Leiram Laksak Tuartu Pawlin Mih-kyaung-kan Tapeik Sakhaan Din; Duhnak Langterih An Dilnak Cu Thuneitu Pawlin An Relsak Lole Titoih Puai laifang Khalah Lamzawhnak Nei In Dil Ding

Lamzawh April 7, 2014

Ralkap pawlih an laksakmi leiram pawl ngah sal ding hrangah Town Hall velkualin duh langternak an neihmi cu April 6, 2014 sunah hmuh a si. Yangon khawpi Town Hall hmai ih Mahabandula parduum kiangah leiram laksak tuarnak thu thawn pehparin Tapeih sakhaan an ongih duhnak langterin dilngennak neitu Mih-kyaung-kan mipi pawl cu thuneitu pawlin an thuhla an rel felsak lo asile Tingyan sung khalah duhlangterin dilngennak an neih peh vivo ding thu duhlangternak ih tel mipakhat hnen in theih a si.

Atu tiangah thuneitu pawl hnenin thufel zianghman relsaknak, tuahsak dingih thu theihternak khal a um hrih lo ruangah leiram lon a tongtu pawl cu Tapeih sakhaan ong tahratin duhlangternak an neihnak a si. April 5 sunah mipi hruaitu Pi Suu Kyi ih inn hmaiah leiram lon an tuarnak thui le an tuarnatnak thu pawl sim theinak caan ttha ngah beisei in an va thlen thu khal theih a si. Asinan Pi Suu Kyi cun a harhdamnak a tthat tuk lo ruangah a rak tong thei loih a dam tthat ngah hnuih Mih-kyaung-kan committee panga pawlthawn tonawknak a neih ding thu thulehnak a rak tuah.

“Acozah lamih ttuanvo neitu pawl hnen in Tingyan hlanih thuhla relsak ding in tum thu in rak sim dah. Curuangah Tingyan hlan sung cu kan hngak hrih ding. Cumi ih in rak relsak cuang lo asi ahcun Tingyan sung khalah duhlangternak kan nei ding si ko. Kanmah lam dinhmun in Sea Game sungah Tapeih Sakhaan ongin duhlangternak kan neih ttum khalah Rampi hmel a balter ding tiin thuneitu pawlin in rak dilih kannih khalin theihthiamnak thawn kan sakhaan kan phitsal. Kannih mipi pawl cun ram hrangah kan zoh thiam ko nan rampi uktu acozah pawl cun duhlangterin dilngennak neitu kannih mipi pawl hi thupi ah in ngaisak lo” tiin duhlangternak ih hotu U Sein Tan cun a sim.

Hih ralkap pawlih an laksakmi leiram pawl ngahsal dingnak hrangah Tapeih sakhaan ong-in duhlangternak, dilngennak an neih hlei ah nitinten zanlam kau ah Town Hall velin Kyauh Tatta Myo sungah au le kio in duhlangterin lamzawhnak an neih thu theih a si.

Tapeih Sakhaan ong-in duhlangternak neitu pawl le ramtthen acozah ih ttuanvo neitu pawl, hluatdaw palai pawl cu Yangon khawpi Town Hall ah Aprl 1 ni ah tonawknak an nei zo nan khatlam khatlam remdaihnak an tuahaw thei lo ti thu khal theih a si.

Written by:
Wei Lin Aung & Aung Kyaw Htet
Eleven

Comments

comments

Comments

%d bloggers like this: