Leadership Training Kan Nei Ding

HRUAITU SINAK

Leadership tih um zia hi theifiang vek cu kan bang na’n relfiang ngaingai ding hi cu thil harsatak a si. Mi thenkhat in an sim theu mi pahnih in tarlang hnik sehla…

1.         Leadership cu mipi pawl hmang ih thil ti hlawhtlin daan hi a si. Hruaitu cun mipi hlawhtlinnak dingah anmah mipi tha sor ih lak thiam a tul an ti.

2.         Leadership cu mipi le tikcu caan, zumnak, ruahnak, hruaitu dinhmun le thildang ruahmannak thiamtak ih lakkhawm ih thilti hlawhtlin hi a si an ti.

* Hruaitu in hmanrua a phunphun le a dangdang lakkhawm a tul zia a tarlang.)

* Mihrekkhat cun hruaitu cu mipi pawl an duh lomi tuahter ih cuih an tuahmi cu ngaina ko ih lungput neiter hi a si an ti.

* Hruaitu kan timi cun a mipi pawl a hruai ih a dung in mipi pawl in an thlun, mipi khal hruaitu parah an thum aw.

1. Hruaitu in a tanglam vekih sinak a neih a tul

(1)        Mipi,  Kawhhran le ram duhdawt taktak thleidannak nei lo a si a tul.

(2)        Mipi hnak ih theihnak le hmuhtonmi (experience) neitu si a tul. Cu lo cun mipi pawl fehnak  thei loin a hruai pang ding.

(3)        Hruaitu cun tumtahnak le summang (vision) a neihthat a tul. (Thuf. 29:18)

(4)        Hruaitu cu Milaw, mi taima (tuan taktakTu)si a tul.

(5) Hruaitu cu hnatuan dingmi hlawhtlinnak dingah Mipi thatho dingih tiphur thiam a tul.

(6) Hruaitu cu mipi thawn nelaw tak ih pawlkom awknak neih ringring a tul.

(7) Hruaitu cu mi tirhsiang (pe siangtu) si a tul.

(8) Hruatitu cu a um lo caan ih a ai-awhtu ding amah vek mi a sersuah a tul.

(9)        Hruatu cu tikcu dikzet ih hmang thiamtu le  (soiselnak a phunphun)tuarthei tu  si a tul.

(10)Hruaitu cu diknak (thudikah) ih mi raaltha a si a tul. Miih ti daan thlun vivo men hruaitu cu  mi a ti buai. Thuti tluknak tuahngam lo a siih hruaitu si a tlak lo.

(11)Hruaitu cu thinsauzet ih thuruat thiam le beidong maimai lo a si a tul.

2. HRUAITU THU NEI DUH

1) An thu an duh ih midang thu an ngaihsak lem lo.

2) Anmai ngaih daan lawng a thabik ah an ruat.

3) Amai’ thu thluntu lawng an duh ih an thu a eltu cu raal vekah an ruat.

4) Midang ih thuron pek an ngaisaang lo.

5) Mah hnak ih niam deuh thawn kom-awk an duh tuk lo.

6) Hlawhtlin lo le anmai’ thupek vekih fehpi lo ruangah an ruat.

3.         MIPI HRANG RUATTHIAMTU HRUAITU

1) Mipi pawl ih ngaih daan le rem theihnak a hmang tangkai.

2) Mipi pawl thu ti tluknak le ruahmannak a ngai poimawh.

3) Thu titluknak a tuahmi mipi a simfiang ih member lam siin thuron peknak a lungkim pi.

4)A kutthuai pawl an hna an thiam ti a theihfel hnu cun zalentak ih an hnatuan ding zin a sial sak.

5) Thil thar thatha a ruatsuak theu ih thil hlun a tikelmi thleng poi a ti lo.

6) A huho ih thil ti khawm hi hlawknak a si ti a theifiang.

4. hruaitu laLnak thinlun le siahhlawh thinlung nei pawl:

Bawi Jesuh in zohthim ding thatak in taan mi a um (Filip 2:5). Hruaitu hi lalnak thinlung le siahhlawh thinlung nei kan um.

Lalnak thinlung nei pawl: Siahhlawh thinlung pawl:

1. Amah le mah a zum-aw ih a rinsan aw.                  1. Pathian a rinsan.

2. Amai’ duh daan le ngaih daan hi thabik ah a ruat. 2. Pathian ngaih daan thawn a khaikhin aw.

3. Amah in thu ti tluknak a tuah mai theu.                 3. A rualpi ih duh daan a thlirthiam.

4. Thu pek (Order) hi nuam a ti.                                 4. Pathian thuawih a lungawi pi.

5. Mi bukpak thatnak a hawl.                                     5. Pathian le minung a duhdawt.

6. Mahte din nuam a ti.                                               6. Pathian thawn um tlang le hnatuan tlang                                                                                                                                nuam a ti.

5.         BIBLE ih hruaitu hlawhtling le tlinglo khaikhin nak

DAVID                                                                                 SAUL

1. Pathian a rinsan.                                          1. Amah le amah a rinsan aw.

2. A thinlung takin Pathian thu a ngai         2. A lenglam raithawinak a uar.

3. Pathian lungtawng si a duh .                       3. Amah thinlung duhzawng in Ram a uk.

4. Pathian duhzawng a tuah.                           4. Tisa duh daan in a nung.

5. Tangdornak thawn Israel ram a uk.                        5. Thiamnak, Cahnak, Fimnak a rinsan.

6. Pathian naih sinsin a duh.                           6. Pathian hnen in a tlan.

7. A tuah dingmi Pathian a rawn ringring.      7. A thil tuah dingmi ah Hnam-nei le Dawi-

thiam pawl a rawn

Baibal ih Hruaitu hlawhtling pawl: * Moses *Joshua *David *Solomon *Jehosaphet *Joshiah.

ROREL DAAN

Thulut (Agenda):

I. Thu rel dingih thulut: Kawhhran rorel daan, general, combine meeting agenda pawl cu Kawhhran daan vek rori a ra lutmi lawng pom ding a si. Thurel lai ih ti lo theih lo thupoi thu karlak tla lawngte Palai ih rem ti tlannak lawngin agenda ah pom theih a si.

* Local church pakhat dinhmun in zoh sehla…

1. Meeting netabik ih thu taanta mi agenda pawl.

2. Pawlpi hnen in suahpi mi agenda.

3. Nubu hnen in suahpimi agenda.

4. Mino hnen in suahpimi agenda.

5. Sunday School hnen in suahpimi agenda.

Meeting pi tikcu thokhlan ah agenda lakkhawmmi pawl cu OB pawl in meeting Palai pawl  theihter theh ding a si.

II.        Meeting caan ah mai’ rawtmi (thawhmi) kalhzawng in thu rel a theih lo. Rawtnak neitu le a   bawmtu in anmai’ rawtnak le bomnak si lo rawtnak dangah vote a pe thei lo.

III.       Mi pakhat in a mai’ rawtmi kha a sir-aw saal ih suhsaal, ti danglam saal a duh ahcun relkhawm (meeting) neih hlan ah suh saal a dil in a ti danglam thei. Asinan a bawmtu ih lungkimpinak a tul.

IV. Thu rellai ih thinheng: Meeting lai ih bulpak huatzawng le daan kalh zawng ih tongkam hmang thinheng pawl cu Chairman in a dawn (kham) ding a si. Chairman ih thu a ngai lo asile mipi vote  lak ih thu rel thei lo le vote pe thei lo ih kham ding a si.

Ro rel khawm daan

I.          Relkhawm thok daan: Ziang thu khawl siseh, rekhawm dingmi thu cu mipi hmai ah siar suah   ding a si. Siar suah a si hnu ah Chairman in relkhawm tikcu a on hnu lawngah rorel theih a si.

II. Relkhawm caan hman daan:

1.         Thu pakhatkhat rel ah mi pakhat in tumhnih hnakih tam rel lo a tha. Tumkhat ah minute 5   hnak ih rei rel lo ding.

2.         Chairman in amai’ thu in relkhawm caan a khar mai thei lo. Mipi thurel lai a dawn in a  colhter thei lo. Huatsuak ih mi tibuai a si lo ahcun.

III. Relkhawmnak ti tawp: Thurel lai relkhawmnak a rei thlang ih ti tawp duhtu an um ahcun Palai  zokhal in titawp rawt theih a si. Relkhawmnak a tawp deuh tikah Chairman in vote lak kan man  maw a ti ding ih zohman an ding lo asile relkhawnak titawp a si tiin a phuang dingih cuihhnu ah  rawtmi feltak in a phuansak ding ih vote a lak sak ding.

Hminsin:  Chairman, Secretary, Treasuere, Finance in mai’ hnatuan mi  mai dinhmun cio theih a   tha. Culole mi hna mai kuang lo nor pangnak a si. Cumi cun pawl le kawhhran buainak a suahpi theu.

By … Rev. Nehemiah Sui Nei Piang

(Visited 51 times, 1 visits today)

Comments

comments

Comments

%d bloggers like this: