Lai Mino Lam Pial Tum Ka Hmu, Lungphang Le Riahsia In Ka Khat

-Uk Lian

Kan dung zarh ziat hman ti lo ahkhan online parah cangan danglam zet pakhat ka hmu ih ka riahsia ngaingai. Ka siar vete’n ka thin a kuai zet. Lai mino pakhat ih canganmi a si. Catlang tawi zetih nganmi ca a si. A canganmi cu Pathian nung a um ngaingai le um ngaingai lo a rinhlelnak thuhla a si. Midang ih fuihnak ih a nganmi a silo zia, ka siar veten ka thei cih thei ko. Amah vek kan Lai mino lakah ziangzat kan um hrih ding timi ka thinlung ah a um. A zumnak le a khawruahnak a ngan lang ngamnak parah ka hlut zet fawn.

Kan Lai mino pakhat, Pathian nung biaknak ihsin a pitling ngahmi, tuini tiang Pathian nung a be rero lai mi in Pathian a um ngaingai ding a zumlo lemlo thu le a thinharnak a nganmi hin ka thin i zun nasa. Ziangruangah cuvekin a ringhlel ti asile, a zummi a Pathian nung a rak thei ngaingai lo a si thei. Pathian nung ih duhdawtnak, a thatnak le a umpinak hi a rak co ngaingai lo tla a si thei. Cun, a thinhar tuk nak ruangah Pathian umpinak a ruahsan thei nawnlo tla a si thei ko. Ziangasikhalle, a nunnak ah Pathian nung umpinak a ringhlel ti kha cu a fiang mi a si.

Zarh hnih khat liam thotho ah US ih ka rualpa David Nun Tho thawn phone in reipi kan biakaw. Thil tampi kan relmi lakah, tuini tiang ka thinlung ah hma vek in a caam mi thu a um. “Ukte, US ah Lai mino Pathian zum nawn lo tu an tampi so khaw” I timi ka lung sungah a dam thei nawn ding ka zumlo. I sim lai ahcun mangbang le thin buai vekin ka awkam ka tuah lo nan, ka thinlungah nat pakhat tuar vekin a caam.

Ziangruangah manhlap tukin Lai mino lam kan pial tum, ziangruangah cutluk zamrang in riahsiatnak kan tong cih tiah ka lungsia zet. Same sex marriage a laar ciamco lai ahkhan mino pakhat hnih hnen ah an ruah daan ka rak suthliah tikah an lungkimpi ve thu ka rak thei dah zo. Mino tampi Pathian lam ah kan pekawk rualrual in mino siarcawklo in kan Pathian biakmi ziangvek a si timi ngaingai kan thei lo lawlaw a si. Pathian thawn biakawknak ngaingai khal kan nei lo timi hmuh a theih sinsin. Pathian duhdawtnak le a thatnak theifianglo tu cun a parah ruahsannak a nei thei lo hrimhrim ding ti cu kan fiang theh ko.

Minung in kan theihfiang lo mi cu kan rinsan ngam ngaingai dah lo, kan mi rinsan mi velceng cu rinsan ve tak cu kan si. Pathian a thei ngaingai lo tu pawl in Pathian an rinsannak ding sullam pakhat khal a um lo. Curuangah Pathian kan ringhlel asi ahcun Pathian thawn kan pehzomawknak a cat ti tlukin a sia zo tinak a si. Kan nulepa ih zumnak le sakhuanak pompi cih mino kan tam. Zumnak cu bulpak te ih tuah dingmi a si. Kan Pathian biak mi hi, thlacamnak in a aw kan thei maw, bualpak in Pathian kan thei fel ngaingai maw, kan theih fel lo ahcun hma khat te ah kan riahsia in, ka tlusia ringring ding. Pathian thangsiattu hman ah kan cang sawn thei riangri a si.

Curuangah Laimi no na zumnak lam pial hrim hlah. Na thinlung thlacamnak thawn Bawipa biak aw. Bulpak in ka lo thei duh, na duhdawtnak le I umpinak a thar in theih ka duh ti’n ko sal aw. Thinlung takih Pathian bomnak a diltu an hlawhsam dahlo.

(Visited 160 times, 1 visits today)

Comments

comments

Comments

%d bloggers like this: