Letanchaung LZP In Village Development, Tappi Tong Zirhnak Somdawl and Trasparency Initiative Worshop Nei

15171285_942774109189532_8295755159403548136_n

Kalay peng Letpanchaung khua ah Lairawn Zirsang Pawlkom, Letpan Branch hohanak in November 26 ni ahkhan PCM Vengthar Biakinn ah, Khawsung Tthansohnak, Tappi Ttong Zirhnak Somdawlnak le Transparency Workshop an tuah thu theih a si.

Hi workshop ah Khawsung lal, Uksuh Cazi, tlawng sayamagyi, biaknak lam hruaitu pawl, Chin Pawlpi, Mizo Students pawl le Chin Literature and Culture Committee hotu pawl khal an sawmih, sun 12:00 ihsin siimlam 5:00 tiang rori sunvu workshop an hman hnuah zanriah an hilkhawm tiah theih a si.

2014 Kum ihsi thokin Kawlram sung ramhrin miphun tappi ttong pawl cu overtime subject ah zirh sian a si nan, Chin State lenglam a si mi Lairawn ah hmual nei zetih zirh a si lo thu ruangah LZP le Phunsang tlawngta pawlkom hminin an nor duh ruangih tuah an si thu, LZP Letpan Branch hotu Salai Khaw Nei Lian in hitin a sim, “2014 kum ihsin kan khaw BEHS tlawngah Chin ca zir thok a si nan, thlahlawh a mal ruangah maw, an ngah tthat mumal lo ruangah simaw, tthate le fumfe ih zirh mumal loin an nuainam deuh ttheu. Curuangah hnakum 2017 tthal ah tlawnginn pi ah a hmunkhawm in zirh sehla tiah tumtahnak kan neiih, khawltlang hruaitu, tlawng lam thuneitu le biaknak lam hotu pawl sawmin kan relkhawmnak san a si,” tiah a sim.

2016-2017 Fimzir Kum ah BEHS Letpanchaung tlawngah Chin Dialects pawl cu October thla tiang zirh fumfe a um lo thu le tlawng sayamagyi khalin a theihpit lem lo thu khal theih a si fawn. Hi thu ah,
“October thla nelam ah khan Chin Literature and Culture hotu pawl in tlawng an ra fang hai. Kan khaw tlawnginn pi ah Chin ttong pawl an zirh lo thu an ra thei. LZP hminin tlawng sayamagyi kan va leng ih, tthal ah tlawnginn hman kan va dil. Tui kum an zirh dan kan sut ih in sim thei cuca lo. Textbook umnak kan sut ih in sim thei cuang lo. Cun Chin ttong zirhtu zaangna domnak thlahlawh thla khat ih Kyat thawng sawmthum an ngah ding mi ai kha tthal tlawng ih a zirhtu saya pek dingah in hlawm thei pei maw tiah kan dil ih, a relfiang thei lo. Kan fale nau pawl an na tuk. Ramdingkhawm Acozah rori ih sian mi kan si nan hmunrawn ahcun kan ca zirnak cu nuainam rero a si. Zatlang Pawlkom in ttangrual in kan nor khawm rori locun, a hlawhtling in hmual a nei thei zik lo ti a fiang,” tiah LZP Letpanchaung Advisor Salai Jesse cun a rel.

2017 tthal ah April le May thla hnih sung tlawnginn ah Chin Ca zir dingin le Biakinn ih a cuk a pak ih zir lo ten a hmunkhawm ih zir thei an tumtah tiah theih a si. TOT Training neiih, a zirhtu ding khal nihlawh awm-ang tawk tuahsak thei an tum tiah theih a si fawn.

Tappi ttong zir thu hleiah, khasung tthansohnak hmuitin neih thu le transparency thuhla khal an relkhawm a si. Inn thawngthum hrawng a si mi Letpanchaung khua hi Kalay-Kabaw ih khaw tumbik a si nan, khawsung kuankaih le hmalaknak pawl mipi relkhawmnak le sumpai cazin khal langhngan ih mipi hnen tarlang a um lo ruangah mipi lam thathonak a mal vivo ruangah himi an relkhawmnak san a si tiah theih a si.

“Khawtlang pumhuap cangvaihnak le kuankaih thuhla siseh, tlawnginn le palik zung, Taik-ne Sizung, Meiphal-bu tivek phurrit zetzet kan sualsuak tum laiah, kuankaih le sumpai tukawk cu a tam nasa. Ttum khat thilthu men hmanah kan innsang in Ks. Ting khat lai zulvo kan thawh. Pek le pekah sum khon a si. Asinan, an khon zik lawngah tlang an au menih, felfai ih relkhawm le budget estimation siseh, account statement siseh mipi simron ti a um dah lo. Ziangzat an khon ngah, ziangzat an hmangsuak ih ziangzat a hlei, ziangzat a daih lo ti khal mipi vangtlang in kan thei ve dah lo. Himi thu ah Sayamagyi hlun um laiah, tlawng committee advisor ka rak si ve ih, kum khat sungah voikhat hman meeting in ko lo nan, tohpi ih kan fehkhawm ttum ah sumpai cemliam thu an run relsuak. Ramleng ih unau pawl hnenah ttanpi rak dil dingin in fial ruangah kei khalin account statement felfai ten item tinkim a cip a ciar in kan audit dingih cahmai ziangzat khal a cem a si le keimah in a cemliam ka kuan dingih, khawsung ah copy 3000 kan zemsuak ding.

Cumi cazin thotho cu PDF in online ah kan tarlang dingih cutin ramleng unau khal ttanpinak kan dil ngam ding tiah ka rak nor dah. Zianghman an ttong duh riai lo ee. Kumtin inn khat fangfai tang khat in khon ih, tlang-au hlawh kan bur. Ziangzat ciah an pesuak, ziangzat a hlei ti kan thei dah lo. Transparency um lo cun zovek mipi khal kan tha a tho thei lo. Vision relkhawm le hmalak dan ding relkhawmnak khal a um dah lo. Kalay Nitlak-saklam khua pawl hi tthansohnak thu ah khawtin lal le hruaitu pawl relkhawm vutvo in vision kan neih a ttul tuk nan, mah le khawsung men hmanah cuvek a um dah lo tikah, khawpi dinhmun ding thei zo si, tu tiang khawte berek kan sinak a si tiin ka hmu,” tiah Jesse in a sim bet. Tlawng committe le PTA committee thuneihnak le ttuanvo khaisang vivo in nauhak fimzirnak le tlawng tthansohnak lam nor ding thu khal an relkhawm tiah theih a si.

“Fimzirnak lam relkhawmnak an tuah ve nan, laksawng pek le program dang thawn an kop ringring. Cuhleiah, reipi pi anmah in thu an sim ciamco ih mipi an tlung thluh ttheu. Tlawng tthansohnak thu hi kum khatah voi 4 tal ahranpa ten relkhawmnak neih a ttha. Cun subject tinkim hrang ahranpa in workshop nei thei nungna kan fanau pawl hrang a ttha tuk ding,” tiah tlawngta nupa pakhat cun a rel fawn.
Letpanchaung khua hi 2016 kum ihsin Phunhra Exam Centre an ngah ih, Taik-Ne Sizung khal ngah beisei in mipi sumkhon mi rori’n an khawtaw ah loram kaupi an lei hnuah, inn khat Ks. 3000 khon in a hmunram tifelnak hrang an tawlrel tiah theih a si. Kalay Peng ai-awh Pyituh Hluttaw palai Pi Siami ih a thusuhnak ahcun Letpanchaung Taik-Ne Sizung ding cu program a um hrih lo thu an sawn nan, ngah thei rori tumin an nor rero lai tiah theih a si fawn. Kalay Nitlak-Saklam tluan ih Vaphai tiva le Minhla Tiva lilawn cu 2014 kum ah German Development Bank in donsak dingin an tum fel zo ih, lamzin khal cement an zutsak cih tum a si.

Jesse Klirlungz Kip Ling

Comments

comments

Comments

%d bloggers like this: