Lai Nunphung le Khrihfa Nun

LAI NUNPHUNG LE KHRIHFA NUN

(Tuitum, November 1-3, 2012, Chin Christian Community_Philippines, Lai Kumthar/Faang-er Puai ah hitivek in “LAI NUNPHUNG LE KHRIHFA NUN,” ti thupi-ropizet hmang in simreltlang le ruatkhawm tlang ding ah, tuanvo in laksak in cahram in ngansak tu, Stephen Vum Cung Nung, tlun ah lungawinak thu CCC_P hmin in kan lungawinak a tlun ah kan ron langter asi, Anthony B. LianThang)

Tulai ih Laimi Khrihfa pawl nundaan ka zoh tikah kan hlan nunphung le Khrifa nundaan ah kan buai phah ttheu in ka hmu. Khrihfa kan si hnuah Laimi pawl kan ruahdaan, hmuhdaan, theihdaan, pomdaan le kan nundaan tiang a dangaw thluh. Laimi sungah lungrualnak khal a um thei nawn lo hi kan ttong bangaw lo ruangah a sibik lo in ka hmu. Ziangah tile ttong bangaw ko nan lungrual theilo Laimi tampi kan um. Hlanlai kan pupa pawlih umdaan (nunphung) cu Satan kan biak lai ih nundaan a si ruangah Bible a lung/thluntu Khirhfa pawlih hman ding a si hrimhrim lo an ti. Cuih lai ah mi hrekkhat in hlanlai nunphung pawl hlo thluh lo ih kilkhawi ringring theinak dingah ti’n an caan, an thiamnak, an thazaang pawl suahin hnaan ttuan rero fawn. Ziangraungah hitivek in kan Laimi sungah zumdaan, hmuhdaan le nundaan tiang bangaw lo in kan um? Khrihfa kan si ruangah hlanlai ih kan nunphung pawl tansan thluh ding a si maw? Khrihfa kan si hnu khalah Satan biak lai ih kan pupa nunphung pawl hi, Laimi kan sinak a hlo lo nak dingah kilkhawi ciamco teh a ttul maw? Curuangah, nunphung hi ziang a si ih kan missionary pawl nih Lai nunphung hizingtin an rak hmu dah ti leh tulai Khrihfa pawlih kan Lai nunphung kan hmuhdaan pawl kan theifiang ih Lai Khrihfa pawl zohmawi zet ih kan nun theinak ding ruahsanak thawn hi cahram hi ka tarlang a si.

NUNPHUNG TIMI CU

Nunphung timi cu milai pawlih kan nundaan, kan umdaan, kan pomdaan, kan ruahdaan leh kan hnipuan hruhdaantiang a tel thluh. Ramsa pawl khalin an mai nunphung te an nei ve. An mai nunphung vek ten an nungih an tlangleng. Milai pawlin mah le nunphungkan nei ciar ih mai nunphung vekih kan nun lo ah cun ramsa pawl hman kan tluklo tinak a si. “Nunphung” hi ziang tikah a umthok? Nunphung cu Pathian a um thok ih sin a thok ve. Ziangruangah tile kan Bible sungih Pathain khal hi Amah ten nunphung a nei ve ih Amai sinak, a thil tuahdaan pawlin kan thei thei.

Milai pawlih kan nunphung cu minung kan um ve ten a um thok ih Pathian in Adam le Eve a tuah tikah hnipuan umlo, taklawng an si. Cuih taklawng an sinak (nakedness) khal kha a hmaisabik milai pawlih nunphung a si kan ti thei. Lausanne, Committee for World Evangelization ih cahram No. 20 sungah “nunphung cu Pathian in minung pawl hnenih a pekmi laksawng pakhat asi. Ziangkim ah Amah bangin in tuah. Sersiamtu a si ih Amah vekih thil tuahtheinak, them thiamnak khal in pek. Cuih minung pawl ih them thiamnak cun nunphung pawl a suahter” a si tin a um. Nunphung cu Pathian Amah in a thok lawng silo milai pawl hnenih a pekmi laksawng a si kan ti tikah kan pupa pawlin hlanlai ih khuasia, lungpi, thingpi pawl an biakmihi Pathian ih pekmi laksawng a si ti ve ding cu a har nasa. Asile hlanlai ih Laimi kan nunphung cu Satan hnenih kan ngahmi a si pei maw?

Myanmar Institute of Theology (MIT) ih tlawng sayakyi dah, Dr. Simon Pau Khan En in cun, “nunphung cu Pathian ih laksawng a si lo ih Satan hnenih kan ngahmi khal a si cuang lo. Nunphung cu Pathian in milai pawl hnenah famkimlozet ih a larnak (partial revelation of God) a langter sawn” ati.Kan pupa pawlih umtudaan tla hi cu kan zoh tikah Pathian duh taktak pawl an si ih an theihmi Khuazing/Pathian cu hmuh theih a si lo ruangah mitih hmuh theih mi pathain pawl an biaknak a si. Kumkhau a nung Pathian in kan pupa pawl hnenah hmuh theih in laraw bang ta sehla Laimi pawl in khuasia, khuavang, lungpi leh thingpi pawl an biak hrimhrim loding.

MISSIONARY PAWL HMUHDAAN

Lairam ih thuthangttha phurtu missionary pawlin kan nunphung cu Pathian hnenih kan ngahmi laksawng tin an hmu lo ih an rak hmuniam zet. Kan pupa pawlihnundaan thawn pehpar in Rev. Carson nih hitin a rak ttong dah. “Lai mi pawl cu zu an in tuk, an baal tuk, fih an nung tukih sahrang vek an si ruangah ttih an nung tuk” a ti. Sibawipa Dr. East ih Laimi pawl a hmuhdaan cu “Thim bembem! Laimi pawlih thim daan cu thil pakhat parih sidum hnuh tikih a dummi hnak in hman a dum sawn. Cubangtuk ih thim bembem mi in Lairam cu a khatih ruangah Laimi pawl kan ruun dingih thimnak hmuahhmuah kan hlon thluh ding” a ti. Cu lawng hman silo, Rev. Herbert Cope in tla “Laitlang hi Khrihfa ram a si theinak dingih lamzin umsun cu an nunphung hmuahhmuah hlo thluh ding kha a si” a ti.

Curuangah Laitlang ih missionary pawlin Laimi pawl an duhzet rungah ramdang ro ri’n an ra ih Laitlang ah harsatnak a phunphun an tuar nan kan nunphung cu an duh hrimhrim lo ih an hmuniam nasa. Hitivek ih duhdawtnak hi duhdawtnak diktak a si pei maw? John T. Seamands in thuthangttha sullam neizet ih kan sim duh ah cun “duhdawtnak le upatnak thinlung neih a ttul. Hmuniam le nautat hrimhrim ding a si lo. Ziangah tile fimthiamnak nei lo in ca khal thiam lo hman seh mi aa cu an si lo” a ti.

Laitlang ih um, British commanding officer, Major A. C. Moorenih cun Laimi pawlih laithuam cu a mawituk a ti. Missionary pawlin Laithuam ai ah an mai hnipuan fual (night gowns) pawl an thleng tum thluh kha a thei tikah a ui ih a pamhmai tuk. A cuih ramdang pawlih thuam (hnipuan) an sin ruagah vancungram thawn naih deuhnak le si ta lo. Khrihfa sinak ruangah Laimi pawl an ning a zak dingih miphun duhdawtnak thinlung tla an nei nawn lo lai ding tin a rak ttong dah. Kan Lairam ih missionary a silo mi pa sawn in Lai nunphung a mawi zia le tthat zia a sim sawn. Rev. Thang Tin Sum khalin midang pawlihLaimian hmuhdaan thawn pehpar in thusuhnak le thulehnak a neih mi cu:

Ziangrungah san na man lo in ti? Mi tampi, nauhaak, nunau, sual nei lo pawl that theinak Hydrogen bomb ka tuah thei lo ruangah maw?

A si, mi thiam ka si lo. Ziangah tile seconds malte sungah mi tampi ka that thei lo. Ka naam le ka thal thawn mi pakhat cu a that thei ih nauhaak, nunau, mawh neilo pawl cu ka that dah lo, ka raal pawl lawng ka that.

Ziangruangah na thangso lo in ti? Kiang le kap, thingkung hramkung le rannung, harsatnak a phunhun pek thei, siatsuah thei thilri pawl ka tuah thei lo ruangah maw?

Cuti a si ah cun ka si ko. Leilungpi siatsuah thei thilri pawl ka tuah thei lo. Ka tuah thei mi pakhat cu fa le pawl an nunnak dingih tulzet mi pawl, an hman ding thilri pawl lawng ka tuah thei.

Hlan lai ih kan pupa pawlin an nunphung cu missionary pawlih hmu vek cun an hmu hrimhrimlo ding ka zum. Paul G. Hiebert cabu sungih ngan mi, Magaret Mead hnen ih a cawih mi cu “missionary pawl cu nunphung an ti thleng ttheu ruangah an duh lo ih mitha lo an si” a ti kha a diknak lai a um. Ziangah tile missionary pawl cun rundamnak lawng silo in a ttha deuh mi nundaan khal pek cih an tum ttheu rungah a si. Mi tamsawn in Laimi pawl cu Pathian kan theih hnu lawngah fimnak lamah an tthangso tin an zum. Pu Hrang Tar in cun Laimi pawl fimnak lamih kan tthangso cu Khrihfa kan sinak ruangah a sibik lo. Khrihfa ram silo mi pawl tla fimthiamnak lamah an tthangso thotho tin a hmu ve ih Pu Hrang Tar hmuhdaan khal hi a sual ciamco lo in ka hmu.

Roger S. Greenway in “mission hnatuantu pawlih hlawhtlinnak cu ziangzat tiang missionary pawlin an nunah thlengaw duhnak an nei ih an thlengaw theinak ah a um” ti a si tikah Laitlang ih kan missionary pawl cu Greenway ih tivek cun an hlawhtling lo tinak a si. An hlawhtling a si kan ti khal le a dikmi hlawhtlinnak a si lo ding a bang. Ziangah tile anmah sawn thlengaw tum lo in Laimi pawlih nunphung thleng thluh ding an tum sawn. Laimi pawl cu Pathian a duhtuk mi miphun kan si ruangah missionary pawl in hizat tiang hlawhtlingnak an hmu ti seh la a sual lem lo ding.

TU LAI KHRIHFA PAWLIH HMUHDAAN

Aliamcia mikum 1992 lai ah Yangon veikhat ka thleng dah. Keimah lawng ka si lo ih Falam khua in mipum 40 lenglotla an tel. Yangon khuapi ah ka thleng ve cu a nuam ka ti tukih mithupi zetah ka ruataw. Cuih ttumah cun Kawlram Acozahpi ih tuah ringring ttheu mi Union Day (Pyidaungsuh Nyeh) ah kan Lailaam pawl kan laam ruairo kha cu thupi tuk in ka ruat. Asinan 2000 kum, Yangon ih Falam Pawlpi Fanger Puai ah thu danglam zet mi pakhat ka thei. Pastor pa pakhat cu colhni zing khawmnak ah a member pawl “Lai laam tivek nan laam hrimhrim lo pei, ziangah tile Lai laam pawl cu kan pupa pawl khawsia biaknak thawn pehper ih ra mi a si ruangah khawsia ta a si” tin pulpit par in nasatak in a sim ih thucaknak a nei. Ka rualpa thawn Falam Fanger Puai ah cun kan tongaw ih Falam tlangkulh sungih um hnam tin in an mai laam te an laam duaido ka zoh ih ka lung a kim na sa. Myanmar Union Day ih kan laam lai ka mang sal rori. Cuti ih ka rualpa thawn Lai laam mawi taktak pawl kan zoh rero lai ah ka rualpa cun mangbang nawn in i zoh ih, “zoh hnik aw! A hmaisabik ih pa khi pastor a si lo maw si?” tin in sut. Kei khal in “si tuk pan teh. Pastor hmanah pastor menmen a si lo. Reverend so khaw a si” ka ti. Ka rualpa cu a khuaruah a hartuk lawmmam ih “ziang tin kan pastor pa cun Lai laam pawl hi khuasia biaknak ih a ra mi Satan ta a si a ti lai ah, hi pastor (reverend ) pa cun an maih hnam laamnak ah a tel lawng si lo, amah ro ri’n hmaisabik ah a hruai ih a laam ve” a ti.

Pathian zangfahnak ruangah 2006 kum, tthaal tlawngpit ah ka M.Th thesis hrangah interview nak ka tuah ih Laimi Pathian hnatuan, rinsantlak zet mipa ka tong thei ih ka lungkim na sa. Kan Lai nunphung thu thawn pehpar in kan biakaw ih a sim mi pawl tuni tiang ka hngilh thei lo. “Laimi Khrihfa pawl ih ‘sual’ kan hmuh daan hi cu a cang thei hrimhrim lo. Zu in, kuak fawp, kuva ei, tibur hmawm, raja hmawm tivek lawng hi Pathian ih duh lo mi ‘sual’ a si tin kan ti. Asinan ramdang feh theihnak dingih thuphanper, u nau tla nupi pasal ih tuahaw tivek pawl cu ‘sual’ ah kan neih lo. Zu tla cu hlan lai ih kan pupa pawl an damnak, an thazang le nunsau tertu a si. Curuangah kei cu zu in hi sual ciamco in ka hmu lo. Ka taksa damnak ah zanriah ei ding tin ten ka in theu” a ti. Tulai ah kan Lai nunphung zingzoitu pawl in zu in hi sual a si lo. Kan pupa pawl san lai ih an neih ringring mi a si ih kan nunphung a hlothluh lo nak dingah kan kilkhawi a tul titu tla an um. Pu Duh Cung Nung in “kan Lai nunphung hlo lo dingih hnatuantu pawl cu Khrihfa hrekkhat in vanram hman an thleng lo ding an ti” a timi kha a dik nasa.

THUNETNAK

Laimi ka sinak le Khrihfa ka sinak ruangah Pathian ka thangtthat ih harsatnak phunphun tuar lawng si lo, nun tiang pekih thuthangtha phurtu pawl hnenah tla lungawinak tampi ka nei. Nunphung cu Pathian ih pekmi laksawng a si ih cuih laksawng cu them thiamnak asi. Cuih them thiamnak nih cun nunphung dangdang a suah ter. Kan pupa pawl cu harsatnak, damlonak leh siatsuah theitu pawl ni tin an nun ih a umlonak dingah cuih them thiamnak in khawsia pawl lungawiter ih biak hna a thiam ter. Cutivek in Laimi pawl Pathian kan theih hnuah in pekmi themthiamnak hin Pathian a lungawter maw? Tulai Khrihfa hrekkhat pawlin kan nunphung cu Satan hnen ih ra mi a si ti’n kan hmuhnak hi cu kan missionary pawl ruangah a si bik ding ka zum. Pathian in milai a tuah san cu amai sunlawinak ding le amah ti lungawiter dingah a si. Paul khal in I Corinthians 10:31 ah “nan ei ah siseh, an in ah siseh, ziangthil nan tuahmi kipah Pathian sunlawinak hrangah tuah uh” a ti. Curuangah tulai Khrihfa pawl in kan nunphung hlo lo dingin hna kan ttuan ih kan kilkhawi rero mi, Lai daan ten thil kan tuah ttheu mi, kan tuahmi ziangkim hi Pathian sunlawinak ding ah si seh ti lungput thawn kan tuah maw?Paul in cun “Pathian hnenah lungawinak pe tahrat in rawl ka ei si khawh, lungawinak pek hnu ih rawl ka eimi ruangah ziangah so mi in in relsiat duh rero?” a ti (I Cor. 10:30). Paul vekih lungawinak pek hnu ah Laimi pawl Lai daan ten thil kan tuahmi pawl hi a sual pei maw?

Khrihfa pawl cu Jesuh in miphun kip hrangih CITE le TLEU ( Matthai 5:13-16) nan si in ti ruangah kan sinak thei awih ziangkim kan tuah ah kan alnak le kan tleunak pawl midang in an tep ih an hmuh theinak dingah ziangkim kan tuah a ttul. Cutivek ih kan nun theinak dingah Pathian in them thiamnak in pekmi hmang in sia leh ttha kan thleihdan thiam a ttul. Cuti ih sia le ttha kan thleidan tikah kan maih thinlung si lo, mi dang thinlung sawn zoh ih kan tuah a ttul (I Cor. 10:29). Zu kan in mi hi Pathian sunlawinak phen tu a si ah cun in lo ih um mai ding kan si. Kan pupa pawl in an theih tawk in miphun le ram damnak dingah an theihnak le an thiamnak pawl an hmangih khuahrum, khuasia pawl an lungawiter ih raithawinak an pek vekin kan nih tuih san ih nung Laimi pawl khal in kan theihnak, kan thiamnak pawl hmang thiam ih kan biakmi a nung Pathian lungawiter tu kan si cio ding a thupi zet. Laimi diktak kan si ah cun Pathian hmin a sunglawi sin theinak dingah ziangkim tuah ih nung ding kan si. Laimi pawl fimthiamnak lamah kan tthangso kan ti ko nan kan fimnak, kan thiamnak ruangah Pathain a lungawi lo pang ding a ttihnung tuk.  Babel lungdawl thuanthu kha kan cing ringring pei. Midang thinlung sawn zoh in sia leh ttha kan tthen thiam ih kan nung a si len Khrihfa ih alnak leh tleunak cu mi hmuahhmuah in an tep ih an hmu thei ve ding si.

THUSUHNAK

  • Kan Khrihfa nun le Lai nunphung thawn pehpar in ziang tin na hmu ve?
  • Ziangruangah Laimi sungah kan thil pomdaan, hmuhdaan pawl a bangaw thei lo ih kan lung a rual thei lo?
  • Laimi kan sinak (kan identity) a hlo lonak dingah ziang tuah ding si a thupi bik?
  • Ziangtivek in Laimi pawl kan nunphung le Khrihfa nun ah kalhaw lo in le mawizet in Pathian sunlawinak dingah kan nung thei ding?
  • Laimi pawl tuih kan umdaan ciah in kan feh vivo len hmailam ah ziang kan bang pei? Laimi pawl hi ziangvek in kan um/kan nung len a thabik ding tin na ruat?

Stephen Vum Cung Nung

CABU RONMI PAWL

East, E.H. Burma Manuscript. Edited by C. Thang Za Tuan. Yangon: CLC Book Press, 1996.

Greenway, Roger S. Go and Make Disciples. Andhra Pradesh: OM books, 1999.

Johnson, Robert G. History of the American Baptist Chin Mission. Vol. I. Pennsylvania, U.S.A: Published by the author, 1988.

Mead, Margaret. “New Lives for Old.” New York: Mentor, 1956. Quoted in PaulG. Hiebert, Incarnational Ministry: Planting Churches in Band, Tribal, Peasant, and Urban Society. Grand Rapids, Michigan: A Division of Baker Book House Co., 2002.

Mung, M. Kham Do. Seeing God’s Revelation in The Traditional Concept of the Zo People. M.Div Thesis, MIT, 2000.

Nung, Duh Cung. Lai Nunphung. Tahan: Falam Chin Christian Literature Society, 2001.

Seamands, John T. Tell It Well: Communicating The Gospel Across Cultures. Chennai: Mission Educational Books, 2003.

Sum, David Lai. Naming God in Burma Today. D.Min. Thesis, Chicago University, 1994.

Sum, Thang Tin. A Wounded World: A Tribal Perspective on the Modern Society. Yangon: Published by the author, 2001.

On-line Resource

Lausanne, Committee for World Evangelization. “Transformation: The Church in Response to Human Needs.” [article on-line] (accessed on July 9, 2009). Available from http://www.Gospelcom.net/Icwe/statements/wheaton85.htm

Comments

comments

One Comment

  1. Hivek in cathatha in hlawmtu Stephen nan tlun ah lungawinak tumpi keimah pulpak ka neihthu ka asim. Pathian in kan laimiphun cawisangtu ah lo tuah vivo hram seh.

    HImi paper hi, Chin Christian Community_Philippines, Falam miphun Philippines ram ih tlawngkai unau kan zaten hmunkhat te ah, Laikumthar/Faang-er puai, Nov. 1-3, 2012, ih kan ruah aw mi paper asi, Kan lungawi in kan nuam tlang zet.

    Himi paper hi rak siar tengteng aw, na thei lo mi thutampi na hmusuak ding, cun na theifiang lo mi le na thei duhmi a um a si le, na sut thei a si ti ka ron sim duh.

    Anthony B. LianThang

Comments

%d bloggers like this: