LEILUNG CU KA NEH ZO

LEILUNG CU KA NEH ZO

Ro Khar Thang

Joh. 16 :33.

“Leilungin harsat tuarnak a lo pe ding. Sikhalsehla nan ral tha uh; Leilung cu ka neh zo” ti ah a ti.

Thuhmai : Bawi Jesuh Khrih ih nehnak cun leilung tlun ah minungin kan ton thei mi harsatnak phunkim, natnak, thihnak, tah le mitthli tlknak, pam le rilrawn aihramnak hmuahhmuah cu in neh sak thu a phuan mi a si. A neh hrih lo mi ziang hman a um nawn lo tiah in sim. Neh zo mi par ih ding, feh le tuan mai ding kan sinak thu a sim duh mi a si.

1. LEITLUN IH A THLENG THEU MI HARSATNAK LE SIATRALNAK PAWL-

a). Biaknak ruangih a ra thleng thei mi harsatnak,

b). Ralpi, le do awknak ruangih hatsat nak,

c). Thlisiahrang le Linghnin ruangih siatral nak,

d). Natnak hrisiava tuar ruangih thihhlohnak,

e). Hlawnthil le ro, in le lo neih lo ruangih mangbang harsatnak,

f). Midang kuthnuai ih zonzaih retheih tuarnak,

g).  Mah le insungsang ihsi rung suak mi harsatnak phunphun,

h). Khrih ih dung kan thlunnak ruang ih ra suak mi harsatnak pawl,

i). Thihhlohnak le thlankhur thuneihnak  ruangih tihphan le harsatnak, ti in phunkua ah rel a theih ding.

 

2. A TLUN LAMIH SIATNAK LE HARSATNAK  SUNGIH THLAKAMNAK THU.

* Johan. 14:27. “Nan hnenah hnangamnak ka lo tanta. Kei mah ih hnangamnak ka lo pek a si. Leilung  mi ih pek vekin ka lo pe a si lo. Donhar le vansang in um hlah uh; nan thin khal phang hlah uh” in ti.  (Jesuh Khrih le dungthluntu pawl cun harsatnak ra thleng mi pawl cu an kut sungah an fekten an kaihrem sawn ih an hrangih thathnemnak petu hriamhrei tha ah an hmang sawn theu).

* Minung, ramsa, thlaihnah thingkung hrampi pawl cu sinak bangrep pawl lawng hmunkhatte ah   an nung tlang thei. An thangso thei.

* Khristian, Pathian zumtu pawl cu a bangaw lo mi sinak le dinhmun khalah le dawnkhamtu a phunphun lak khalah, cak lo tawntaihnak, hrem le vuak le velh tuarnak lak khalah Kross thilti theinak(caknak) huham thawn caknak thazang thar nei in an thangso vivo theu.

 

3. ZOHTHIM TLAK-

a). Tuluk ram ih nunau nute pakhat cu a sentet laiah amah umtu( kilkhawitu) ih fel lonak ruangah  a umtui zaang par ihsin leiah a tla ih a eel a kiak. Asinan a hung upat tikah beidong duh cuang lo in thaten ca a zir, bible a siar thei ih, a umhmun ihsin thuthangtha simtu ropi zetah a suak thotho.

b). Ram pakhat ih Missionary sungkua pakhat cu, an fate 3 le nu le pa an thah ruangah an fa le 2 cu an tlan suak. An ramah an tlung ih bible tlawngah Pathian thu thaten an zir ciamco ih an hung upat ih zirnak an theh hnu ah, an nu le pa, an unau thattu pawl ih hnenah feh in Missionary an va tuan thotho ih hlawhtling zet  in Pathian in lam a hruai.

c). Australia fala, pathian thusimtu 2 an thah hnu ah a hringtu nu kum 65 kim zo cu duaice lo’n a fanu an thahnak hmun rori ah feh suakin Pathian Thuthangtha a tlangau pi thotho.

Thu kharnak: Nehtu si  theinak in petu Khrih Jesuh zohin, kan ton mi harsat mangbangnak le, tuarnak phunkim hi a net tiang ih do ngamtu kan si a tul. Cathiang sungah khal “Harsatnak na tuar ding mi kha zianghman tih hlah. Ngaihnik! Satan in a lo hniksak dingih thenkhat cu thawngah thlak nan si ding. Cule nan harsatnak cu nihra a rei ding. Thihnak tuar ding a si hmanah ka hrangah rinsan tlak in um uhla nan neh man ah NUNNAK SUILUKHUH ka lo pe ding” ti ah in sim.(Thup. 2:10)

Nehnak kan co zo mi le kan neihcia mi hi kan hmannak ding hmunah kan hmang ngam lo theu pang maw? Neh theih an si lo ding tiah tih le zaamtu Israel palik hrekkhat pawl Kanan miphun pawl do ngam lotu vek kan si pang maw?

Na hmuh na ton mi siatnak pohpoh hi a tha zawngih zoh le hmang thiamtu, cui hmun ihsi nehnak cotu si thiam dingah Thianhthlarau in lo hruai vivo hram seh.

Amen.

 

***************

 

(Visited 36 times, 1 visits today)

Comments

comments

Comments

%d bloggers like this: