Laiva Tilaknak Ṭuantu Ih Ṭuan Daan A Felfai Deuh Lo : Thuhla Lawrkhawmnak

Salai V Bawi Lian

Falam khawpi hrangih in ding Laiva tidai laknak ṭuantu pawl cun, ṭuan dingih an ti dan vek ih an ṭuan lo. Mipi lam ihsi lungawilonak le thuhla suhfiangnak a um ruangah CRCDF pawl ih tawlrelnak in simfiangnak cu February 4 ah an nei.
Kum 30 sung zohfelnak tuahtu ding le tidai laknak ihṭuanvo latu cu Authenti Co. Ltd (ATT) le Water and Wastewater Work (WWW) an si. Asinan hi hna ṭuantu ATT pawl ih hnaṭuannak dan le an pipe phum dan, an pipe hman mi cu WWW pawl ih zohfelnak thawn a kaih lo.

Falam mipi pawl ih thinphannak le lungkimlonak a suahtertu bik cu an pipe hmanmi a siih, a kauhlam zungpi 8 a si ding tiih WWW pawl ih an timi cu ATT pawl cun a lenglam kauhlam sawn in an rak tuah. Hi tiih an tuah miin Falam mi hrang nikhat ah tidai 350000 liter sunralnak a suak thei timi ruangah a si.

Pu Hlawn Sa Vung cun himi thu ah ‘Design vek ih tuah ding a sile 200mm(7.874inch) hman ding a si. Asinan company pawl ih hman tummi pipe cu 175mm(6.889 inch) lawng a si. Hivek in company pawl ih an tuah le nikhat ah tidai 350000 kan sung ding ih mipum 10000 hrang kan sung ding’ tiin Falam thuthang suak Chinland Herald Daily news ah a sim.

Falam Humhual Pawlkom hotu Pu Khaw Nei Tai cun “kum 30 daih dingmi design vekin an tuah ngam ding ruangah hi tendor an lak ih sumpai in a neih le daih lo thu ruangah pipe fate ih an thleng salmi cu kan lungkim theilo’ tiin a sim ve.

ATT pawl in WWW pawl hnen ihsin hnaṭuan danding felfai ngahmi a um lo tiin le acozah lam ihsin tuahding dan ngahfel mi a um lo tiah an ti. Asinan Chin ramkulh CM Lian Luai cun pek an si zo tiah a sim.

Thuhla kan dondan ahcun hi lungkimnak ca hi tutiang hmuhfel mi cu a um hrihlo ti a si. Khawruah titamtu le Falam mipi lung tibuaitu cu ATT pawl in WWW pawl hnen ihsi hnaṭuan an thok hlanah an ṭuan danding hi felfai te ih um cia ding mi a si mi ih a um lo mi le Chin ramkulh acozah, company le zohfeltu pawl karlak ih lungkim tlangnak ca hmuh ding a um lo mi hi a si.

Hakha pawl in 2014 ah Timit tiva pi ihsin tidai laknak ding hrang Myanmar A Hlah company in Ting 89000 cem dingin an rak ṭuan ih khawsung tiang tidai a thlen theinak dinghrang Ting 26000 an bet sal hrih. Asinan tui nitiang ah an hlawhtling hrihlo. Tutiang ih an cemliam mi zate kom in Kyat 11.5 Billion a siih Falam ih ngah mi cu Kyat 5 Billion lawng a si.

Cumi lailak ah Hakha Hakha khua nu khuapa pawl cun Laiva tidai cu an khawpi ih tidai pek ve dingin VP2 Henry Van Thio henah an rak dil. Asinan VP2 cun tahfel hmaisa dingin a rak sim tiah thu kan thei.

Falam mipi hrang hman mi a sinpi hrihlo mi asi ruangah Hakha khuanu/pa pawl ih dilnak cu thil remcang lo mi le cohlang theih hrihlo dinhmukhi a si tin Falam khuanu/pa cun an rak ti ve.

Mizan cu authentic co. chairman Htun Than Htun in Vice President Henry Van Thio hnenah tutiang paisa an suah theilonak thu a sut. Cumi thu ah Chin CM Salai Lian Luai a thin a heng nasa. Chin CM in authentic co. Chairman hnen ah; nan hnatuan mihi WWW ih design vek ih pipe size 8 inches (inside diameter) tuah ding asinan hmanlo in 6.7 inches lawng nan tuah, w.w.w ih ṭuatnak ah 1.5billion hman ahlei thei ding antinan nan nih authentic pawl in paisa adaih lo ding in nan ṭuat. Curuang ah himi thu hi acozah ṭuanvo neitu pawl in an check rero lai asi ih authentic co. hnaṭuanak khal kan lo cawlhter sungnak a si, a ti. Pipe size hmaan lo hmang ding ih ca khal kan theih lo in pine hmu pakhat in arak suah ti thu khal zapi theih ah CM in simfiangnak anei.’ tiin Sa Vung cun a mai bulpak Facebook cahmai ah a tar.

Laiva tidai laknak ding hrang cu Myanmar rampi president in MMK ting 50000 cem ih ṭuan dingin a nemhnget mi le a pek mi a siih March 31, 2018 hlan ih tuahfel dingih pek mi a si. Falam khawpi umtu, mipi 30000 pawl hrang ah, minung 1 in nikhat ah Gallan 25 tiang hmang thei ding daihih ruahmi thawn U Htin Kyaw ih a pek mi a si.#

(Visited 66 times, 1 visits today)

Comments

comments

Comments

%d bloggers like this: