Leng U le An Dinhmun

Leng U le An Dinhmun

Mai Zilthli Lal Nei Thluai

Minu pawl cu mipa pawl aiin kan thitha, kan ruahnak khal a malsawn ih taksa lam khalah kan tar a ol sawn. Leng U ti cu a thei lo kan um lemlo ding. A mahlawngte kumziat tluk an ti in “leng U” ti’n kan ko timi cu pakhat le pakhat kan ruahdan a dangdang aw cio tla a si menthei. “Leng U” timi hi “tawng lo, fala tar” tivek ih kawh aicun “fala upa” ti sawn sehla a ngaitui’ hrangah a hahdam in ngai a nuamsawn ih t’ongfang mawisawn tla a si menthei ti’n ka ruat. Leng U pawl hi ziang ruangah leng U an cang sipei?

1. Duhdawtnak ah an van a sia

Tlangval duh zetmi pakhat tla an neiding. Asina’n thuhla a phunphun ruangah an kawpaw thei nawnlo. Vanduainak ruangah a tlangvalpa in a thihsan, fala dang a neihsan, nupi a neihsan tivek ruangah an thin a na tuk ih tlangval nei paih nawnlo in pasal neih paihnak/duhnak thinlung an nei nawnlo tla a si menthei.

2. An duh a khung tuk

Tlangval le duhtu khal nei hnenhen na’n pasal tawnglo ti hi a um thei. Thil cangtheimi taktak khal a si. An tawnmi, an mah duhtu pawl parah lungkim tawk lo in cu aiih t’ha deuh, mawi deuh, tawk deuh, nei deuh an zuan vivo ih neitabik ahcun kawpding taktak nei nawn lo in an tan lualli ruangah tla a si menthei

3. Nulepai’ dinhmun an theihthiam pi tuk (farah ruangah)

Mi hrekkhat cu duhtu khal nei keukeu, pasal neih duhzet na’n nei ngam lo thlurthlo rori khal an um thei. Nulepa nunhar te an si tikah “kei pasal ka neihcun ka unau pawl ziang ti’n an nung ding” ti’n innsang lubik dinhmun ih an din tikah pasal an nei ngamlo rori tla a si menthei.

Khatlam ah cu duhtu tawnglo rori khal a um thei ko. Asina’n cu pawl khalcun an thinlung thup te in duhmi te cu an nei ve ko ding. Cui’ an ruah thupmi te in an rak ruah ve lo tiakah “an duhmi an co lo” ti’n khal kan ti thei. Mirang pawl cun “kum 20 na kim ih mi duhhna na thiam hrihlo a si ahcun harhdamnak lamah mi tlasam na si” an ti. Cuvek thotho in mi pakhat kan va duh timi cu ningzah ding a si lo. Mi kan bang, kan damcak tinak sawn a si.

Mihrek cun fala upa pawl in tleirawl tete an biak kan hmuh tikah kan zohdan tla kan rak dangter t’heu. Cumi tlunah an thuanthu te ruahsak in an dinhmun te kan theihthiamsak thiam ding hi thil thupi zet a si.

(Visited 153 times, 1 visits today)

Comments

comments

4 Comments

  1. Mai Thluaite,

    Na ngan thazet.
    Ka sinak malte a tel.

  2. crazylove Mawite says:

    Thluai na ti hman nasa..
    Ka duh tuk mi cu “Farah ruangah” ti mi te hin
    ka thin lung a khoih nasa..
    Na thiam tuk…siar manhla nasa..:)

  3. Salai Z.L.Siang says:

    Hi..

    Thluai… Leng U pawl din hmun na theih pi tuk ih nang mah tla na leng U zik tla si kei .. he he he.. Leng U si khal mai thu a si ual lo ti, an duh a khungtuk ti lo ah cu.

  4. ka siar ve nasa

Comments

%d bloggers like this: