Leitlun Thuthang Lawrkhawm – SBT

India in Satellite A Kap Suak

Indian Space Research Organisation (ISRO) cun  India Polar Satellite Launch (PSLV) leh Orbit Satellite Cartosat-2B leh Satellite dang pali cu Andha Pradesh ih Sriharokota ih Satish Dhawam Space Centre Launch Pad ihsin a kapsuak.

PSLV, hi sawngli ih tuahmi a siih, Metre 44.4 ih sangih kahsuak a si. Himi Satellite kahsuak nak hmunah ISRO Chairman, K, Radhakrishnan,   Scientish mithiam ziangmaw zat leh Planning Commission Vice Chairman,  Montek Singh Ahuluwalia leh ISRO hotu hlun Kas Turirangan khal an tel.

Cartosat -2B  Satellite hi ISRO ih tuahmi Remote Sensing Satellite a siih, Satellite dang pali hi Andhra Pradesh leh Karnataka ih Enginering College 7 ih tlawngta pawlih tuahmi  Stusat leh Algiria ramih tuahmi Al Sat leh Canada leh Swizerland ramih tuahmi Nano Satellite pahnih  ih hleiah Cartosat -2 bawmtu ding Satellite leh Oceansat -2 khal  an kaptel.

Isreal Lawng Ralkap in Dawi

Libya ram ihsi Gaza ih Palestinian pawl bawmnak ding thilri phurtu Amalthea Lawgpi cu Gaza panih a feh laiah Isreal Lawng ralkap pawlih raldo nak lawng cakzet 8 thawn an dawiih, Gaza a thlenhlan Km 120 ih hla ah an dinter ih, Isreal Lawngralkap pawlcun  Egypt sinai tipi kapih Ei-Arish lawng colh nak hmunih fehih an thilri phurhmi pawl a zatei hlangthla thluh dingin thu an pe.

Hi lawngpi hi Libya ram Lal, Muammar Goddafi ih pawlkom dinmi Goddafi Foundation pawlin Gaza ih Palestinian pawl bawmnak dingih thilri an kuatmi a siih, Libya ramih si a suahhnu kandung Colhni sun ihsin Greece ram suahsan in Gaza a pan.

Isreal Lawng ralkap pawlcun himi lawngcu Egypt Sinai tipi kapih Ei-Arish lawng colhnak hmuhih an thilri an hlanthlak thluhhnu ah khawmual lamzin ihsin Gaza ih phurlut sal dingin thu an pe. Isreal lawng ralkap thupek hi  himi lawng ralkap Captain, leh  Gaddafi Foundation  Excutive Director, Yousseuf Swani cun an duhlo lawkih,  Asinan Isreal lawng ralkap cun nan fehtlang thotho a si ah cun  kantuah dingmi cu kantuah ding a si tiih, an  hro ruangah  Egypt ramih Sinai tipi kapih Ei- Arish lawngcolh nak hmunpi cu an pan a si.

Himi laiah Egypt Official cun  Libya lawngpi hin Sinai tipi kapih Ei- Arish lawngcolh nak hmunih a thilri phurmi hlanthlakih khawmual lamzinih Gaza ih phurlut sal dingin  siannak pek a si tiah a sim. Himi lawngin Gaza ih Palestinian pawl bawmnak ding thiri Sii leh tirawl ton 2.000 lenglo a phur. Himi ih hleiah  Jordan ihsin Unionist Journalist leh  Academics 150 hrawngin Motor 25 hmangin khawmual lamzin ihsin  Gaza hi an panlai rero.

Ni Thacah Nak Hmangin  Vanzam Tuah

Nisa thacah nak hmangih Vanzam Andre Borschbery leh Bertrand Piccard pawlin kum 7 sung an buaipi micu Mizan sunah khan  Switzerland ramih Payerne khua ihsin zuansuak ter a siih, Nazi 24 sung zuansuak tertum a si. Hi Vanzam hi vansang feet 27.900 tlunlam hlirih zuanter a siih, Sunih Nisa cahnak hmangih a zuan vekin zanah a zuang vivo thei kemaw tiah test a si. zanih a zuang thei vivo ding a si ah cun kum 2013 ahcun tipi thuanthum  kanih zuang thei dingih tuahtum a si.

Isreal PM Leh US President, Kawmaw

US ih tlawng Isreal Prime Minister, Benjamin Natanyahu leh US President, Obama cu tihni sunah khan White House ah an kawmaw ih, US President, Obama cun US leh Isreal pehzawmawk nakcu sahcat theih leh tisiat theih a silo tiah a sim. Obama cun  Isreal Reporter pawlin East Jerusalem ih Juda mipawlih umnak ding Inn Isreal Cozah in sakbet a tum ruangih  US leh Isreal peh zawmawknak sezet vekih an tlangthan tercu thudiklo  a si tiah a sim.

Obama cun kumkhat leh a hreksung ka thusuah mipawl  nanzoh a sile Isreal leh US pehzawm awknak thatzia leh hngetzia thupawl hlir a si a ti. Obama cun Isreal PM Banjamin Natanyahu thawi kan kawmawk nakah hin Press lam pawlcun kan karlakah thilthar danglam ziangziang simaw um dingin an duh zetih, Asinan President, ih hriltlin kasi hlan ihsin PM Benjamin Natanyahu cu kami rinsan zetmi a siih, Palestinian leh Isreal karlak rualrem awknak thu relding khalin ka rinsantawk a si a ti.

Himi laiah Isreal ,Prime Minister, Benjamin Natanyahu cun  Palestinian leh Isreal cu  zohman kan karlakih palai umlo in kanmah leh kanmah hmaiton ih biakawk a cu thlangih, President, Obama ih bawmnakin  Palestinian President, Mahmoud Abbas thawi rualrem awknak thurel dingin lamzin hawl a duhthu a sim.

Queen Elizabeth II in UN General Assembly Ah Thu A Sim.

Mizan sunah England ram Siangpahrang nu Queen Elizabeth II cun New York khawpi ih UN General Assembly ah thu a simih, Misual donak dingah ram tinkim kantan tlang a ttulih, Leitlun boruak hlumcaktuk  donak ding khalah ram tinkim kantan tlang a ttul a si a ti.

Queen Elizabeth cun UN General Assembly ih thu a sim neta bikcu a liamcia kum 53, 1957 a siih, khami laiih UN General Assembly ih thurel mileh  tui thurel micu a danglam zetzo tiah a sim. Cumi laiih  thurel micu a thazawngih her danglam awkhal a umih a se zawngih her danglamaw khal a um a ti.

Queen Elizabeth hin UN Assembly ih thu a sim thluhhnu ah World Trede Centre siatsuah nakih mithi pawl  sunnak hmunah a fehih, pangpar tthi a ret, cumi hnuah  khami ttumih England ram minung 67 thipawl hngilhlo nakih an tuahmi Hanover Square ih British Garden of Remembrance khalah a feh.

British Ralkap Pawlin  Afghanistan Ramih Sangin Bial Suah San Ding

BBC in a sim nakah British Ralkap pawlin Afghanistan ram Helmand Province ih Sangin bialih  umhmun an khuarnak hmunpi cu an suahsan thlang dingih US Ralkap pawlih kutah an pe thlangding tiah a sim. Sangin bialah hin kum 2001 ihsin Tapung pawlih kut tuarin British ralkap 99 an thizo ih, tui naite hrawngih  Tapung kut tuarih Britiah ralkap ziangmaw zat an thih bet ruangah himi hmunhi suhsan an duhnak a si tiah BBC cun a sim.

British Defence Secretary, Liam Fox cun  tuikum sungih himi hmun suahsan ngah tengteng dingin  an ram Cozah thu neitu pawl hnenih thlen a tum tiah BBC cun a sim.

Himi laiah Mizan zingah khan  Afghanistan ih NATO ralkap pawlin Afghanistan Cozah ralkap 5 cu raldo nak Vanzamin an kapthat ngah pangih, Afghanistan ralkap hotubik General, Mohammad Zahir in a sim nakah NATO ralkap pawlin an ram saklam Ghazni  Province ih Taliban Tapung pawl  an kah nakah  raldonak Vanzam an hmangih, himi hmun thotho ah Afghanistan ram Cozah ralkap pawlkhal an umve tiah a sim.

Afghanistan ralkap pawlih mizan zing khawvang zawngih Taliban Tapung pawl Ambush an tuah ih an kah awk laiah NATO ralkap pawlin Vanzam in an vakap tiah a simih,hiti vekih vanduai nakhi a thlen phahphah theu ruangah NATO ralkap pawlkhal fimkhur dingih a duhthu a sim.

NATO ralkap thupuangtu, Josef Blotz khalin hi Vanduai nak thlengcu  tipang rori a si tiah a simih, Vanduai nak thlen  danhi fiangzetih zinzoi a si ding tiah a sim.

(Visited 49 times, 1 visits today)

Comments

comments

Comments

%d bloggers like this: