LAI PHUNSUAH NI ZIANG RUANGAH AN RAK TUAH?

LAI PHUNSUAH NI ZIANG RUANGAH AN RAK TUAH?


Thil pakhat khat kan tuah tikah a san leh avang a um ttheu. Pinlung, Independent, Nuattali, Chin national day kan ti pawl khal pupa pawli`n sullam neih ih an rak tuahmi a si kan ti tikah a sual lo men ding. Pathian khali`n ziangkim hi umzia nei ding ih a tuah a si ruangah amah bangpi ih a
sersiam mi pawl khali`n umzia nei dingah thil kan tuah ttheu a si. Umzia nei lo ih ke kalkhat kal hman hi a pam hmai ttheu. Hleitling, lungfim, awm khoh valruali`n leitlun an tuam lai ah an kutsung ihsin suak thei dingah leitlun ttongtin an rak buaithu pursum hlawhtling hmaisa pawl hnen ihsin calai thawn kan hmu. Hmuansak tlangval khali`n a sul phumnak lei ram hruaisuak dingah zan thlapa bangin tlangkip a rak tawi cimco. A sunmang cangsuak thei dingah thluang dang val pawl  hnen ah phung a rak sawm. Phung sawm ticu thil pakhat khat ruangih kan tuah dingmi kan tuah suak thei lo tikah tangdornak thinlung thawn in ra bawm dingih mi kan va sawm khi a si. A phungsawm val rual pawl lungkimnak vekin calai rolung an dawl. Kum leh caan a hawng liam ruangro cun hmuansak valpa cun thimzik zawhte bangin a phung sawm valrual pawl zalam ruati`n calai rolung an dawl bet sal.

February ni 20 a hawng thlen cun zoi sim ttul loin kan Lai phun ni ti kan thei. Ziangruangah  a si pei. Tunah a voi 64 nak kan hmang cuarco thlang. Chin national day hi phunhnam  lamtual mawinak dingmen ih rak tuah a si pei maw?. Liamcia thuanthu pawl khal hling leh so lak ihsin kho suak ih tluang dang hnen ih pursum hlawhtling pawl calai thawn santhar nonawn pawl cun kan thei hnuaihno ve rero thlang a si. Chin pupa pawl hin an phunhnam sinsiahnak ih an hmanmi pualva nupa hin thuanthu tampi an rak nei. Pualva nu cun an nupa thinthi ko ih an hrinmi fano awpkeuh dingah an run siang sunglam a pan. Zohman luhve theih lo dingin a sunglam ihsin a theitawk in an sangka a khar. Ziangruangah tile an nupa kar lak ih a ttuan dingmi a thei a si. Apa khal cun inn sangpa sinak vekin thlisia, ruahsia le mihrang sahrang lak ah thitha suah in a nufa hrang ei ding hawli`n a tawivak ve. Hmanseh lamlak ih thil dang buaipi a neih thu an nu in a theih cun an run inn khamtung song in thiksia in a thih phah theu. Pa bik khali`n a ttuan ding ttuan suak na cingih an nu in val dang thilpek a lak a sile zoi kut ttul loin a thih cilh ttheu a si.

Kan leilungpi khali`n thuanthu a phunphun a neih vekin Chin phunhnam khali`n thuathu kan neive a si. Hmanseh kan pupa pawl cun tuini tiang indampi thei lo ruangah an ke neh thlun daan ding kan thiam nawn lo. Kan theih daan leh kan ruah daan in kan thlun cio ih a ttha ko. Tlakphar in a tur cakzet hmang loih a thihpi ttheu vekin pupa nunphung thuanthu thei pawli`n in liamsan ttheu ruangah theih ding tthittha um loin ttuan lai kan rel. Milai hi kan theinak le kan hmuhnak in in cangvaih ter ttheu. Theih ding le hmuh ding a um lo cun khawitawk in kan thawk ding ti theih a har zet. Eg: Kan lungrual lo ti kan thei hmanseh lungrualnak dingah ziangbik kan tuah ding ti kan sim leh fawn lo tvk…Tluangdang val bangin Li le Thal ttha kan neih lo ruangah in ttih lo hmanseh cung mangbawi zawnruahnak le zangfahnak thawngin Lai sulsuak vanrang dengah ttuanlai reli`n zalam kan leng zo. Kan thlennak kipah senhri, sokhlei, faizawng bangin parsuah thei dingah kan zuam a silen leitlun hi Lairam a cang thei a si. Zianghman nei lo raltlan sungkua ihsin tui dinhmun in thlenpi tu hi zo dang an silo Lai pawl ih kan biak mi Lai Pathian a si.

Kan khuasuah leh hauhnar khi zohhnik uh Lai lungrawn valza punnak sumtual a tu ahcun thin leh mau an kho thlang e..kan tho sal lo ding maw kan khua leh ram hrangah. Pupa pawl ih sul sah cia mi le lamzin an rak sialcia mi zawh a theihnak ah zawh in a balsiat (*min*) nak a um a silen lam zin dang kan hawl a cu thlang a si. A na fake tiih merem lawn lung inn ttha dinsal dingah kan lung kan thleng a cu. Kan pupa pawl cun hreitlung le tuhmui hum in kan suahsemnak lei ram tui dinhmun an thenpi thei vekin tthangthar nonawn in ziangvek tiang kan thlenpi theive ding. An phaitawn maw kan semnak Lai lungrawn suahsen laicin kan zahten ttan khaw uhsi. Laiphun hmailam ding cu tuini kan hman daandaan hi a si. Zirnak ah a san hman thei loin tui dinhmun kan thleng a si ahcun a san fiangfai zet ih kan theih tikah ziangvek tiang kan thleng pei. Lai nunphung sinak in cawisang tu le a hnuk hrampi cu calai le kan thuanthu hi an si.

Chin National Day avoi 64 nak hmangtu laicin kan zate hin thu feh thu tlung hmuh thiam dingah ttan kan khawh a cu. Kan rampi ziaza le ttongfang kan thlaktlenghnak ding caan a rei deuh lai ruangah an mah hruaitu kan si theinak ding cun ziang so a ttul bik. Khingsong tlak ih in ruatve nak dingah ziangso kan tuah ding. Leitlun hruaitu dingah hin Pathain in ruatmi a nei a si pei maw asilole an zirnak thawn hruaitu ah an suak sawn. Vanrang deng ih kan um khal le Laimi thotho kan si. Cuiruangah ziangtin kan ram tiih kawh ding kan neihve mi hrang kan ttuan khawm ding. Ziangtin kan sikhawm aw ding. Tuini vek hin kan ttuan ringring thei lo ding. Ziangah tile ziangkim hin caan an nei. Kan nunphung kan sinak kan upat theinak ding ahcun theih dingmi kan theih a ttul a si. Na theihmi kha tuisun pun khawmnak ah hin in sim aw.

Mi lennak mi fimnak sim rel men loin mi sim ding sawn ih ttan kan khawh a cu a si. Kut a nei nan cangvai thei lo. mit a nei nan a hmu thei lo pawl hnen ih thu rawn la tu pawli`n khawitawk tiang in thenpi thei ding. An zuamnak ih tui dinhmun an thlen thei ahcun Lai phun hin zuam sinsin dingla zingvek kan bang pei. Israel fate lamtluan dangcat dingah tipi in cahnak a nei lo. Hmanseh midang hrangah cun hacang tthialnak a si. Lai mino tho in ttuanve aw. Kan Pathian cun a hmu in a cangvai thei a si.  Solomon bang mai lalnak ram kauh sinsin dingah ruahnak kan neih a cu. Leitlun uktu hmaisa ram pawl ih hlawhtlinnak khal  khuakhang laireltu pawl cu Lai phun pawl ih Pathian a ttihzah tu pawl ruangah an si. Kan Pathain in in bawm sinsin ding zuam sinsin uh si. Kan biak Pathian hi zonzaih pi men loin lennak, cahnak le hminthannak ah hman a cu tuk thlang a si. Cuiruangah tuini lam tual a mawitu kan zaten Chin National Day hin ziangvek lungput in pek ve. Thu liam cia le ra thleng ding sih cih tertu ah, Laiphun thuanthu than sinnak ah, pupa nun mawi langter tu ah le ttan khawhnak ding kan thiamnak dingih karbak ah kan hman thiam a ttul a si.

Cuiruangah thulu ih kan sim zo vekin Laimi pawli`n kan tuah mi kipah sullam nei sinsin seh. Kan ttong nunphung kan kilhimnak dingah Chin National Day hi kan tuah in kan hmang sinsin pei uh. Ziangkim hin nunphung an rak nei, Lai pawl khali`n kan pupa nun phung thi lo ih semalh ringring ding hi kan hna a si.

By; J Pek

(Visited 62 times, 1 visits today)

Comments

comments

Comments

%d bloggers like this: