Leitlun Thuthang Lawrkhawm…SBT

12th November, 2009

Obama In Asia Ram Pawl A Tlawng

US President, Barack Obama cun ni 9 sung caam dingih Asia ram dandang pawl tlawngdingin  tuisun ah Japan ram khawpi Tokyo a panih, Cumi hnu ah China ram khawpi Beijing a fehdingih , Cumi hnu ah South Korea khawpi Seoul a pan leh saldingih, Cumi hnu ah Singapore ih Asia Pacific Economic Cooparation Summit a hmanpi ding.
Obama hin Asia ram dangdang a tlawn vivo nakah ram dangdang hotu pawlcu Asia ramih rualrem awknak leh peh tlaih awknak ttha a um theinak ding lamzin a relpi vivo haiding. Cumi ih tlunah  leitlun tikcu boruak hlumcaktuk do tlangdan ding thu leh North Korea  Nuclear ralthuam thuhla leh China leh US ram pahnih peh tlaih awknak ttha an neih theinak ding lamzin hawldingdan pawl cu tui ttum Asia ram a tlawn nakaih a thu kenmi pawimawh langsar pawl an si.

Hezbollah Hotu In Obama Cu Zum Tlaklo A Ti.

Lebanon ramih Muslim Tapung pawl cakzet Hezbollah, hotu Hassan Nasrallah cun  Al- Manar TV ih an kawmnakah US President, Obama in  Muslim ram pawl thawi peh tlaih awknak ttha leh rualrem awknak lamzin hawlih hna ttuan a tumthu a sim micu zum tlaklo leh  ngai thlak tlaklo a si a ti.
Hezbollah hotu pa cun Obama ih Cozah cun West Bank ih Muslim ram pawl ti thlaphang dingin  leh an dinhmun der thawng dingin  Isreal cu ralthuam hriamnam thawn a bawm ringringih, Cu ruangah Arab ram dangdang ih rualrem awknak um thei nakdingah US cu  beisei a um lo ih, US cun Arab ram pawlih rualrem awknak a um hnakin  buainak suakding zawngih  mi tawh hrok a tum ringring sawnih, Cu ruangah Arab ran rualrem awknak a um thei nakdingah US ih bawmnak leh ttanpi nakhi Arab ram pawlcun kan ttullo a si a ti.
Hi Hezbollah hotu cun US President, ih Obama an hril tlin pekte ah cun rualrem awknak leh daih nak a um thei pangah tiah beisei nak sangzet thawn kanrak thlir ringringih , Cumi laiih Isreal kilhim nakding ralthuam hriamnam a pek ringring ihsi cun  Obama hnen ihsi kanrak beisei nak cu umzia neilo thil ah a rungcang a si a ti
Hezbollah hotu pa cun Midum President, in kanzum nak hnakih reilo te ah in bum ngahih  tuihnu lamah cun midum President, thusim micu kanzum ngam nawnlo dingih a ngai khal kanngai dah fawn loding a ti.
11th November, 2009

South Korea Leh North Korea Kapaw

Mizansunah South Korea lawng ralkap leh North Korea lawng ralkap pawlcu an ramri tipi parah an kapaw ih mithi leh hriamhma tuar an umleh umcu an simlo. South Korea lawng ralkap thupuangtu cun  North Korea lawng ralkap pawlcu siannak umlo in South Korea  ram tipi sungah an raldo nak lawng thawi an luhruangah South Korea lawng ralkap pawlin   lawng parih sin an kap hmaisa ih , Cumi hnu ah North Korea lawng ralkap pawl khalin an lawngsung ihsin an rakkap ve ih, Cumi hnu ah an lawng sezet thawn  North Korea lawng ralkap pawlcu an ramsung lamah an tawlh lutsal tiah a sim.
Himi laiah North Korea lawng ralkap pawlcun ramri an kanlo thu leh thilsual an tuahlo thu an simve ih, Cu ruangah  South Korea in North Korea hnenah ngaidam a dil a ttul tiah North Korea Defence Ministry cun tuisun ah thu an suahve. Kandung thla khalah khan  North Korea in South Korea cu North Korea ramsung tipi ih a raldo nak lawngpawl ret ah a puhzo ih nikhat sungah South Korea lawngin ramri voi 10 lai an fehtlang ringringih  cu ruangah South Korea hin ram pahnih do awknak suahter hi a tum ringring tiah North Korea cun South Korea a puh.
South Korea leh North Korea ramri thu hi kum 1953 ih an do awknak a reh hnu ah  UN in ramri a tuahsakih, Asinan UN ih tuahsakmi ramri hi tutiang North Korea in a pawmduh cuanglo ih, cu ruangah ramri thuhla ah hin an buai deuh ringring a si, kum 1999 leh kum 2002 khalah ramri thuhla ah an lawngralkap pawl an rakkap aw zo.

Thailand PM Hlun Cambodia Ram A Thleng

Thailand ram Prime Minister, hlun Thaksin Shinawatra cu Cambodia ram hrangih Economic Adviser hna ttuandingin Mizansunah Cambodia ram a thleng tiah  Cambodia Information Minister, Khieu Kanharith cun a puangih, Thaksin Shinawatra cu Cambodia mipi in kan raklawm zetih, kanrak hmuak a si a ti, Cambodia Information Minister, cun Thaksin Shinawatra cu a thiamnak leh a hmuhton mipawl hmangin Cambodia ram dinhmun khaisang theitu a si a zumthu a sim,
Thaksin Shinawatra hi kum 2006 ah khan Thailand Prime Minister, a si nak ihsin ralkap cahnak hmangih hlon thlak a siih, cumi hnu ah Thailand ram Cozah thu neitu pawlin  PM a si laiah a thil tuahsual mipawl thu ah kaih tumin an hel rero laimi a siih, cu ruangah Dubai ih tikcu caan ziangmaw zatsung a um hlo hnuah Cambodia Prime Minister, Hun Sen cun  an ram Economic Adviser ttuanding ah a puang a si.
Thailand leh Cambodia ram pahnih hi ramri ih Temple thuhla ah buainak nasazet an rak neizo ih, tu ah Cambodia Cozah in Thailand ram PM hlun Thaksin Shinawatra an ram Economic Adviser ih an ret ruangah an karlak boruak hi a se sinsin ih, Cambodia Cozah in himi thu an puansuak rualin Thialand Cozah cun  Cambodia ramih an palai retmi cu an kokir salcih ih,  Cumi veten Cambodia Cozah khalin Thailand ramih an palai retmi cu an kokir salcihve.

Japan In Afghanistan Bawm Nak Pe Ding

Japan ram Cozah cun  Afghanistan ram cu US dollar Billion 5 bawmnak a pekding thu Mizansunah a puangih Afghanistan ram bawmnak pek a tum vivo thu khal a sim, Japan hin Afghanistan ramih misual Tapung pawl donak ihsin a hnukdawk aw nan  Afghanistan ram mipi pawlcu sumpai ih tanpi vivo a tum.
Hi bawmnak sumpai a pekding mihi kum 5 sungih pekding a siih, Afghanistan ram mipi pawlin kut hnattuan thlai ciciin dan zirnak leh, Tapung pawl Cozah kutih pelut aw pawl hrangih an nunnak lamzin hawlsak nakding pawl hrangah a si,
Japan ram Cozah in Afghanistan ram sumpai ih a bawmnak dingthu a puangfel zonan  sumpai hmandanding thuhla hi  an ram Prime Minister, Yukio Hatoyama leh US President, Obama in tuikar tlawngkai ni 5 ah khin Japan khawpi Tokyo ah an reltlang salding.

Suu Kyi Suah Tum

Burma ram Foreign Ministry Director General, Min Lwin cun  Aung San Suu Kyi cu  hna kumih Burma ram hrilawk nakih a tel thei ve nakdingah  lengsuak theilo ih hrem a si nak ihsin suah zalen a si ding tiah a sim.
Tui naite ih ramdang thu neitu pawlin ralkap thu neitu pawl an ton ruangah Aung San Suu Kyi cu thlah zalen a si ding a ti, Asi nan ralkap Cozah in Aung San Suu Kyi ih suah theinakding lamzin a tawlrel rero laiih, ziangtik ah a suak ding timi a ni leh a thla cu sim theih a silo a ti.
(Visited 42 times, 1 visits today)

Comments

comments

Comments

%d bloggers like this: