Laarnak (Popularity)

October 10

Nipi Ni

Laarnak (Popularity)

Siar:

John 6:60-69

Curuangah Jesuh dungthluntu miseenpi cun kir in an tlansan. – John 6:66

Kumkhat Sung Baibal:

Isaiah 34-36

–   Kolose 2

Hminthannak le laarnak cu a hmun ringring lo. Naingnganzi tama bangtuk a si. Anmah a hriltu mipi in an hrillai ih an thuken le an policy pawl ziangti’n an kaihnget ti an zoh ringring. Duhtu tampi an neih khal asile nuamte te’n an ttuan sungah an laarnak a ttum vingvo ttheu.

Jesuh khal a laarnak nasazet in a ttum vingvo dah ve. Amah uartu an tambik caan le a hminthannak a luzik a thlen caan cu mi 5000 rawl a do in a si (John 6:14-15). A thu ngaitu pawl hnenah, “Vancung in a rungmi ka si” (c.38) ti ih a sim hnu ah a laarnak napi’n a tlak. Hi pa in zo ka si tiah a ruat aw a si pei? tiah an ti (c.41).

Jesuh in vancung ih a rung ttummi sang nung ka si. Zo khal hih sang a ei ahcun kumkhua a nung ding (c.51-52) ti a sim hngai hnu in a hminthannak cu a ttum sinsin. An theihmi ruangah an lung a let ttheh ih, “A thu zirhmi hi a hartuk. Zoso a thei thei ding?” tiah an ti (c. 60). Curuangah mi tampi in an fehsan. Mi burpi in an duhmi ngah duh lawngah an thlun. Jesuh in an ttulmi le an duhmi a pek tik lawngah an lungawi. Pumpek ding a dil hngai tikah an duh nawn lo.

Jesuh in a dungthluntu pawl hnenih a suhmi cu, “Nannih teh tlan nan duh ve maw?” ti a si (c.67). Cutikah Peter in, “Bawipa, zo hnenah so kan feh cuang ding? Kumkhua nunnak ttongkam a neitu cu Nangmah na si,” a ti (c.68). Zumtu unau, nang teh Peter vekin midang ih Jesuh an hmuh daan hnong tahrat in rin-umzet in nitinte Jesuh na thlun ve pei maw?   – C. P. Hia

Nunnak sullam fiang thei dingih hawltu in,

Lamzin pakhat lawng in an hmu thei;

Pumpeknak thawn Bawipa riannak,

Nitin Amai’ hrang nunnak in.    – Branon

Khrih hnenih pumpek awknak cu

nitin in fialmi kan ttuanvo a si.

Comments

comments

Comments

%d bloggers like this: