Laimi Politics Hrang Thlir Cuannak

Kawlram Politics Rolung Oway Magazine: Laimi Politics Hrang Thlir cuannak By Phun Hram Awi


Kawlram politics thuanthu sungah rolung pakhat a simi magazine pakhat cu Oway magazine a si. Hi Oway magazine hi Kawlram politics thuanthu ah rolung a sinak cu thuhla phunhnih a telkop. A pakhatnak cu hi Oway magazine ih editor cu Kawlram zalennak pabik Bogyoke Aung San in mgazine editor a tuan. Hi magazine sungah an san lai ih Kawlram zalennak hrangih calai thawn hna an tuan zia famkim zetin a tel. A pahnihnak cu hi Oway magazine ruangah Yangon phunsang tlawngta pawlin Mirang colony fimzirnak le Kawlram zalennak hrangah lamtawi in a voihnihnak sandah an piah. Cuih thuhla pahnih kan zoh tikah rampi dinsuahnak hrangah calai ih a thupit zia le ramhruaitu pawl hi calai lam minung an si zia khal a langtertu a si. Cuhlei ah Oway magazine sungih nganmi thuhla pawlhi tusan Kawlram politics khawvel ah zohthlir tlakmi thuhla tampi a tel. Cun Laimi pawl politics tualrawn sungih kan tel tikah kan hrangah theihtlak thuhla tha tampi a tel ruangah hi cahram sungah Oway magazine sungih an ngan telmi thuhla pawl lawrkhawm in Laimi politics hrangah thlirconnak mallai ka telh ding.

Oway magazine

Oway magazine hi Kawlram santhuanthu bu sungah politics rolung magazine pakhat a si. Hi magazine ih a hmin hmaisa cu Yangon Phunsang Tlawngta Pawlkom Magazine a si ih Aung San ih editor a tuankum ihsin Oway tin a hmin an thleng ih cuih rolung Magazine “Oway” hi Vol. 5. No. 1, January, 1936 ih suahmi a si. Hi Oway magazine hi Kawl le Mirang tin section pahnih an telh. Chief editor cu Aung San a si.     Oway Magazine ih Kawl section ah Kawlram cangan hminthang Thakhin Kuudaw Hmyaing, Myanma Alin U Sein, U Phu Kyia, Diduk U Ba Cho le Thein Nay Nwe pawlin an ngan. Biazai pawl cu Min Thuh Vun, Mya Dawng Nyo, Ma Htin, Mya Nyo pawlin an ngan. Cakuat tla an telh ih cangantu cu Mg Myo Nyunt le Yamamin pawl an si. Cun, Mirang section ah lompinak ca an telh ih cuih lompinak ca pawl cu India ram ih British ralbawi Major D Graham Pool, Kawlram Upadi hotu U Chit Hlaing, Thittaw Vuankyi U Ba Saw, Fimthiamnak Vuankyi Dr. Ba Mg le Kawlram thuthangca hotu Thein Mg pawlin an ngan. Mirang tong in bikom pawl cu U That (nehnu ih UNO General Secretary) in Pantanaw Journalist hmin in “Thoughts on Democracy”, U Ba Oo in “The Boycott of 1920”, Dr. J Andrus ih “Western Students in a Changing World”, W. J Grant ih “University Students and Journalism”, Mg Nyo ih “Inspiration”, Dr. S. Fernibal ih “Noblesse Oblige”, NN ih “A Fadeless Picture”, Pro. W. S. Dewsign ih “A Sketch of Some of the Principal Characters of Burmese Court in the Reign of Bagyi-daw” le George Owell ih “Burmese Days (Civilization)” pawl an si. Cule “Oway” hmin in bikom pakhat an nganmi a um nan cangantu zo a si ti an telhlo. Cangan daan leh politics tiluan thlir tikah Ko Aung San a si ding tin an zum. Cun, mirang section ah editir hnen ih cakuat an telh ih  Yamamin in editor hnen ah “The Hell Hound at Large” a tel. Hi cakuat ruangah Oway magazine hi Kawlram politicis ih rolung magazine ih a cannak a si ve. “The Hell Hound at Large” cakuat ngantu hi neta lam ah Oway Magazine Committee sungtuan a si mi Thein Tin a si ih a cafung hmin cu Mg Nyo Myah a si.

Oway ih Rolung cabu a cannak

Oway magazine hi tlawngta hnen ah le Kawl mipi hnenih zemdarh suah a si tikah mipi tampi in an siar. An lei ciamco ih cuih san ih khongcak bikmi magazine ah a cang. Mipi in “The Hell Hound at Large” cakuat hi an uar zet. Cuih Oway magazine cu University Principal D.J Sloss in a siar tikah “The Hell Hound at Large” timi hi University thuneitu pawl in relsiatnak thu a si tin a ruah ruangah editor Ko Aung San cu a ko. Hih ca hi zo in a ngan tin a suh tikah Ko Aung San cun a sim duhlo. Curuangah Ko Aung San cu University ihsin dawi dingin thu an suah. Cuih thu cu Unversity sungah a thang ciamco ih Tlawngta pawl cun Ko Aung San tlawng ih dawilo dingin sandah an piah. Cutin Oway magazine cu a voihnihnak tlawngta sadah piahnak lam onsaktu ah a cang. Tong dangih kan sim ahcun Kawlram tlawngta le mipi pawl politics dik sungih thunluttu, politics fimzirhtu leh Democracy simfiangtu thabik magazine ah a cang. Cuhlei ah Ko Aung San hi rampi hruaitu, zalennak ih pabik a si lawng silo in a politics hi calai thawn a tuan. Mirang a do tikah meithal lawng silo in calai thawn mirang dotu a si zia a langter ih atu santhar hrangah cun fimzirhtu politics rolung magazine ah a cang. Cucu Ko Aung San suahmi Oway magazine ih politics a si.

Oway Magazine leh atu santhar Laimi politics

Mirang uk lai caan ih politics hi mahte din theinak, zalennak le maih khuaram ah mahte uk aw theinak hrangih tuahmi politics a si. Cuti ih an tuahtuan rero lai ah Oway magazine hi mipi lung fimtertu magazine ah a cang. Ziangah Yangon Phunsang Tlawngta Pawlkom magazine ihsin Oway ah an thleng timi thu ah editor Ko Aung San in nehhnu lam ah hitin a sim. “Oway tin kan thlengnak cu Ko Thein Tin ih ruahnak pekmi ihsin kan thlengmi a si. Tlawngkhan sungih ka to laiah Ko Thein Tin ka hneah a ra ih Ko Aung San kan Kawlram mipi hi Mirang dodal in zalennak thinlung an neih theinak dingah thu saithawttu a tul. Curuangah Tlawngta Pawlkom Magazine hi nangmaih editor na tuanlai ah thu saithawttu ah a hmin thleng sehla a tha ding? tiah in ti. Ka ruah tikah a dik ngai si ka ti ih thu phunphun kan ruat. U-tawng hi a au tikah tikcu caan a thleng aw theu. Curuangah U-tawng au aw kan ti pei maw tin ka ruahnak ka sim. Cu tikah Ko Thein Tin in “U-tawng au aw” ti hnakin amaih U-tawng a au aw “Oway” timi khi kan lak le a tha deuh pei maw tin a ruahnak in sim sal tikah tha ka ti tukih cutin Committee ah kan suahpi ih kan zaten kan lung a kim hnu cutin Oway tin a hmin kan thleng” a ti. Curuangah Oway timi a hmin hrimhrim khal hi Ko Aung San ih politics thehdarhnak au aw pakhat a si. Oway a si bang tukin magazine sungah thuhla tha tampi a um. Cumi sungih sin kan theih ah a tha ti ih ka ruahmi thuhla pathum ka tar lang ding.

1) Diduk U Ba Cho ih Forhnak

Hi Oway magazine sungah editor Ko Aung San in Diduk U Ba Cho hnen ah “Phunsang tlawngta  hrangah thathnemnak a pe ding ti ih na ruahmi cahram pakhat in in ngan sak  aw” tin a dil. Diduk U Ba Cho cun lungkim ten a cohlang ih a cahram thulu ah “Kawlram Politics thuanthu le Atu Dinhmun” tin thulu a pek. Cuih cahram sungah tusun Kawlram huap in siseh, Lairam huap in siseh ramhruaitu hrilnak le ramhruaitu dik kan hril suah theinak dingah zohthim le fimzirnak ih hman a tlakmi catluan pakhatte cu hitin a si. “Rampi a duhdawtu thangthar mino pawl politics hmangih sipuayii (Maih hlawknak le ngahnak lawng a ruattu) a tuahtu ramhruaitu pawl kha hlon uhla Kawlram zalennak hrangah thungai thlak suahin tuan cio uh” ti a si. Hihi an san khalah a dik ih atu kan san khalah a dik hrih thotho. Diduk U Ba Cho ih forhnak catluan hi atu kan ram din salnak le thlengawknak ih kan tul bikmi a si thotho hrih.

2) Mg Myo Nyunt cakuat

Oway magazine sungah Mg Myo Nyunt ih cakuat pawl hi san a man zet. “Mih Chaw” timi thuluu thawn a kuatmi ca ah “Hi cahram ngantu vekin kannih phunsang leengnu pawl khalin ahlan ih tih le thia ih kan ummi kan thinlung cu kan hlon zo. Ram duhdawtnak thinlung thawn phur le thatho in thisen le hnai a luan tiang vaalrual pawl thawn kan tuan ding. Ziangtik hman ih hngilh thei lo dingmi NI kan sersiam ding. Nomnak a umlonak lamzin ihsin lomnak le sunloihnak lamzin kan sial ding” timi hi atu san gender thuruah daan thawn a mil awmi a si. Ziangkim ah nang nu le kei pa timi nu le pa thleidannak, leh hnam thleidannak a um lo zia, zaten tuan tlang theh a tul zia an hmu suak cia zo. Atu kan san politics hrangah thlalang a si.

3) Yamamin ih Uico tumpi

Oway magazine rolung magazine ih a taannak thu hrampi bik a si. Hi ruangah editor Ko Aung San tlawng an dawi. Tlawngta pawlin sadah an piah. Cuih a ca kuat sungih a telhmi cu “Colony Mirang pawlih kutkaih pawl hell sungih sin a tho ciamco. Uico dum tumpipi an luat ciamco. Cuih uico dum pawl kha kai uh la hell sungah thlak sal uh. University sungih Uico dumpi a bo ciamcomi aw theih kan duhlo.  An umnak ding hmun hell ah kuat uh” ti a si. Kawlram sungah sanhlun colony politics uico an um vekin atu kan san khalah santhar colony politics uico an um thei tihi a si.  Oway magazine ih in zirhmi politics cu: Politics hmangta hratin maih bulpak hlawknak le hminthannak a hawltu hi ram le miphun siatsuattu sunglam ral an si ti thei in ram le miphun hrangah a tuantu ding taktak hril thiam ding; nu le pa, hnam tongpi ti ih thleidan nak hi politics ih a dodal bikmi a si ti thei in thleidannak hrial ding le ram pakhat dinnak hrangah a thupi bik le thahrampi hi ziang a si ti theih hi a si.

(Visited 98 times, 1 visits today)

Comments

comments

Comments

%d bloggers like this: