Letpanchaung Branch LZP in Ţhal Tlawng Laica Zirh Ding

Šianglianuk Ķianghrol

Lairawn Zirsang Pawlkom, Letpanchaung Branch hmin in Kalay peng, Letpanchaung khua BEHS tlawnginn pi ah 2017 Ţhal sung Laica zirh program an nei ding tiah theih a si. Kum dangah cun mah le kawhhran cio ih a dangdang in an rak zir ţheu mi kha hmun khat te ah course bangrepte’n zirh khawm thei dingin an tawlrel mi a si.

Letpanchaung LZP ih Summer Chin Language Teaching Program ahhin Falam Language le Hakha language zirh ding a si. Tlawmngaiih pumpe zirhtu ding hi mi 20 ţha an siih, March 30-31 tiang ni hnih sung TOT training an nei thei. TOT ahhin Laimi lakih canganmi S. Kei Uk le JC Kipling in an zirh.

“Duhlian ţong hmang Lushai le Hualngo unau pawl khal hmunkhat ih zirh khawm ding in kan sawm. Letpanchaung ih Mizo Students Fellowship (LSF) thawn meeting neiin kan relkhawm nan, LWO lam hmalak ding a si ruangah Duhlian (Lushai) language cu tui kum an zirh ve thei lo ding thu in sim sal. Poi kan ti zet,” tiah LZP Letpan secretary Salai Van Lal Zui cun a rel.

2016-2017 Fimzir Kum sungah Lairawn ih khaw tampi ahcun Chin Language zirhnak program hi a hlawhtling tuk lemlo. A san cu acozah tlawng saya pawl le ţuanvo neitu pawl in thungai thlakin ţan an khawh lonak le Myone Fimzirzung lam ihsin forhfial somdawlnak a um lo ruangah a si tiin tualsung mipawl hnenin theih a si. Hi thu ah LZP Letpan Branch advisor le tuikum Summer Laica Zirh Program tawlrelpitu Salai Jesse cun,
“Acozah fimzirzung lamin an ngaihthah hleiah kan Chin hruaitu lam khalin nornak a mal deuh ruangah Lairawn ahcun Chin Cazir program hi tlawnginn ah a hlawhthling tuk lem lo. Acozah in a thu in zir in sian hi remcang ah la in nor sinsin ding kan si nan, kan thlahdah deuh lai. Compulsory subject asilole Alternative Subject pitling si thei dingin kan nor a ţul. Tu hmanih kan thlahdah cun in palzutsak vivo ding. Kan identity pakhat a siih, kan sunsak thiam a ţha,” tiah rel.

April 3, 2017 ni ihsin zir thok ding an siih, kawhhran pawl khalin mah le kawhhran cio ih an Laica zir program cawlin an fale an thlah dingih asilobik ah tlawngta mi 300 tal an si thei an beisei. Chin Literature and Culture Committee (Kalay-Kabaw) sawmin April 5 ni ah Ţhal tlawng on puai neih an tum.

Letpanchaung khua hi Lairawn Kalay Peng ih Chin khawte lakah a tumbik le Phunhra Exam centre ngahnak umsun a si. Innthawng 2000 tlun ummi Letpanchaung ahhin 2016-2017 Fimzir Kum ah October thla tiang Chinca zirh a si loih, CLCC in an vehvaih hnu le LZP in hmalak an tum hnu in tlawnginn ah zirh thok a si. Chinca zirhtu cozah tlawngih tlawng sayapawl cun 2016 kum cem zawng ihsi an zirh thok mi Chinca an zirh man zaangna domnak nihlawb khal tuini tiangah an dong hrih lo a si.

Comments

comments

Comments

%d bloggers like this: