangtlang ruangah an thansonak san a si ti hman hai sehla, tu ah cun an political unification a that nawn lo ruangah kum 4 sungte hmanah Prime minister 6 rori an thlengaw man a si hi! Muslim-pawl hi tawng pakhat hmangtlang le unau sinak uar hleicepawl an si nan LUNGRUALNAK a tlasambikpawl an si lala ih ral an neih sung lawngah an tangtlang nan, ral an neih lo le veten anmah le anmah an doaw lala mai.

PAHNIHNAK: Vernacularisation ah hi cun, ram pakhat sung lole State pakhat sungih phunhnampawl hi tawng pakhat an nei/hmangtlang theh cuang lo. Curuangah mipi in anmai duhhrilnak rori in an hmantlang theibik mi tawng an hril thei. Culokhalah, mai phunhnam tawng ciau kha an thuammawi thei ih, tawng mawi le tha khal sersuak vivo in an tawng an lianter deuhdeuh ih hleiah an tawng a thi zo mipawl hman an tharthawhsal hai, ti a si; hivek hi Madagascar khalah kan hmu thei ih, Mirangpawlih thuanthu kan zoh khalah vernacularisation policy hi an thansohnak a si ti kan hmu thei ding.

Curuangah a si Judah-pawlin Leitlun ramkipih kum tampi an vahvaih hnu khalah an Hebru tawng a thi zo mi an tharthawhsal ih, Britain khalah Cornish tawng kum 1777 ih thi zo kha an nuntersaknak san. Common language hi YMA-pawl bangih midang nehkhuh (assimilate) zawngin ramsung le ramdang ah FIAK zet ih a fehpi mi kan um pang khalle, hmailam ah cun Chin miphun huap theh thei in thangtharnonawnpawl hin Institution-pawl din in tlawnginn ih zir ding mi cabupawl, dictionary-pawl le method a phunphun in an cangvai ding ih, lungput FIAK-pawl hi cu HNEKCAWP identity ah an cang leh tengteng ding. Hmar Bible lettu miropi L. KeiVom ih Chin tawng hmuahhmuah telkhawmnak dictionary Vol… a timlam rero mipawl vek hin in huikhawn leh thotho ding. Thleng thei lo ding mi thudik, a nung camcin mi hi a um ko sokhaw.

PATHUMNAK: A tlun thupawl a feng thei deuhnak ding ah, POWER & SOLIDARITY ti hi theihthiam a tul ih, mallai in zoh hrih sehla: SOCIOLINGUISTICS mitkharh ih kan zoh asile, power hi cun phunhnam tawngpawl ih karlak ah hleidannak a suakter; language cun piltawng(dialect) hnakin power a nei tam sawn ih, cui a power cu a tawng mawinak le a that hleicetnak ruang khalah si cuang loin tangka le hlawknak si seh dinhmun tha a co ruangah a si sawn ti a si. Kan Chin miphun lakah ram sung le ram dang ah si seh common language tawlrelpawl hin power policy hi an ralrin lo asile, Indonesia ram vekih inn dang suah thehnak a awlte ding. Mizoram khalin, ‘INSUIHKHAWM LEH ZAI I REL ANG U,’ an ti rero mi hi an sungmu ngaingai kan zoh asile Duhlian tawng ih tawng deuh lawng hi an huiaw deuh ti hi a fiang zet. Cuitlunah Kawl Cozah le India hin Zo hnahthlak an tiawkter rero mi (Chin ti hi International ih kan identity a si sawn ti an fiang keukeu nan) hrangah hin an ram hi an phel siang veve dah lo ding. SOLIDARITY: Solidarity hi cun, mai phunhnam tawng a hmangtu ciau hin duh mi le tumtah mi bangrep kan neih ruangah tawng a bangawklonak zawn tete kha thupitter loin kan bangawknak zawn ciau kha an cawisangsakawtawn sawn ti hi a si. Curuangah mai phunhnam tawngte hmang cingin pumkhatawknak, unauawknak le lungrualnak si seh bangrannak lungphum hngetpawl hi an din thei sawn a si. Hi method hi miphun dinsuahnak principle tha hleice tiah hmin an pe. Ziangkhalle, kan thupi ih a sungmu Lungrualnak ti mi hi van mana vekih a hung tla ding mi a si lo; thangtharnonawnpawlih EDUCATION parah a thumaw mi thil a si. Curuangah kan tlaksambik mi pakhat zirnak lamah minopawl pumpekawk natsat a tul. Israel-pawl le Muslim-pawl tanawknak bik san khal zirnak ruangah a si ti kha Pakistan Jounalist pai ngan mi Rihli ah kan siar kha.

PALITNAK: Common language Hnakin Lungrualnak/pumkhatnak A Thupi sawn. Linguist professor-pawl cun, ‘Pianpi/ suahkeh tawng ti hi a ngaingai ah cun a um cuang lo; milai hi zirter cawp mi kan sinak le kan kiangkap mipawl ruangah kan tawng thei ih, kan feh thei a si sawn’ tiah an ti. Curuangah kan tawng a bangawklonak hi kan BUAINAK si sawn loin kan LENNAK a rak si sawn ti hi theihthiam a tul. Thimnak pahnih/khatin la sehla: Negro-pawl khi an tawng le an nunphung khal hlo viarviar theh in Mirang tawng le nunphung in kum tampi an nung zo nan, Mirangpawl thawi an pumkhatlozia cu leitlunpi ih theih an si ko. American ti mi pakhat khin a huikhawm fang men a si. Curuangah tawng bangawk ih tawng pakhat hmantlang ruangah pumkhatsinak le lungrualnak hi a si theh cuang lo ti hi a fiang zet a si.

Biaknak, tawng le miphun hi mi huikhawmtu ropibik an si ko nan, rampi dinsuah le common language dinsuah ti hnak hmanin miphun lungrualnak dinsuah hi cu a harsa tuk sawn mi a si. Ram hi cu hriamnam le zaangtal khalin din a ngah mai nan, ram a dinsuaktupawl hin miphun lungrualnak hi an dinsuak thei tinak a si lamlam lo. Leitlun ramkip thuanthu ih Political Thought, Revolutional Thought pawl kan zoh asile, ram tampi hin an ram leilung cu an din thei ko nan. miphun lungrualnak an dinsuahawk thei sal lo ruangah an siatsal theunak thuanthu in a khat a si hi. Thimnak pathumten zoh sehla, Italy ram kuai theh zo mi an dindal ih, an parliament khawmpi hmaisabik ah an mirinsanbik le fimbik Massimo d’ Azeglio cun, ‘Italy ram cu kan din zo nan, tu ah cun a ram sung mipipawl Italian siter hi kan thupitbik mi a si thlang,’ a ti a si. Poland ram runsuaktu miropi Colonial Pilsudski khalin, ‘State hin miphun a tuah ih, miphun in state a tuah lo,’ a ti ve thotho. Ziangkim ih fim hmaisa Greek-pawl khal Mirang ih Kawlram in uk hlan in, independent diktak ih kan Lairam bang khan City-State (Khawpi-state) in an rak um ih, tawng pakhat le nunphung bangrep, politics hruangkulh pakhat sungih khawsatlang an si nan, State tin in an ngaihawlo nasa; an lung a rual lo tuk ih rampum HUAP le miphunpum HUAP thei lungput an neih lo ruangah khawpi state/ ram cu an din thei vek a bang nan, miphun(nation) cu an dinsuak thei cuang lo ti ih hminsin an si tariai aw. Moral Reform an tul.

Lairam thar in tuahpi ding hmang maw tinak lai ah khuahlan Greek ram hlun ah in kirpisal ding maw a si hmang! Khuahlan empires concept vek hi cun ‘NO MAN’ LAND’ an tuahaw sawn ding ih, thangtharnonawnpawl hin cawimawinak NGUN KHUAT/HAIPI an hlan hai dah lo ding.; hivek ruangah hin a si kan MP Dr. No Than Kap ih MORAL REFORM kan tul a ti theunak san. PANGANAK: Bible Lettupawl hi Common language hrangih mipawimawh Hleice an si ruangah thangtharnonawnpawl hin NGUN KHUAT/HAIPI an hlan ViVo Hai Leh Ding. Martin Luther ih a rak leh mi Bible German tawng cu neta lamah mipi in an hmangtlang vivo ih, tawng pakhat an hmantlangnak ah a cang lanta. Kan Chin/Lai Bible lettu, Rev.Dr-pawl: David Van Bik; Stephen Hre Kio; Thang Hup le tulai let rerotupawl Timothy, Sui Lian Mang; Matu tawng; Bualkhaw tawng; Tedim tawng; Hakha tawng in Rev. Hoi Cung Tum si she, Hmar tawng in L. Keivom pawl hi Chin miphun zate ih tawng hmuahhmuah KAIH-LEK thiam le word play thar thatha hmangkawp thiamtu an si.

L.Keivom cun Tidim tawng ih, ‘Pu zah huai’ ti khi, ‘Your exellency’ ti ai-ah ka hmang mai ih, cassette khal hi Falam in, ‘khui’ an ti ruangah, ‘Khui’ ti-in ka hmang ve mai a ti; a dang tampi khal. Cuitlunah, Chin/Zo tawng hmuahhmuah telkhawmnak Dictionary Vol-pawl khal ka timlam rero lai tiah a ti. Dr. David Van Bik khalin Falam tawng ih ‘ A ngen’ti khi Hakha tawng ih, ‘A hal’ ti ai-ah a hmang ih, a dang tampi khalin Lai tawng a hmangkawp thiam nasa, Chin/ Lai miphun tawng hmuahhmuah cu hmankawp theh ding a si tiah a dam laiah khan an rel ringring mi a si. Mizo tawng thawn za ah 80 cu kan bangaw tiah a ti. Dr. Hre Kio leh mi khalah Falam le Hakha tawng kaih-leh ih hmankhawm theih mipawl tampi, tawng lennak le pumkhatnak in tuahsak ih hleiah Kawl tawng ih; ‘Sachuk’ tivek khalin Lai tawng a lianter vivo a si. Dr. Timothy Sui Lian Mang khalin Chin miphun tawng hmuahhmuah lakhawm in, kan missionary J.H. Cope ih national integrity in rak neihsak mi lungput bang khan Hakha tawng ih, ‘sawngkawr’ ti bangpawl le Mizo le Laimi ih kan hmankawp camcin mi, ‘Thuthlung,’ ti si she, a dang tampi Chin miphunzate tawng kaih-lekpawl le word play thar thathapawl khal language development hrangah Lai
tawng a lianter nasa a si.

KAN THU KHARNAK HRANG IH KAN CAHAWK DUH MI CU: Vernacularisation-zawngih kan fehtlang theinak ding hrangah Linguistic Assimilation hi sirah hnawlin Chin mino hmuahhmuah kan tangtlang pei uh. Kan tawng a bangawklonakpawl hi kan BUAINAK ah ruat loin, kan LENNAK a rak si sawn ti hi theithiam camcin in Harmony in diversity hi a takin hmang ve hnik uhsi.

*Ka tawngkam a hriam deuhnakzawn a um pang asile, casiartu unau zate hnenah ngaihdam ka lo dil hai.

Nan Laicin sempi: B. Lallianthang

(Visited 39 times, 1 visits today)

Comments

comments

Comments

%d bloggers like this: