LAMZIN DANGAH

Lamzin Dangin

Rev. Run Cung Mang (LCF Malaysia)

“Cuih Arsi an hmuh saal tik ahcun an lung a awi ngaingai. An hmai ah a feh vingvo ih naute umnak tlun ahcun a cawl. Inn sungah an vung lut ih naute cu a nu Mary thawn an vung hmuh tikah an khuk an bil ih an biak. An laksawng kenmi sui, frankincense le mura zihmui an suah ih an pek. Cule mifim pawl cu Pathian in an mang ah Herod hnenih kir saal nawn lo dingin a sim ruangah lamzin dangin an ram ah an tlung.”

– Matt. 2:10-12

Thuhmaihruai:

Lamzin kan ti tikah kan mitthlaam ah a phunphun in a cuang ding ti ka zum. Kan umnak ram le khua ih zirin Lamzin khal phunkim a um ding. Lamzin naal le tthazet tla a um dingih lamzin sukso, bingbo le korkiak le horkuam tla a um ding. Rundamtu Jesuh Khrih a suahlai ih Nisuahnaklam mifim pawl ih fehnak lamzin tluan ka ruahsak tikah a hla ngaingai ih a cungkimzet ding ka zum. Asinan a thupimi cu “lamzin dangin” timi zawnte hi a si. Jesuh an hmuhton hlan ih an zawhmi lamzin le Jesuh an biak ngah hnu ih an thlunmi lamzin a bang nawn lo. An thlarau nun, an thinlung put, an thluak khuaruah daan le an taksa ruangpum rori ih an fehnak lamzin a bang nawn lo, a thlengh aw, a danglam. An nun daan lamzin a dang. Khrismas hi lamzin dangtertu a si.

1. Nu thianghlim Mary ih Nun daan lamzin dang

(Luke 1:26-56)

Khrismas ih thawtnak le thlumnak tep ngah hmaisabiktu hi nu thianghlim Mary a si. Thinlung thianghlim le nunnak thianghlim neitu fala him Mary cu Pathian in a hril ih Rundamtu suahnak ding hmunah a tuah. Ruah sak tikah pasal nei hrih lo naupai ding ti cu Mary hrangah thil harsazet cu a si ding. Duhtu tlangval Joseph nei ve fala rori pasal neih hlanih nau vun pawi ding cu ruah tikah celh a si lo. Joseph thawn tthi aw dingih thukamnak a neimi fala hnenah vancungmi cu a ra ih, “Na parah daihnak um ko seh! Bawipa na hnenah a um ih thluasuahnak tampi a lo peek a si,” tiah a a ti. Cuih vancungmi ih thusimmi a theih tikah Mary cu a don ahar ngaingai ih a ttongmi ih tican cu ziang a si pei tiah mangbang in a um.

Cutikah vancungmi in, “Mary, ttih hlah! Pathian cu na parah zaangfahnak a nei a si. Fa na vun dingih fapa na hring ding. A hmin ah Jesuh na sak ding…” ti ih a sim tikah Mary in, “Kei cu fala him ka si. Cubangtuk cu ziangtinso a si thei ding?” a ti. Vancungmi in, “Pathian ih tuah thei lomi zianghman a um lo,” a ti tikah, Mary in, “Kei cu Bawipa ih sal nu ka si. Na sim vek cun ka parah si ko seh,” tiah a ti thei. Pathian thungai in a um ruangah a nunnak ah Pathian ih mangbangza thiltitheinak le sunlawinak a lang. A nunnak ah Khrismas ih thawtnakbik a muril a simi lungawinak a tep ngah: Mary in, “Ka thinlung in Bawipa cu a thangtthat, Pathian i Runtu parah ka nunnak cu a lung a kimzet” a ti (Luka 1:46-47). Minung sinak in a thin a har, a mang a bang ko nain a nunnak ah Jesuh nautu a seem tik ahcun a nunnak lamzin a danglam mai ih lungawinak le thangtthatnak hla mawi a sak thei. A thlarau le a thinlung ah nun diriamnak a nei.

2. Tuukhal pawl ih Nun daan lamzin dang

(Luke 2:8-20)

Tuukhal pawl hi Khrismas thuthangtha thei hmaisabiktu an si. Zaan ah an tuu pawl kil ih an umlai ah Bawipa ih vancungmi pakhat cu an hnenah a langih Bawipa ih sunlawinak cu an parah a rung tleu. An ttih ngaingai. Vancungmi in, “Ttih hlah uh! nan hrangah thuthangttha ka run keng; cuih thuthangtha cu mi hmuahhmuah hrangah lungawinak tumpi a si. Tuih zaan rori ahhin David khua sungah nanmah Runtu Bawi Khrih a suak zo,” a ti. Culawng si loin, Khrismas ih muril lungawinak le hnangamnak thu: “A saangbik van ahkhin Pathian cu thangtthat si ko seh, A duhdawt mi minung pawl umnak leitlun ahhin remnak leeng ko seh,” timi vancungmi ih hlarem ngai ngahtu an si.

Tuukhal pawl ih nunnak ah duhnungzet kan cawn tlakmi cu, “Bethlehem khua ah va feh uhsila Bawipa ih simmi cu va zoh hnik uhsi” tiah pakhat le pakhat an ti aw. Cuticun manhlapzet in an feh ih Mary, Joseph le caw rawl einak kuang sungih a it mi naute cu an va hmu. Cule tuukhal pawl cu an hmuhmi le an theihmi pawl ruangah Pathian thangthatnak hla sak phah in an tlung. Tuukhal pawl ih nunnak hi Jesuh naute an hmuh hlan ahcun an farah zonzaihnak ruangah thinhar le beidong tla an si ding. Thinphannak le ttihnak in tla an khat ding. Asinan Khrismas naute Jesuh an hmuh veten an nunnak ah lungawinak le hnangamnak hlir in a khat. A fehlam ah thinlau in an um nain an kirlam ahcun Pathian thangthat hla an sak thei. An nunnak lamzin a danglam.

3. Nisuahnaklam Mifim pawl ih nun daan lamzin dang

(Matthai 2:1-12)

Khrismas caan ih thungaithlak ih cangvaitu pawl le Khrismas ih sullam a simi peeknak nun phuanghlangtubik hi Nisuahnaklam mifim pawl an si. Mifim le milian an si bangin khurkhua an ruat thiam. Khrismas Arsi an hmuh tikah siangpahrang a si ti an thei ih laksawng mankhung thawn biak dingin an pok. Pathian biak dingih feh tikah kut lawngin feh lo ding ti in zirh. Lam hlapi ihsin retheih zonzaih tuar in an feh. Vanlam arsi zoh le thlun in an feh tikah Pathian in lam a hruai. Asinan mifim ti cu Jerusalem khua kiang an thlen tik ahcun vanlam cuan nawn loin anmai’ thluak fimnak an hmang ih Herod siangphahrang inn ah an lut tariai ee. Asinan leitlun siangpahrang inn ah naute cu an tong lo, Herod ih thinphannak le phiarsawmnak suahpitu ah a cang.

Asinan Puithiam pawl le Daan thiam pawl ih simmi vekin an feh saal tikah Nisuahnaklam ih an hmuhmi arsi cu an hmu saal. Bible in cuih arsi an hmuh saal tik ahcun an lung a awi ngaingai a ti.

Khrismas ih huham cu lungawinak a si. Nisuahnaklam mifim pawl in naute an hmuh tikah an khuk an bil ih an biak ti’n kan hmu. Culawng si loin an kenmi thil mankhung laksawng pawl sui, frenkensen, le mura an pek. Hminsin tlak hmuh theimi cu hih mifim pawl hin Jesuh an hmuh hlan lo thinlungtak in an hawl, an hmuh tikah an khukbik in an biak ih a mankhungzetmi laksawng an pek. Khrismas taktak an hmang ngah, naute Jesuh an ton ngah hnucun ahlan ih an fimnak an rinsannak, milian an si ruangih an duh awknak pawl a hlo thluh ih tangdornak le vanlam thuthlunnak nun sawn in an khat. A kirlam ahcun Herod tong nawn loin Pathian ih thupek ngai in lamzin dangin an tlung. An nun daan lamzin a danglam. Mifim pawl in an thinlung takin le thungaithlak ih an hawl tikah an tong ngah. Daan.4:29 ah, “Cutawk ahcun Bawipa kan Pathian cu nan hawl dingih nan thinlung tak te’n nan hawl ahcun nan tong ding” a ti. Jeremiah 29:13 sungah, “In hawl dingih in hmu ding. Nan thinlung takteih in hawl tik ahcun!” a ti. Thinlung takih hawltu cu Bawipa cu an tong.

Thunetnak:

Duhdawt mi zumtu, Pathian ih remruahmi Khrismas caan sunglawi kan thleng saal. Na thinlung na timtuah maw? Thinlung thianghlim, ruahnak thianghlim le taksa thianghlim te’n Khrismas caan sunglawi hmuak in lawm cio uhsi! Mih khua le mih ram ah thinkhur le ttihphang in caan tampi khua kan sa. Mangbang vansang le beidong in kan um ttheu. Sikhalsehla, nangmah le keimah rundam dingin vancung sunlawinak taan ih leitllun a rung ttumtu Jesuh Khrih ih suah cam Khrismas caan ahhin lungawi aipuang le hnangam tein um uhsi! Thlarau thu ziang siar loih leitlun lennak le sumlesaw lawng dawi le zuan ih kan umnak ihsin Khrismas naute in kan thinlung sungah siangpahrang tokham ah to in thlarau nun tthanlennak in thlenh hramseh. Kan thinharnak le kan beidongnak ihsin ruahsannak le thlangam daihnak ah in thlenh hramseh la, pakhat le pakhat karlak ih huat awknak, dokalh awknak, raalsun awknak pawl hlo viarviar in remdaihnak (peace) um hramseh!

Bawipa Jesuh a suahhlan kum 700 lai ihsin a hmin ah Mangbangza, Remruattu, A cak Pathian, Kumkhua ih Pa, Daihnak Siangpahrang tiah hminpek a si zo (Isaiah 9:6). Curuangah, Khrismas ih muril a simi lungawinak le remdaihnak cu na parah thleng hramseh. Mary in Jesuh a neih veten lungawinak le hnangamnak a nei. Tuukhal pawl in Jesuh an hmuh veten lungawinak in an khat. Nisuahnaklam mifim pawl in Jesuh an ton ngah tikah an thinlungput a thlengh awk bangin unau, nang le kei tla Khrismas caan ahhin kan thinlung takin Messiah kan hmuah ahcun minung ih pek awk thei lomi hnangamnak le lungawinak kan co ding. Na nun daan lamzin a dang ding.

Hla phuahtu in hi ti’n a ti:

Vancung sunlawinak le sui lukhuh cu taan in,

Leitlun ah na runt ttum tikah,

Sihmanseh Bethlehem khua ih na thlen tikah,

Umnak hmun ttha hman na nei lo.

Bawi Jesuh ka lung sung rung um,

Na hrangah umnak khaan a um;

Bawi Jesuh ka lung sung rung um,

Na hrangah umnak khaan a um.

Comments

comments

Comments

%d bloggers like this: