Laizo Khua Ah Falam Upa Le Ṭuanvo Neitu In Mipi Tonnak Nei

Salai V Bawi Lian

Falam khawthar kauhnak ding hrang ih Laizo khua telh cih ding thu ih thuhla hnok mi pawl relfel dingin Falam ihsin ṭuanvo neitu upa pawl cun June 13, 2017 ah mipi tonnak an nei.

Falam Municipal Chairman Pu Dar Lian Uk kaihruainak in Falam khuanupa le Officers 9 pawl cun mipi tonnak le thuhla reltlangnak an nei. Nazi 5 sung thurelnak an nei.

“Tuvek ih mipi thawn tonkhawmnak hi a rak um dah lo. Curuangah, theihsual awknak le hmuhsual awknak a um reronak a si.” tiin Pu Dar cun a sim.

Sunthla, C. Zamual, Tili, Thlanrawn le Mangkheng khal in, ‘mipi in rak simfiang uh, in rak tlawng uh, Aanaa lawng hmang in in hringhro ringring hlah uh,’ tiin ṭuanvo nei upa pawl hnenah an duhnak an sim ve titla in a sim.

Falam Municipal hotu cun, tui Falam khawthar kauhnak ding thu ah mipi pawl le khua mi pawl an mawh lo, ṭuanvo neitu pawl thawn simfiangawknak felfai zianghman a um lo ruangih thilcang mi a si a ti.

Falam khawthar kauhnak ding hrangih khua pariat pawl cu 2014 October thla ah khua ihsin rinsan mi upa pali ciar pawl thawn thureltlangnak rak neih a si. Hi an thurelnak cu khua mipi hnenah zatlang thurelnak neiih thuhla khirhawk sal ding tiah thu tanta mi a si.

Hi thutan mi cu pehzulh ih hmalakbetnak um lo in GA Department lam ih thusuak; an khua le ram pawl Falam khawpi kauhnak hrang hman a si ding tiih nornak phun deuh ih lungkimnak hmin nem ter ding ti a um mi thu ah mipi in theihthiam lonak a um deuh mi a si.

‘Ṭha ngaiten, neemten kan simfiang awk tikah, zianruang ah timi an fiang. Cutin maw, tuanten, hitin in rak sim lo pi, an ti ko.’ titla in Pu Dar cun a sim.#

Comments

comments

Comments

%d bloggers like this: