Laitlang Hmun Nuam

LAITLANG HMUNNUAM

Mai Hausum Fanu
Zingkhua a hungvang
Arkhuang aww cun “tho thlang aw” tiah in au
Sangkaa te cu ka heiong
Boruak thianghlim ka hunhip ih
Parmawi tinkim rimthaw cu ka hnarah lutin
Ka thinlung tiang i pemkhawh
Hngilhni um thei nawn lawn ka lung i luah
A cu’i Laitlang rim te cun
Ka heicuan tlangtin mualtin
Mero zaam cu ka hei hmu
Milai a khuhtheh hmuh thei dang um nawn lawn
Keimah te cun mero zaam cu ka hei thlir
Lungthin sungah duhmi ka hunngai
Lung i leng ter tu laitlang mero
Zing ni a hungsuak eng pempi ten
Ka tuallennak hmunnuamah cun
Sungleh khat thawn nuam in kan leng hlim in kan lawm
Duhnung sungkua i dinsak nak
Laitlang hmunnuam
Ka ngaikhop thei lo vaphuntin au aww te
Hlamawi an sak biazai in a khat
Ka heihmuh mi pangpar mawite pawl
Sokhlei,Phaizong,Bingbi,
Senhri par leh parmawi dangtla
Rimthaw keng in mawi zetin an par
Laitlang hmunnuam ah
Suahsempi thawn tuantlang,cawltlang
Eitlang, in tlang ih nuamih caan kan rak hman nan
A tuah cun maw cui caan ngai in
Ka lungleng ruah ro
In thenter maw! caan herliam in
Ka ngai duahdo ka tual lennak
In hla aw ter san tiluang danglam in
Hmundangah leng in tu ah ka tawi
Ka hlam cuahco theu Laitlang ka khua
Ka lo hngilh lo laitlang ka nu aww
Ka lo phatsan lo laitlang ka nu
Ka umnak hmun ramdang ihsin
Ka lo hlam ring ring ka lo ngai ring ring
Ka thinlung te’n khua nu’i hnen ah ka dil
“Lairam ka nu’i hnenah i hruaitlung leh hram law”
Ka mitthli a fawr ka semnak ram ngai in
Lairam ka hrangah na mawibik ko
Laitlang ka hrangah a nuam bik ko
Lairawl ka hrang a thaw bik ko
Dilhrih ko ning khuanu’i hnenah
Ka semnak hmunnuam ih
I hruai thlen hlan tiang
Ka ngai…ka ngai….Laitlang hmunnuam!!

DAWTTU NUNU PAPA

Mai Hausum Fanu
In sersiam tu dawtbik ti cung Pathian
In semsuah tu dawttu Papa
In hringsuak tu dawttu Nunu
Milai pakhat si dingih in hruai ruangah
Na fahning ka lungawi
Sentet lai in nan tangnem ah
Duhdawttnak thawn in pom, in cawi
Ka hrangah ti in nan caan in pek
Nan duhdawtnak a va sang em
Nunsimnak thawn thiltha tuah ding in sim in zirh
Leitlun daanah mifim mithiam nan si lo nan
Fahning hrangah nan ti thei hmuah leh
Nan theihnak hmuah suah in tan nan la theu
Nan zangfahnak a va maksak em
A saa,a dai harsa tuar in
Fahning hrangah nan tuan,nan zuam
Phunciar sianglawn mithmai pan ten
In tuarsak theu ka hrang thatnak dingah
“Tuantu papa nang ei sawn aw” ka ti caanah
“Duatte nang ei sawn aw ka lo duhdawt” ti ah in ti
“Thuamhnaw mawite nunu hruk aw” ka ti caanah
“Duatte nangmah hruk sawn aw ka lo duhdawt” ti ah in ti
Nan ei ai leh nan in ai ah
Fa nan ruatsawn
Nunu Papa nan tha tuk ee
Dam lo caanah ka hrang nan tuar
Ihhmuh khop lawn fahning hrangah
Khawruah har in zanvar in kil
Damnak ngah ding in Pathian hnenah
Ka hrang thla in cam sak
Nan lainatnak a va ropi em
Sumpai harsa eiin harsa si hman nungla
Fa le zirnak hrang neihhmuah pe in tlawng in kai ter
Relsia tu pawl hmaiah nan thanau sianglawn
Theihhmuah suah in fahning in cawm
Fahning hrangih nan duhsaknak,
Nan lainatnak,nan duhdawtnak cu
Samtheih rual ci a si hrim lo
Damsung nunah samtum hmanseh
Ka thei hrim lo, ka tlin hrim lo ding
Thei lo tu pawl mithmuh ah
Santlai lo te si hman uh la
Nan fa le hrangah cun
Kan hrang mi cakbik,rinsan tlak leh
Kan sunlawih tlak Kan LEI PATHIAN nan si
Fahning hrang nan thlacamsaknak cu
Hruai tu Arsi bang tlunah eng in
Lamzin dik in hruai tu
Nunnak lamzin in hmuh tu leh hnangamnak in petu a si
Nunu ka lo duhdawt
Papa ka lo duhdawt
Nan duhsak mi fahning tha si ding in
Zuam ve ningna ka ti!
Nunu Papa tla duhdawt tu’i thlazar hnuaiah
Dam ten,lungawi ten um hai seh ti in
Na duhdawt fahniang in
Thlazacam phah in dawtnak biazai ka lo hlan ve ee!!
(Visited 34 times, 1 visits today)

Comments

comments

2 Comments

  1. NAu thiam thei tuk aw..
    zuam sin2 aw maw…:)

  2. Siangte Senhri says:

    A zaw,ka thin hi lai ram rim a nam vervo,na thiam tuk aww ka duh nada

Comments

%d bloggers like this: