Leitlun thuthang lawrkhawm… SBT

24th November, 2009

PM Singh US A Tlawng

India ram Prime Minister Manmohan Singh cu US ih nikua sung caam dingin tihni sunah  washington khawpi a thlengih, US a thlenhnu ih US thuthangca latu pawlin an rakkawm nakah PM Singh cun US leh India in Nuclear ralthuam thu ih hna an ttuan tang nakah India Cozah cun zianghman ttihmi a neilo ih US khalin India duhdan thlun thei dingih a beisei thu a sim.
Thuthangca latu pawlin an suhmi,,,India in Nuclear test lo dingih thuthlung Nuclear test Ban Treaty a pawm ve duhlo ruangah President, Obama thawi kawm awknak dingah  ttih nak leh huphurh nak na neimaw?   ti ih an suh micu PM Singh cun  Nuclear Test Ban Treaty a pawm ve duhlo ruangah India in zianghman ttihmi a nei cuanglo tin a letih, India cun a ram tthat nak dingah tumtah mi leh ruah hman nak felfai zetin a nei a si a ti.
PM Singh cun India cu Nuclear ralthuam test lo dingih tiamkam awknak ah tel duhlo hman sehla  President, Obama in leitlun ih Nuclear ralthuam umlo dingih tumtah nak a neih micu India khalin a thlawp a si a ti.
PM Singh cun Kashimir thuhla reltel in Kashmir ramri cu ziangti zawng hmanih ti danglam leh rin danglam a theih hrimhrim lo a ti. PM Singh ih thusim mihi Pakistan Cozah cun a rak ngai pawimawh zet hngalih, India thawi an ramri Kashmir ramri cu UN thu relmi vekin fehpi a si ding tiah Pakistan cun PM Singh ih thu rel micu an letcih.
PM Singh cun Pakistan ramcu mipi rorel nak ram vek sisi ralkap an lal zetih mipi rorel nak ram maw ralkap rorel nak ram a si tihman theih thei a silo ih, ram umze neilo a si a ti. President, Obama leh PM Singh hi tuisun ah  White House ah an kawmaw ding.

Ban Ki-Moon In Summit A Ong

Leitlun ram 60 ai awhtu pawl tongkhawm aw World Food Security Summit cu Italy ram khawpi Rome ah  UN Secretary General, Ban Ki-Moon in mizan sunah a ong. Ban Ki-Moon cun leitlun pumpi ah  rawl ei ding neilo in nitin nauhak  17.000 an thi  ringringih ei ding neilo in minung Billion 1 in harsat nak an tuar rero lai tiah a sim.
Ban Ki-Moon cun kum 2050 ah cun leitlun ah rawi ei ding neilo harsat tuar hi an tam vivo dingih  cu ruangah lo thlo hna ttuan tupawl cu ngai pawimawh an ttul ih rawl ei ding neilo miharsa pawlcu ei ding peklawng silo in  ei  in an hawl thiam nak dingih zirh khal an ttul a si a ti.
Cui tlunah  leitlun boruak hlum caktuk cu ram tinkim in ngai pawimawh a ttulih, Himalaya tlawngih vur a tit caktuk ruangah China ram minung  Million 300 lenglo in harsat nak an tuar rero lai ih, Himi ruangah Asia ram khawmual ih minung Billion 1 lenglo in harsat nak an tuar a tibet.
Hiti vekih khua a hlum vivo ih  Vur tlang a ti cak vivo a si ah cun  2020 ah cun Africa ram pawlcun an buh leh thlaiscin suak mihi 50% ah a tla niam  ding a ti.

Lawng A Pil

Mizan sunah Indonesia ramih Sumatra tikulh ah lawng a pilih Minung 29 an thiih, midang 17 cu an dinhmun leh an thuhla theih nak umlo in an hlo lai ih minung 249 cu nunghdam ih runhsuah an si. Transport Ministry in an sim nakah  Hi lawng Dumai Express 10 an timi hi Riau ihsin Batam tikulh panih feh a siih, a pil naksan hi a phurh theizat hnakih tam minung leh thilri a phurh ruangah a si tiah a tarlang.
Riau bialih Palik bawipa Yasin Kosisih in a sim nakah hi lawnhi Riau ihsi a fehsuak hnu minute 90 ah a pilih nukhua sia zet leh thlihrang zet lakah runsuah nak hna ttuan  a harsa zet tiah a sim. Hi lawngah hin ticket neizat cu 242 lawng an siih, cuhnak ih tam leh thilri a phur tam ruangah tu ih an thuhla theihlo ih hlo hi minung zianghmuah ciah an si tikhal theihfiang a harzet, tiah a simbet.

Vanzam A Tla

Mizansunah Italy Airforce raldo nak Vanzam C-130 J cu an ram saklam ah a tla ih a sungih to minung 5 an thi thluh. Italy Airforce thupuangtu Mauro Gabetta in  an sim nakah hi raldo zirnak Airforce C-130J hi  mizansun nazi 2:30 ah  ralkap pawlih raldo an zir laiah Vanzam dang thawn an ttaih aw ih a tla tiah a sim.

Phillipines Ram Buai Nak

Mizansunah Phillipines ram thlanglam Mindanoo ah  hnakum hrilawk nakih cuhtum hmin pelut ding minung 22 cu Tapung pawlin an rukhlo ih an rukhlo hnu reilo ta ah an ruang pawlcu hmuhkir sal an si. Himi ruangah Phillipines ram Cozah cun  Province pahnih ah Emergency a puang cih ih, a ttul nakah meithla hmetpuak mai dingin ralkap pawlkhal thu pekcih an si.
Hi mithi pawlhi Civil mi hlir an siih, Thuthangca latu pawlih hlei ah hnakum hrilawk nakih  Maguindanoo  Province ihsi cuhve tumtu Buluan Mayor ih nupi khal a tel. Hiti vekih buainak in an ram mipi pawl a ti thlaphang leh ning ttih laiah tuisun ah  Himi bial sung thotho ah  mithi ruang tamzet an sarbetih,  Interior  Secretary, Ronaldo Puno cun  misual pawlin leilung kaupi in an laikhuar ih cumi sungah an mi thah mipawlih ruang cun an phun tiah a sim.

Sri Lanka Ram Hril Aw Cing Ding

Sri Lanka President,Mahinda Rajapaksa cun an ram hrilawk nak an tuah cingding thu a puang. Kum 25 sung LTTE pawlin an ran an do ih Cozah harsat nak an pek hnu ah, Tuikum May thla ah khan LTTE pawlcu ral an sungih  cumi hnu ah an ram tuahtthat sal nakdingah hrilawk nakhi tuahtum an si.
President,  Mahinda Rajapaksa hin kum 2 sung caan a neilai nan kumthar January thla hrek hrawngah hrilawk nakhi an tuah dingah zum a si. Himi thu ah Presient, Mahinda Rajapaksa khalin an Party United Peoples Freedom Alliance hruaitu pawl a relpi zo tiah theih a si.
Hi an hrilawk nakah hin Ralkap hotu hlun General, Sarath Fonseka cu Opposition lam a siih, Tui ttum an hrilawk nakah tui President, Rajapaksa hi a khing thla thei mending tiah zumnak tumpi an nei.

India In Missile A Kap Hlawh Tling Lo

India mithiam pawlin an tuahsuak mi Agni II Misille cu Mizan ah Orrisa ih Wheeler,s Islan ihsin  an kapsuakih a sinan an tumtah vekin an kap hlawhtling lo tiah  Defence Ministry cun an sim. Hi Misille hi Defence Research and Devolopment Organisation (DRDO) hoha nakih kahsuak mi a siih, an kah tumnak hmum a kap ngahlo ih an hlawhsam a si.
Tik cucaan hmang dik hramaw
(Visited 39 times, 1 visits today)

Comments

comments

Comments

%d bloggers like this: