(Lairam) Ka Fa Le Tuni Inn In An suak

USA, Canada, Australia, Norway, Malaysia, India etc….nan rual asi mi kei Lairam in thu ka lo cah duh. Ka fahniangtepawl khal rak kai hruai cio uhla, nan duhdawtnak kutnem thawn rak (dongsong) hmuak hram uh. Inn ihsin an suak ih an hrangah an tawnmi thil ziangkim hi a thar theh lai ding. Zianghman theithiammi khal an nei lo. Umtlan daan khal an thiam lo ding. Zanfahten ka rual le pawl nafa hniangtepawl kha rak duat ve uh. Ka duhdawt ngaingai ih ka duat ngaingai. Inn ahcun kafahniang le pawl khal siangpahrang an si ko.

Asinan tu ahcun thil ziangkim hi a thlengaw theh zo. Inn leng kaiten an tum ih tual ihsin inn lam thlahnak ban an phar veten a sunglawi zet mi zirnak le a ropi zetmi pekawknak an tuah thlang ding. An tuah ding mi ah hin siatsuahawk theinak thinpit beidawngnak khal an tong ding. Riahsiat ninghang zathlaknak khal an tong tengteng ding. Hi pawl phen lawng ah hlawhthlinnak diktak a um ih dungsippawl hrang ah hlawhtlinnak lamzin a um lo. Hi leilungpi sungih cengthei ding ah Mah le Mah rinsanawk, duhdawtnak le ralthatnak neih a tul. Curuangah ka rual le pawl kafa hniang le kha an thei tul an thei lo mi tete pawl kha rak zirh hram uh.

“Minung hmuahhmuah ahhin dingthluh lairelnak a um lo. Leitlun ih nunau le mipa hmuahhmuah khal hi an dik theh lo”

Minung hmuahhmuah ahhin dingthluh lairelnak a um lo. Leitlun ih nunau le mipa hmuahhmuah khal hi an dik theh lo. Lei lungtlun ih mi ziangsiarlo (hmuhsuam) tupawl hi an mah ai upa hmaiah an meikhup in mi kephah liak theutu an si. Mi huaisen a um theih ih ral a um vekin rualpitha a um thu tla rak zirh uh. Leitlun ih mi hlawhtlingpawl hi hna danglam an tuan ruangah a si lo, an tuan daan a danglam ruangah sawn a si. 

Cabu ih sunlawizia le amakzetmi van le lei lung le a sung ih a um mi ran nung thli lak ih a zuangmi vate ni lak a um mi khuai, ti sung ih a um mi ngate, lei vak lakih a fate zetmi sihtepawl ih nungtu khawsak daan pawl theithiam ding ah ngaihven theinak le ruahtheinak ding caan tla rak pe uh.

Thu dik hman aupi le tan ngamlo tiang ih tih hrut ding a si lo. Nehnak hi kan do mi ral pawl tam le mal a si fawnlo kan tanmi sawn hi thu dik a si maw? Anetabik ih nehtu cu thudik a si ringring. Caw rual lakih sin a hrante a suaktu caw cu sepi in a deh. Lungrual nak hin thil ti thei lo a nei lo. Nunnak hmuahhmuah lakah mi hrang ih a nung tui nunnak tlukih nunnak sunglawi a um lo. Kafa le kha an mai thu bawtcatmi parah rinsanawknak nei ngam ding in rak zirh uh. Ka dik a si ti an theinak ahcun raltha zetih dodaltu le hnaihnawktupawl pah thlang ngam ding tiang in rak zirh uh.

Mi thlawsuak si ding cun ziang sakhua kan biak a si khallen kan biakmi sakhua ah hngetkhoh zetih um a tul. Ka fahniang tepawl kha an biakmi a nung Pathian kha a pakhatnak an rel ih an thlauthla panglonak ding khalah rak zirh uh. An biakmi an Pathian  in an parah tum tahmi tumpi a nei. Ka rualtha le pawl…kafa le kha, dimdawih le duatzet in rak zirh uh. Asinan a tlawnzawng le a duhzulhzawng cun rak ti pang hlah uh fung thawn naa takih thawi hnu lawngah sentlung tha a suak ih meithawn naatak ih ur hnu lawngah thir tha a suak theu a si lo maw? Kafa hniangtepawl kha zir theimi thil tha hmuahhmuah kha rak zirh uh.

Salai PP Than Zam, New Delhi

(Visited 56 times, 1 visits today)

Comments

comments

Comments

%d bloggers like this: