Lairawn Lo Zuun

LAIRAWN LO ZUUN

Ruahpisur lak’n fangci kulhnak fom in
Zin bek le nal ah tlangzin kan zawh theu;
Minung hlei’h kan sunrawl funmi a cin,
Beunak hluainim, rawl ciin ei, kawngsang keu.
Thlawh-lo sung cangai vak naupai tiamti.
Neihsun ka rual pawl ding, cung-u rual thawn;
Ruahhmai, tim phur’h mawn-leng awn rutro khi
Ka lung sun maw rual-hawi lo keimah lawn’.
Khua rung maw thlang riahnak thlamte ka pan,
Hun suang sal ing bawmtu ’m lo’n tu ka man,
Zing sim rawl ka suannak bel dum remri’n;
Zanvar it thiam lo ding’n i ciah, ruahpi’n
Thlawh lo sung tidai li demdi’n mawi ngai,
Zansim ah umzir ai’n ka lung hnem hai.

Zing vanghlan khawdai cing’n  thlawh-lo tuantul,
A har fual, hnai hnoktu fikte, saihnit;
Bawmtu ’m hlah ing thlawhri tluan tup’ bang rul,
Zuamte’n vun saam theh ing khaw, kor bang hlit.
Sunhnu fur nisa khin, ka zaang thlanhri,
Ruahsan hleimi sunmang  ngahnak zuam ing;
Thlam lamzin pan vun hma phah ing thlawhri
Ka hnu cuan kirsal ing ka duh lung tling.
Ruahpi le niling hrial lo’n lo ka thlo,
Ka hngakhlap ngai hnapi theh lai, thlawh-lo;
Thlamte kiangkap  ka hai, hanghnah hangrah
Khua ih tlunsan tum in ka za ka thlah.
Bungbel phurtlung sal dingin caw ka sor,
Ka dungleh kirsal cu mitthli a for.

Furpi rialruah a liam tuan bang ka tan,
’Vang-khaw mawi ah fangkung hring khi mawi ngai.
Thlam kiang thawhri tluan an zaam hai maian,
Thlanhri le thi suah ih tuan bang hnem hai.
Rannung le cangai ih saamnak ka tholh;
Thawte’n suncaw ka hmeh thlawh-lo sung nga.
Fangkung hnoktu thlawhri’h hrampi a ngolh,
Hnoh nau bang ka um nitinte’n ka hnga’.
Zanlei ah mawi hlei hai fangkung vui eng,
Ka khawtan lo-lu lo-taw tiang a teng;
Cunah ka lunghnemtu thlamte riamri,
Mau zial, thildangpawl an rak mawr memmi.
Khua rung maw thlang tlun zairel thiam lo’n maw,
A siim, rak tlung men aw ka lo-hnen aw.

Tang zing daidaw tawt in fangkung ka nam,
Fangah theh hnu’n hruih-bial ah kan darh thlang;
Fang kan cilnak ka kutke tiang a kham,
Zansim daih hnu’n ka va hal ta vaithang.
A thang ka Pu Thang ih zai hurhuk aw,
Zantim zanthiang dai khi awi in a zai;
Ralkhat cuan ing cangpawl nawh mei lang maw;
Ka Pu Thang cu zuamte’n a kual ve lai.
Cangpawl hnonmi tlangpi bang pawng a mual;
Hruih sung’n li fanghum cu Rihli bang rual,
A buar, ni a liam tiangin kan thianfai;
Fangzah sungkhat unaupawl kan sawm hai.
Voksa, tilva that in fang kan aih theu.
Kumpi linglet’h hlimnak ni cu a ceu.

Fang seng theh hnu’n cangpawl in kan ur fai,
Mipee le antam, khasuan kan cing sal;
Thlatang romei lak’h khen tuan kan thok hai.
Daidaw tawt ih rian ka tuanpi ranhal.
Zonzai ve hai nunhar hnen an umnak,
Daidaw, furpi, thalni kian lo’n riantuan;
Rian lo tuan ih hngawngkol putnak a cak
Thabangh can an mithmai’n vanglai a luan.
Vau ni’h thlaikungpawl khin ka lung ti thar.
Ka hawhtling ding ruahsan’h tuanmi a par.
Thlaikung le ti luannak daidaw a zam,
Ka lungthin cu thlawh-lo sungah a cam.
Fur, thal ti um loi’ lo rian ka tuan khi,
Ka ngai hlei Lairawn kan thlawh-ram deldi.

T. Lingkin

(Visited 63 times, 1 visits today)

Comments

comments

Comments

%d bloggers like this: