Leh-rulhnak Tha

Berlin ram an tthenawk laiah an sim ttheumi thuanthu pakhat a um. Nisuahnak lam Berlin cu Communists uknak hnuaiih um an si, Nitlaknak lam Berlin cu mahten ukaw, zalen zet an si. Ttumkhat cu ziang thuthokin si maw Nisuahnak lam Berlin ih um, mibur hrekkhat in hnawmhne le thilsiava cu bawm sungah thun tahratin, cuvek bawm tampi cu truck(mawtaw)pi thawn Nitlaklam Berlin ah an hei kuat.

Nitlaknak lam Berlin pawlin cumi an rak dawngih a sungih hnawmhne sia pawl lawnglawng an hmuhtik ah an thin-aithok zetih, baalbawm pawl cu heikuat kir dingin an um lawk. Asinan cutin hei lehrul ve ding cu ttha an ti sal lo. Cuaiah lehrulnak ttha thawn lehrul dingin le Communists kut hnuaiih umpawl bawm sawn dingin thutluknak an tuah sal. Cutin annih cun bawm sungah ei-theih thiltha a phunphun le ei-in siat har deuhmi thilfun tivekpawl hmangin an hei lehrul sawn a si. Cui bawm parah hitin ca an nganta “Pek ding kan neihmi thil cu kan pe aw veve a si”tin.

Hi thilcang thu vun ngaihtuah rero tikah, Nitlaknak lam Berlin pawlih lungput zohtthiamtlak zia kan hmu thei. Anmah camriam vekih thiltha lo pek an si laiah anih cun an neih thiltha thawn lehrul sawnin thlawsuah lamzin an sialsak sawn. Hivek lungput nei ding hi tuini ah leitlunin a hal ttiattia asi. Hmun kipah lehrulhnak thalo hmuh ding a tam vivo. Kan ram sungih doral mei a mit ngaingai thei dah lo khal hi lehrulhnak ttha lo thawi lehrulhawk vivo kan tum ruangah ti sehla a sual lo men ding. Khatlamin remawk lonak mei a run muahmi cu khatlamin rak mit-ter loin a rak sem nung sinsin ih cutin doral mei cu a hlio ve vivo. Acak sawntu in caklo sawn kha a nekrawk tikah caklo sawntu khalin tikcu remcang bawhin a rak pel khiokhi ve. Cutin rualremawknak cu a hla sinsin.

Innsang khalah pasal ih phunhrannak nupi in a rak el ve zutzo tikah kheng le kho tiang in a tuar phah. Cuvek thotho in nupi ih phunciarnak pasalin a el ve tikah vuak velhawknak tiang a thlenphah ttheu. Thil tthalo cu thil tthalo lala in a lehrul tikah thil bese sinsin a suak. Ziangruangah saw aw hro siakha zetih in hrotu pawl hnenah aw hro sia zetih kan rak lehrul duh ttheu? Kanmai mawhnak um lo cingih in camriamtu khi kan ngaimawh ding asi lo.

Thil tthalo in petu hnenah thilsia kan pek ve ah cun anmah lala thawn kan bangaw ding. Aw hrosia thawn in hrotu kan rak hro ve asi ah cun a mizia tthalo kan ttawmpi ve tinak a si ding. Midang ruangah na sungih thiltha cu thil thalo ah cangter siang hlah. Judah pawl ih thufim ah “kan tongkam cu thla nei in a zam vivo ih a netnak ah kan mai parah a ra fu sal” timi an nei. A umzia cu kan tongkam ih rah cu a sia maw a tha maw kan mah in kan ei sal ding tinak asi.

Kan dung baite ih saya Jessie ih status tarmi ka duhzetmi cu “Lam ka leng niakno lai kha zin kapih uico in ‘Bo Bo’ i rak ti. ‘Bo Bo’ka vun ti ve. Ekhei!! Uico tlukfang ah ka suak si lo sawm?”tin an rak ngan dah. Milai in uico cu a bo ve ah cun uico dinhmun vekah a cang ih cui milai ih zahumnak a nepter. Cuvek ciah cun kan mah in botu tapoh hi kan bo let ve tum ah cun anmah thawn kan nep zia bangaw ding. Winston Chruchill khalin “Na lamzin zawh laiih a lo bo-tu uico pawl hmuahhmuah khi lungto thawn deng vivo na tum ah cun na feh duhnak hmun na thleng thei dah zik lo” tiah a rak sim dah.

Online ah si maw, hnatuannak ah si maw, hmun dangdang ah in dodaltu le aw-hro siakha zetih aan sia in fahtu pawl hnenah anmah vekin ansia thawn lehrul ve ding kan si lo. Thiltha kan neihmi hmangin lehrulhnak tha thawn kan rul sawn ding asi. Thingkung thalo cun rahttha a rah dah lo, thinkung tha lawngin rahtha a rahsuak. Thingkung thalo ruangah thingkung tha cu rahsia a rah ve ding a si lo. Phuba lak tumin lehrulhnak thalo thawn in dodaltu pawl lehrul salih tikcu heu rero dingah kan hringnun can tawite hi a uium tuk.

(Visited 109 times, 1 visits today)

Comments

comments

Comments

%d bloggers like this: