Laitlang Ah Buddhist Mino Pawl In Laimi Christian Siim

Laitlang thlanglam Mindat peng ih Nga-Shaung (Ng’ Ghong) khua ah tlawngkai nithum zan ah khan Christian pawl Pathian an biak khawm lai ah khawsungmi Buddhist mino pa 9 pawl in an hnai hnawk hai ih an kut khal an thlak.

Laimi Buddhist mino pawl cun Pu Kee Law ih inn Gospel Baptist Church pawl Pathian biak khawmnak an neih lai zalam 8:00pm ah lut ta hrat in biak khawmnak cawlh an fial ih cui hnu ah Rev. Ling Thang, Rev. Ling Tam le Saya Mnai Ling pawl cu hro in an vel. Rev. Ling Thang kum 50 mi cu an velhnak ah a lu ah hliam a tuar ih cun an tingtang tumtu khal an velhnak ah a hnar in thi a pawk rero ti a si.

Pu Mnai Khui Shing ih ho in Buddhist mi pa 9 pawl cun an hmai ah khih in ‘Nan nih Christian pawl, nan Pathian in a lo run thei nan ti si, khui ah saw a lo run tu ding nan Pathian cu? Hi khua ah Christian tivek kan hai lo. Hi khua ihsin suak thluh uh’ ti in an hro.

Kum 40 mi, inn nei tu pa cun an khawm lai ih thil cang mi hmuahhmuah kimcang zet in Mindat ih palik zung ah May ni 25 sun ah a hek hai. Zarhte sun ihsin thawk in palik upa pa 3 pawl cu cui mi hnaihnawk tu Buddhist mino pawl cu an khua ah le an khaw kiangkap pawl ah hawl ding in thupek an si zo.

Mi hnaihnawktu Buddhist mino pawl cu, Pu Mnai Khui Shing, Naing Thang, Thang Ha Om, Khui Shing Mang, Ha Thang , Khi Shing ling, Mnai Khawlam, Om Hning le Kee Thung pawl an si. Pu Mnai Khui Shing hi Christian pawl kaa in siseh kutthlak khal in siseh rak hnai hnawk ringring theu tu asi an ti.

Thlanglam laitlang ih um Cho-Chin khau, Nga-Shaung khua pawl cu Nga-Shaung khawhlun le Nga-Shaung khawthar tiin block hnih ih then an si inn 92 an umnak ah Christian cu innsang 5 lawng an si. Midang pawl cu Khawsia betu pawl le Buddhist pawl an si. (Falam Times).

Comments

comments

One Comment

  1. vanneizing says:

    lungthin a na ee kan unau lai mi zum lo tu khua le ram a va tamtak lai ve aw. Hmuhsuam a rak tuar tu zumtu kan unau pawl ka tuar pi zet. An tuar mi in Pathian thu rah tha rah ter tu le mual nei ter tu zum tu karhzai ter tu a si mai ding. Pathian thu cu a lak in a kir dah lo. Thlacam nak thawn bawm cio uh si.

Comments

%d bloggers like this: