Leilet Kan Thar Suah Tam Tir A Tul

Burma Ram Feh Dan Ding Part XVI

Dr. Runbik Taithio

Kan lo/leilet kan thar suah tam  tir a tul

Leitlun ram ah heavy industry nei si lo, lo neihnak le tilva zuat  ih ramlianbik lak ih tel ban cu Denmark le New Zealand ram 2 hi an si. Switzerland khi cu a phun dang deuh. Kan Laitlang in siseh, Kawlrawn in siseh kan economic dinhmu tihsan ding cun kan tilva vulh le, kan leilet lo ih buh le bal pawl kan thar ti tam thei a tul ding. Kan dung Burma Feh Dan Ding Part XV ah khan China vek thawi thim cun kan nih cu leiram kan neitam tuk lai ti kan ngan.

Kan dunglam kum 40 lai ih ka rak siar mi a si. Burma ah fang (paddy) acre 1 ah tang (basket )50 a suak an ti. Culei fangah Japan ah cun acre 1 ah tang 180 an thar tir thei ta riai. Tulai fangah China in India hi economic field tampi ah a hleih ih cutawkah farming khal ah China in India a hleih nasa. Buh bal thar nak ah acre khat ci cio ah China cun India hnak in let hnih le a hrek tluk in an thar tam tir thei.

Kan Laimi hi 70% hrawng cu tilva zuat le lo le leilet i hnatuan kan si ding ih kan nuntu khawsakdan kan tihsan duh cun kan thlai tharpawl kan thar suah tir tam thei a tul ah a cang.

Rajiv Gandhi le Aung San Suu Kyi

Rajiv hi 1944 ah a suak ih Suu Kyi hnak in kum 1 in a upa. Suu Kyi nu Khin May Kyi hi Burma a cozah in 1960 ah ram palai ambassador sinak pe in 1960 ah India ih New Delhi ah an um tir. Cunah cun Suu Kyi cu kum 15 mi lawng a si. Suu Kyi hi Delhi ih high school thabik pakhat Jesus and Mary (Catholic school) ah le India ih college thabik pakhat Lady Sri Ram college ah a kai. 1964 ah England ih Oxford ah college kai ding in a feh.

1964 hlan ah hin Suu Kyi le Rajiv hi an tongaw maw ka thei lo. Tu nai te ah Suu Kyi i thuanthu bu 2 an suah nan ka hmu hrih lo. Nehru tunu le Aung San fanu cu diplomatic function vek ah rak tongaw awm tak. A sinan ka zum dan cun Rajiv le Suu Kyi tha tei an theih awk cu Suu Kyi le Michael Aris an neih awk hnu ih Rajiv ih pu Nehru a thih hnu, Rajiv nu Indiara Gandhi i Prime Minister a tuan lai, Suu Kyi tei nupa Bhutan lal pa i adviser an tuan lai hrawng ah a si ding.

Kan dun ah kan ngan zo. Rajiv Gandhi kha India PM sinak in November 1987 ah Burma ah a tlawng. Cumi hnu thla 9 thla 10 ah Burma ram mipi cun democracy run duh in ralkap acozah an run do. Himi tum ah Rajiv ih ho India cun Burma ih democracy duh tlawngta le mipi pawl kha theih tawk in a rak bom a si.

Hmar Mizo pakhat  ca ngamthiam  L Keivom cu 1988 ah Rangoon i Indian embassy ah 2nd. secy. sinak in mawsi officer pakhat a rak tuan ih lehhnu i a rel an ti ka theih mi ah cun India embassy ihsin democracy duhtu mipipawl cu an theih tawkin an rak bom a ti. Khati lai na nana ahcun All India Radio cu BBC le VOA hnak hman in Burma mipi tan in ralkap acozah a rak kap na theu a si. Delhi ih All India Radio ih si ralkappawl rak tuah theutu pakhat, a pawimawhbik cu Burma Prime Minister hlun U Nu i fanu Than Than Nu a si.

1988 lai ih Burma Democracy lamtangpawl raktantu India kha khami hnu kum 4/5 ah Rajiv Gandhi thih hnu ahcun ralkap acozah a run tan ta emem a si. A hlan ih Burma democracy an rak tan nak san khan Nehru Gandhi tei sung le Aung San tei sung rualthat duhdawt awknak ruangah a si a ti theih lo ding maw?

(Visited 46 times, 1 visits today)

Comments

comments

Comments

%d bloggers like this: