Lai Ṭong In A Daih Lo

– Uk Lian

Mirang ṭong ih, hla mawi zetzet kan ngai mi, biazia mawi zetzet kan siar mi le ca ṭha zetzet kan siar ngah mi pawl Lai ṭong in simfiang kan tum tinten “Kan ṭong in a daih lo” kan ti ringring. Tui’ Mirangca kan timi, Mirang ṭongfang pawl hi Mirangca a si thluh lo, miphun dang ṭong an lak sakih Mirang ṭong ih an can termi a tamsawn a si.

Mirang pawlin Greek, Hebrew le miphun dang pawl ih ṭongfang pawl an cawng ih English ṭong ah an suah sak. English ṭong tiah kannih pawl in kan rak hmang. English ṭong hi cu, a va thuuk ve tla kan ti ṭheu. Anmah English pawl ṭongfang ngainga cu kanmah vek, ziangkim an duh vek ih simfiang daihnak ṭong bungrua hman an rak nei ce lo. Asinan, miphun dang ṭong, mawi zetzetin hman sak daan an thiam ruangah leitlun ah Mirang ṭong hi thuuk zet le kau zet huap vekin kan thei asi.

2017 ih US Falam Calai seminar ah Dr. Kenneth Van Bik in Mirang ṭong 60% cu miphun dang ta an lak mi a si thu a sim. Tui’ Falam ṭong kan timi tla hi, leitlun miphun hmuahhmuah ṭong kan lak khawmmi a si ve. Kala kan timi India ih phun-u pawl Vai pawl le kan Falam tong tla cu, a bangaw tam nasa. Sammehnak, “kaihci” tla kha “kaihci” an ti ve ih, umzia neilo an ṭong tikah “Mat-lap” um lo an ti ve. Kannnih khalin “mat-lap” timi ṭongfang kan hmang ve. Kan thinheng caan ah “sala” kan ti’h himi hi Vaipawl ih ṭong uarbikmi pakhat a si ve.

Falam ṭong kan timi lakah Kawl ṭong khal tam tuk kan hmang. Tahṭhimnakah, camibuai a sung tivek, rak bet vivo awla. Falam ṭong ah English khal kan hmang tam nasa. Special thlacam tivek, na style tuk tivek, meeting kan nei ding tivek, nan ready zo maw tivek, rak bet vivo awla. Falam ṭong kan timi hi, Falam ṭong hmang pawl ih ṭongfang lawng cun miphun pitling ṭong ah a cangsuak thei lo lawlaw ding. Curuangah, miphun dang ṭong mawi tete le rem zetzetmi pawl kan lak sawng thiam vivo a ṭul. Tui’ Falam ṭong ah kan unau Tidim ṭong khal tampi kan hmang, Mizo ṭong khal kan hmang ih miphun kip ṭong kan hmang rori ko.

Cuangah Falam ṭong a hmangtu pawl in, Falam ṭong hi a karh sinsin thei dingah tuanvo kan nei. Cu rualrual in Falam ṭong hi hloral vivo, tenau vivo ding khalin a tong hmangtu pawl lala in kan tuah pang thei. Curuangah Falam ṭong kan timi kan lian ter daan ding, kan pitling ter daan ding ah ziangvek thinlung kan nei ngam timi a thupi. Dr. Than Bil Luai ih a simmi thinlung neh zet pakhat ka cing lai. Tong hi sersuah ciamco hnakin, tong um-cia hman thiam ding a timi hi pomrem thiam a ṭha. Curuangah ṭong hi a ser ih ser suah ciamco hnakin, ṭong umcia mi, Kawl, Mirang, Vai le miphun dang ta hmansak thiam daan kan zuam a ṭul.

Tong hi sersuah ciamco le polsuah kan tum tuk asile, Facebook timi tla kan let tum dingih, phone tla kan let tum ding ih computer timi tla kan let tum dingih zohman in kan hmang peh ngai cuang lo dingih kan rethei aw ter thei. Online tivek tla leh ngaihnak a um lo. Company hmin letlin tum thawn a bangaw zik thei. Curuangah a um cia mi leitlun ṭong pawl sawn hi kan Falam ṭong thawn milaw dingah kan hman thiam sawn a ṭul. Asinan, Midang ṭong pawl kan lak thiam hlan ah tui’ kan neihciami tongfang pawl le pipu ṭong khuun, pipu zaihla pawl tla hi theihfel le hman ṭangkai kan thiam hmaisak a ṭul.

A hnuai ta pawl hi rel khawm sehla….

Falam ṭong a hnget, a pitlin sinsin theinak dingah ziangvek cin in miphun dang ṭong kan hmang khawm ding.

  1. Miphun dang ṭong Falam tong ih kan hman thok daan ding le kan ngan daan ding pawl tla ziangvekin a si ding.
  2. Falam tong a karhhzai theinak dingah ziangvek in a tong hmangtu pawl an thinlung an timtuah ve ding?
(Visited 158 times, 1 visits today)

Comments

comments

Comments

%d bloggers like this: