Laimi Le Theology

LAI MI LE THEOLOGY

Salai Tin Lian
(1)

imagesThuanthu vekin Laimipawl hi Mongolian ih thlah kan si ih, Tibet ihsin tuih kan Lairam ih rakso kai vivo kan rak si. Thlahtu pipupawl san ih sin nunphung fumfetak raknei mi miphun kan si. Politic ah cun mah le Lal thuneihnak hnuai, zalen zetih rorelnak nei mi kan siih, Biaknak lamah cun Rai biaknak a si. Cun pumcawmnak ah lothlo le sakap kan siih, Vangtlangnun ah cun Khuangcawi le Cawnlam lawng silo in Rinumnak, Duhdawtnak, Tlawmngaihnak le Mizawnruahnak nun neitu kan si.

Pathian mihman Mirang Misonnary-pawl zarah Laimi in Christiannak hi AD 1900 hrawng in kan run hmeltheih ih, Laimi in ciahneh a si bik ding, AD 1997 hrawngah cun Laimi Christian kum 100 kimnak (Centenary) tuah a si. Kum 1980 hrawng in Laimi India Bible tlawngah Theology zir kan tam sinsin ih, Lai theology cu India theology ih hrambun mi tla a bang. Theology cu Greek cafang Thoes le Logos kawmmi ih ra a si. A sullam cu ‘Pathian Thu’ a si. Theology in a hleice in zumtu nunah sullam thukzet kentel mi a nei. Cucu Thuthangṭha (Good New) le Thilṭha Tuah (Good Work) an siih, cucun Thuthangṭha phuannak (Evangelisim), Christian Ziaza (moral), Tiding le Mawhphurhnak (ethic) le Vangtlangnun tuahṭhatnak (Socialism) fiangzet in an run pholang.

Theology kan ṭhumawknak hrampi cu Thurin (Doctrin) ah silo in, Bible ah a si. Cathianghlim hmuahhmuah hi Pathian thawkkhumnak ih pek a si ih, zirhawnak hrangah siseh, kawkawknak hrangah siseh, remṭhatawknak hrangah si seh, dingfelnak zirhawknak hrangah siseh a hlawk a si (2Tim 3:16). Heb 4: 12 ah Pathian Thu cu a nung ih huham a nei a ti. Theology cu minung nunnak a danglamtir lawng silo in vangtlangnun khal a danglamtir a si. Cuiruangah Theology hi zumtuipawl kan bulpak, kan innsang, kan kawhhran le khawtlang nun cawmtu le hruaitu a siih, kan nun dan, kan lungput, kan kaihhruaiawk dan le kan thiltuah danpawl cu Theology kan fehpi dan ah a ṭhumaw ding. Sihmansehla Theology cu kan mahah a nung loih huham a neih lo ahcun ziangtluk zirin Degree sang nei khalsehla umzia a neithei ngaingai lo.

Minung hi sang lawng in kan nung loih, Rinnak khal thilti tel lo cun thi a si vekin, Thuthangṭha phuan (Evangelism) le Sempi hrang thilṭha tuah (Socialism) hi Theology ih hrambunmi le a fehpi mi an si ih, ṭhentheih an si lo. Thuthangṭha phuannak cun Christ ah Rinnak in neihtir ih, Vangtlang mawhphurhnak in taksalam ṭulmi a sawmdawl a si. Theology kan fehpi mi in thlaraulam ṭulnak lawng a hmuh a si ahcun sakhawmi (religionist) kan si, taksalam ṭulnak lawng a hmuh a si ahcun mirethei bawmtu (humanitarian) kan si, lungput khawruahnak lawng a hmuh a si ahcun zirhtirtu (educator) kan siih, taksalam palbetnak lam lawng a hmuh a si ahcun ramthukheltu (politician or revolutionary) kan si. Laimipawl hi zumtu kan si vekin hipawl lakah pakhat khat cu kan si a zum um. Sikhalsehla Pathian rundamnak cu kan thlarau hrang lawng a silo ih, kan minung pum (Whole men) taksa, thinlung le thlarau hrang a si. Christ in leitlun ih rawng a bawl laiah a hmaisa bikah thuthangṭha a zirhtir ih, cun damlopawl a damtir, rilrawngpawl ei ding a pe, thinlung kekkuaipawl a damter. Christ in kan thlarau rundamnak a ngai thupi vek in, taksalam kan ṭulsammipawl a thlahthlam lo. Hihi Theology kan fehpi dan ding cu a si.

Comments

comments

Comments

%d bloggers like this: