Lebanon Ihsin Israel Kap

by-Pasum
January 9, 2008.
Lebanon Ih Sin Israel Kap
Israel cun tihni zan zanvar in Gaza khawpi cu a kap rero ih. Hamas pawih hmun pawimawh vawi 60 lenglo Bomb a thlak. Himi laiah Labanon ih sin Israel ram saklam cu Rocket in vawi 3 an rakkap ve ih . Himi hi Israel khalin an kaplet cihve tiah Israel ralkap thu puangtu cun a sim. Lebanon ihsi Israel an rakkah ruangah Israel in Gaza a siim nak hi a luar deuhdeuh thei tiah zum asi.  BBC in a simnakah Lebanon ihsi Israel an rakkah ruangah himi buainak hi a sosang sinsin thei asi tiah a  sim.
Israel nitin thuthangca pakhat Haarretz cun Lebanon ramih si kahmi Rocket cun Israel khawpi pakhat, Haifai khawpi saklamih, Nahariya a kap ngahtiah a sim. Himi hmunhi 2006 ih Israel leh Hezbollah pawl an do awk laiih Hezbollah pawlin Rocket ih ankah ttheunak hmun asiih  Cu ruangah Israel pawlcun himi Rocket kaptu cu Hezbollah pawl an si tengteng dingtiah an sim.Asinan himi Rocket kaptu hi Hezbollah leh ziang pawl danghman in an kahmi ah an rel langlo.  Himi laiah Israel cun Gaza cu nasa zetin a nawr sinsin ih. Gaza City thlanglam kap ah Israel ralkap pawlhi an lut thluhzo.  Egypt leh Gaza rit awknak  Hamas pawlin Egypt fehtlangih ralthuam hriamnam an lakluhnak leilung sung lamzin khal an bomb siatsak thluhbetzo.
Israel ralkap pawlhi Tank rualthawn Kisufim ramri, Kanna, ihsin raldo nak vanzam in tlunlam ihsin a kil vivo ih. Tu ah hin Israel vanzam pawlin, Rafah khawpi ah ca tamzet an thlak reroih mipi vangtlang pawlkha an in leh lo suahsanih hmunhim lamih thiar awsuak dingin theihter nak an pe.  Pope Benedict cun Israel in  ni 12 sung Gaza a kahhi cu bangthlang sehla a duhthu a simih. Mipi vangtlang thisen suak tamtuk leh nunnak cemtamtuk cu pawi ati thu a sim.  Israel leh Hamas pawlcu remnak tuah tlang dingin zo veve khal sup aw hram dingah a ngen.  German cozah cun Gaza cu tuidin hmunah Juda mipawl sal vekih an retkhawmnak Concentration Camp a bang vivo a ti.  Himi laiah Israel cun Gaza a sim nakhi bansan a duhnan Hamas pawlin Rocket hmangih Israel an kah ringring mileh Egypt fehtlangih ramdang ralthuam hriamnam an lakluh ttheumi an bansan a ttul asi ati.Gaza bialih mipi pawlin nitin thilttul mi lakluh nakah  nikhat sungah nizi 3 sung Gaza an kahnak hi an cawlhsan ttheu ding..
Russia In Ukraine Gas Ruk Puh
European Union palai pawlcun Russia leh Ukraine Gas Supply cungcangih an hmuh thiam awklo nakcu rem dingin theitawp an suah rero lai. Russia ramih Gas Company umsun Gazpom hotu, Alexei Miller, leh Ukraine  State Gas Company hotu, Oleh Dubyna cun  an karlak buainak relrem dingin European Union hruaitu pawl an hmuh dingih.
Russia cun Ukraine cu an ramsung fehtlangih Gas Pipeline tumpi sungih sin Gas ru ttheu ah a puh ih  Gas an leinak man tampi peduhlo ah a puhbet. Himi ruangah Russia cun kandung zarh khat laiih sin Ukraine ramah Gas a kuat lut duh nawnlo ih Cu ruangah Ukraine ram fehtlangih Gas lalut tu Europe ram tamzetcun Gas ah harsat nak nasazetin an tawng rero lai.
Relzo vekin Europe rampawlin Gas an hman mihi 25% cu Russia ihsin Ukraine ram fehtlangih Gas Pipeline tumzetih an lakluhmi asiih. tu ah cun harsat nak nasazet an tawng asi. European Commission President, Jose Mannel Borroso  cun Russia leh Ukraine cu Gas hmangih Europe ram tampi harsat nak tuahtum ah a puh lehih  rem awknak tuah zang dingin leh Gas laknak lamzin khal ti tlang zang dingin a nawr. Russia leh Ukraine ramri ih Gas hlo zohfel tu ding mithiam khal thlah dingin a tiam.
US Vice President Thar Joseph Biden In SawiSel
US President thar Barack Obama in Senate Intelligence Committee rawn hmaisa talo ih CIA Director dingih, Leon Panetta a ret maicu Vice President thar Joseph Biden cun a sawisel ih. Senator Biden cun thuthang latu pawl hnenah  Obama in himi cu a tisual pang asi a zumthu a sim. Joseph Biden cun  a mahcu Vice President si hman sehla  Senator a si lai ruangah ziangkimih a thuruah micu Senator ngaigtuah nakih sin a lakmi asi thluhlai tiah a sim.  Joseph Biden hi tuithla ni 20 ihsin Vice Presidnet ih lakluh asi dingih cumi ihsin Senator asi nak hi a bansan dingih tu ah cun thu neihnak sangzet neitu Senate Foreign Relation Committee Chairman asi lai.
US In India Bawmtum
US cun nikum Navember ni 26 ih Mumbai khawpi buainak ruangih US minung 6 thiih midang 200 zikte thihnak suakter tu  misual pawl zingzawi suak dingin leh misual pawl hremnak dingah US cun India a bawm dingtiah a sim.  Hi thuhi Federal Bureau of Investigation (FBI) thupuangtu cun News Agency a sim.  US cozah dan vekin US minung thattu cu US cozah in hremlo ih suah men dingcu rem atilo ding atiah a simbet. Asinan himi thu buai zingzawi nakih a hmuhsuak mileh a theimi um  khal sehla India ram sungih thil thleng asi ruangah US in a theimi leh  zinzawi suakmi thu Charsheet  a tuahmi pawl leh misual hrem danding thu ah cun  India cozah thil timi cu a ringcih ding. Misual hawlsuak nak dingleh hremnak dingah cun US cun India a bawmding ih US cun a ram minung thattu cu khuitawk hmun leh khuitawk ramkhalah a dawi vivo ding a ti.
Himi laiah Pakistan cun an National Security Adviser, Mehmood Ali Durrani cu a hna  ttuan ttha theilo ah puh in an bangter. Pakistan Cozah cun nikum Navember 26 ih Mumbai buainak ruangih India leh Pakistan ram hnih karlak khingkuai tum vivo cu Durrani in Cozah hna ttuandang hna ttuanpi ttha lo ah leh a mai kuanglo nawrah an puhbet ih  a hleice in humhim nak lamah Politician pawl thu relpi dahlo leh thurawndah lo ah an puhbet.
Durrani banhlan zarh khat ah  Pakistan cozah cun mumbai buainak tuahtu misual 10 lakih a nungdamih kaih ngahmi umsun Ajmal Qasab an rammi asi tiah an puangfel zo ih.Qasab hi can reipi sung Pakisrtan hin a rammi ah a pawm duhlo ih. Asinan FBI leh India Intelligence pawlih thu zinzawi nakih sin an hmuhmi thil fiangzetih theih suahnak a um raungah Pakistan khalin a pha thei nawnlo ih. Pakistan Foreign Minister Sherry Rehman cun Ajmal Qasab cu Pakistan ram leilung mi diktak asi tiah a puangfel. Cu mirualin National  Security Adviser Mehmood Ali Durrani an banter nakhi Pakistan cozah in a hmai phiahfai a tumnak asi tiah zum asi.
Tikcucan hmangdik hram aw nikhat sungah nazi 24 a umih nazi 8 sung hna ttuan awla nazi 6 suminute 15ng it aw, nazi 3 sung casiar awla,  tetal thla cam aw, Tikcucan lawng nanei tampi lai..
(Visited 55 times, 1 visits today)

Comments

comments

Comments

%d bloggers like this: