Laimi le Praise and Worship

worship-chords_thumb[7]_thumb[6]

– Uk Lian

Praise and Worship le Santhar Mino

Tulai mino tamsawn in praise and worship an duhnak san ih ka hmuh daan cu:-

  1. Hla thu le awnmawi pawl an duh ruangah
  2. Pathian biak daan zalen zetih thlengdanglam duh ruangah
  3. Hillsong pawl ih hruaikaiawk daan cawntlak ti ruangah

Ram sung le ram leng ah “praise and worship” zawngih Pathian biak caan hmang kan tam zet thlang. Hivek, contemporary worship songs ruangah mino tamzet an thazang a thar ih nuam zet in Pathian an thangṭhat. Kan hla hlun deuh pawl ṭhimnakah, “Amazing Grace”, “How Great Thou Art” “Holly Holly Holly” le “It is Well” tivekpawl cu dunglam ah kan taan deuh ih santhar hla pawl, (ṭhangphawk hla) kan timi contemporary worship songs pawl sak nuam kan ti zet sawn thlang.

Mino pawl cun tulai hla ti men hman siloin, Mirang pawlih hla thar ṭhimnakah, “Oceans” “Hosanna” “Mighty to save” “One Way” “Draw me Close To You” “Lead me to the cross” “In Christ Alone” le “How Great is Our God” tivek pawl an uar ih Mirang worship hruai daan vek rori ih cangvaih an duh cih ih a tuah rero tla kan tampi zo. Minopawl cun kan hla hlun pawl dunglet hoih in tulai santhar hlapawl an dum deuh ti nak a si.

Kan kawhhran cio ah praise and worship style zawng in Pathian thangṭhat nuam kan ti tlang khawm ahcun hman peh vivo tlak a si ko. Asinan, kan kawhhran mipi in kan tlin lo ih worship leader pawl khalin kan tlin hrih lo ahcun thiam le thiam lo ih tuah ciamco ding mi thil a si lo.

Praise and Worship Style ih Hruaiawk A hatnak

Musical Concert - Christian - clappingHlan vek ringring in Pathian thangṭhat a theih lo. OT ih Pathian biak daan le NT ih Pathian biak daan khal a danawk vekin, Laimi pawlih kan Pathian biak daan khal, kan tleng vivo a ṭha. Christian kan si thok ih Pathian kan biak daan vekih Pathian kan ringring ahcun kan ṭhangso tinak a si ding. Ziangahtile, Pathian cu a thlengaw dahlo nan, a hnaṭuan daan cu a thleng ringring.

Minung le minung hman kan biakawk dan a phunphun in kan thleng rero. Kan nelmi rualpi kan biak daan le mikhual kan biak daan tla a dangaw. Curuangah kan Pathian thangṭhat daan khal aṭha zawngih thleng le rem vivo ding cu thil ṭha asi.

Santhar Pathian biak daan vekih Pathian kan thangṭhat tikah kutbeng men le hlasak men a si nawn lo, baan phar, laam le khir ih Pathian thangṭhat a si thlang. Mikhual vekih Pathian kan rak thangṭhat ṭheu mi kha santhar praise and worship style ahcun kan rualpi ṭhabik vekin Pathian thangṭhat a si. Pathian vekih thangṭhat si nawnloin rualpi vekih biak le thangṭhat ti khalin kan sim thei thotho.

Hivek lam ahcun Hillsong pawl le contemporary worship song pawlin hmai an hruai ih cawn an tlak zet. Praise and worship style ih kan khawm tikah mino tampi kan phur ih kan lawm, kan Pathian biak daan tla a danglam ih a nuam in a hahdam zet.

Praise and Worship Style ih Hruaiawk Daan ah Ralring ul

A nuam zawng lawnglawng siloin, Pathian cu thinlung takin, a duhdan rorin kan biak ngah maw timi a thupi sawn. Kanmah duh daan le nuam ti daan zawngih Pathian biak a ol te. Kan duh daan ih kan biak ahcun kanmah le kanmah thangṭhatnak pe aw kan si ding. Asinan, Pathian ih in fial daan le in duhdaan vekih kan biak ngah lawngah Pathian a lungawi ding.

Kan awnmawi le hlapawl a phur um tuk aw tiih laam rero men ding a si lo. Praise and Worship style zawngih Pathian kan thangṭhat tikah kan kawhhran mipi zaten kan lungawi khawm maw tivek khal zohthiam ding asi. Praise and worship leader pawl lawnglawng tawngpa phurih phur khal a ngah cuang lo. Thlarau in kan khat ngai asile mipipawl khal lawm le nuam dingin kan hruai kai thei ding a si. Culo ih, kan mahte laam le phur ih kan phur ahcun “fanghi” phur a si ding. A rei hlan ah kan laam le lawmnak thli in a sem hlo men ding. Thli ih sem hman a ṭul lo men thei.

“Praise and Worship” ti cu “Thangṭhat le biak” ti rori a si ko nan, a sullam kan theih daan, kan ruahdaan, hmuitin daan a rak bang aw thei lo ṭheu. Curuangah kan kawhhran le member pawl hrangah praise and worship kan ti tikah ziangmi kan tumtah, Pathian thangṭhat dingah maw, mipi nuamnak ding ah maw, asilole hla hruaitupawlih nomnak ding ah maw, tivekin Pathian in sunlawinak a co ngaingai pei maw timi pawl felte’n kan ruah ih kan lungkim khawm aṭul.

Kan praise and worship hla pawl hi Mirang ta le Kawl ta lehlin sawng vivo men kan si hrih ruangah kan kawhhran cio ah hmuar a nei maw tivek khal ruah ding a si. Mah te lawm ih lawm siloin zapi huap ih lawm thei nak dingah khawruah kan thiam aṭul. Kan nulepa ulenau pawlin teh kan tulai hla pawl, praise and worship hla pawl an sak tikah an nuam in an thlarau a luang maw timi tla ruah ding.

Pathian Biak Daan Dangdang images

Laimi cu kanmah te lungpuak ih Pathian thangṭhat hnakin midang zoṭhim ih Pathian be rero kan si hrih. Tui kan khawm daan pawl khal hi kan thleng danglam ngam lo, midang khalin hivekin an tuah tiih fehpi rero lai miphun kan si. Thil ṭha tuk lo khal kilkhawi vivo zuam zetpawl kan si. Tui praise and worship kan timipawl khal hi midang hnen ihsi kan zir mi thotho mi a si.

Anmah vek ih kan ti thei lo caan khal a tampi ding. Ziangah tile, Miranpawlih Pathian biak daan le kan Laimi pawlih kan Pathian biak daan a danglamawknak a tampi. Curuangah hivekin mi khalin an tuah ti hnakin, kan kawhhhran ah kan tlin maw, kan Laimi hrangah a ṭha maw tivek khal ruah tel a ṭul bet. Ziangkim lak luh hmuahhmo men ding a si lo. Nga thliar bangin thil ṭha le sia kan thliarhrang thiam a ṭul.

Mirang pawl in awnmawi khawvel le nunphung ah in ciah neh tuk ruangah Mirang hla thu kan theih sun mi tla napin kan thinlung sung ah hna a rak ṭuan caan tla a tampi ko. Cuvekin, an awnmawi pawl kan dawt duahdo le kan uar tuk ruangah hmuar nei zet ih kan ruah caan tla a tampi. Mino pawlin sunglam hlimnak le lenglam hlimnak tivek khal kan thlir thiam a ṭul zet.

Thanghatnak Hla Phuahtu Pawl Hnen Ah

Laimi in Pathian Amah rori thangṭhatnak hla kan neilo lawlaw ti tluk a si. Tui Mirang pawlih praise and worship hla kan uar tuk nak san khal hi, an hla thu ruangah a si. Pathian Amah rori thangṭhat upat peknak hla tampi an nei. Thimnak ah, “Nang cu sersiamtu na si, Thianghlim Thianghlim Bawpai” tivekin Pathian ih thiltitheinak le a ropitnak thangṭhat hla rori tampi an phuah suak. Cutivek cu sah tla a nuam zet.

Tui kan Lai hla pawl cu bualpak ih Pathian theih daan, bulpakih Pathian kan parih a ṭhatnak langternak hla a tam tuk. Pathian ropitnak le sunlawinak hrang thangṭhatnak hla 100% a um tuk lo. Tui kan lai hla Pathian thangṭhatnak hla pawl kan zoh tikah, Pathian lam 50%, minung lam 60% tivek zawngin thangṭhatnak hla kan phuah mi a tam deuh.

Curuangah ṭong dang zawngin kan sim asile, hla nepnawi, hla ṭukṭak a tam deuh ti khalin kan sim thei ding. Mipi, zapi huap ih Pathian thangṭhangṭhatnak hla a mal tuk. Santhar mino tete pawlin midang hla daw lo dingah kan hla phuah thiam pawlin hla thar, Praise and worship hla pawl tam sinsin in, in phuah sak thei sehla kan ṭhathnem pi zet ding ka zum.

Net Kharnak

Praise and worship zawngih caan hman kan uar vivo ding. Worship leader pawl khalin nun hlan ih thlacamnak nei sinsin uhsi. A hla sak lawng duh a theih lo, Pathian thu sungih um le a thu thlun hnu lawngah hla in hmuar a nei thei. Worship kan hruai tikah kan mipi ziangtlukin an thaw ti khal zoh thiam ding.

Mipi pawl khal thil thar zir uar ding. Hla thar khal zir uar ding. Thiam tum vivo ding. Hlan nun le hlan thil kaih fengfeng tum lo ding. A ṭul daan ih zirih thlengawk thiam ding. Jesuh dungthluntu kan si vekin, hminṭhatnak dingih cangvaihnak lam hnakin Pathian biak am sawn ding. Tulai kawhhran tampi cu Pathian hna kan ṭuannak ah kan buai tukih Bible siar le thlacam kan man lo ṭheu. Pathian biaknak caan riangri kan nei thei lo.

(Visited 747 times, 1 visits today)

Comments

comments

2 Comments

  1. Uk Lian, Na ngan tha ka tituk. ih Megazine pakhat khat lo le Kawhhran tlau tivekah rak lo suah sak sehla a ngah kem. Thuhla in rawn sim lehaw.

  2. Dear U Rokhar Thang,

    A ngah tuk sokhaw.
    Ka lungawi.

Comments

%d bloggers like this: