KUMTHAR SERMON 2009

Duhdawtmi Unau zate,
Nan zaten kumthar cibai!
2007 ah Saam 90:12 hmangin Kumthar thucah ka rak thlah.
2008 ah Kumthar Vangro ti thulu hmangin sermon tawi ka rak thlah sal. Vangro mawi zet suak thei dingah color zaten an tanrual a tul vekin cumi tanrual theinak ding ah tuikum 2009 ah “Cencilh nun” “pawlkom nun” timi tawi tekti ten ka rak thlah sal.
Thlacamnak thawn thazang lak tlang ding ka lo sawm hai.
Zokhal ka sungah a um ih kei khal a sungih ka cencilh mi cun rah tampi a rah ding; ziangahtile keimah tel lo cun zianghman na tuah thei mi a um lo (Johan 15:5).

A tlun ih kan siar mi Johan bung 15 hin zumtu nun ah ziangtin “rah” tampi a rah thei ding ti simfiang a tum. Cumi dingah, Jesuh le Pathian catbanglo ih an pehzom awk vekin Jesuh le a dungthluntu (zumtu) pehzom awk a tulzia Sabit kungpi le a hnge pehzom awk dan hmangin mitthlam ah cuan ter a si. Hitawkah, cencilh timi hi um ringring, pehzom ringring, asilole pawlkom ringring tin kan sim thei ding. Cun “ringring” timi cu a pehzulh ih tuah vivo, cawlh ti ni um lo tinak a si. Zarh khar thla khat kum li-nga lawng silo in nisa ruahsur hrial lo ih cencilh, kaihhnget le zom awk ringring a sim duh mi a si. Nupi pasal vek sisehla cu, mak le tthen um lo ih thih tiang um tlang ringring/vivo vek khi a si kei cu! Hih “pawlkom nun” thawn peh-aw in American ralkap McDaniel ih Vietnam ral lai, thawng inn sungih a tonteh mi nun thlalang ah hmang in malte run tarlang ka duh.

Vietnam ral lai ah Captain McDaniel cu an kaih ngah ngelcel ih tlakrawh inn thim nawn sungah thawng an thlak. Har a ti bik mi cu taksa ih vuak le thawi, hremnak a tuarmi hnakin “ziangtik hmanah zo thawn hman biak awk lo ding” tiah dan khohkhah zetih an kham mi hi a tuar thei lo bikmi cu a si. Kan theihcia vekin Communist pawlih hriamhrei tha bik cu zodang thawn be aw lo ih “phirhlim” ten miret hi a si theu.

McDaniel ih sim vek asile thawngtla pawlin pehtlaih awknak thuthup an nei ih zanthing maw thil pakhatkhat khawn, talh awn ih veiziat khawn le ziang a sim duh ti number thuthup a si. Ni 30 sungih cumi number thuthup an zir ngah lo a si ahcun thawngtla pawl cu biakawk a ngah lo ruangah nuamteten an thinlung a phusuih vivo ih lileng umhar le beidong in an um ih a rei tuk hlanah “ruahsannak” nei nawn lo in nun paih nawn lonak an nei mai ih cutin lungmawlh in an thi hlo thluh theu ti a si.

Himi in zumtu pakhat le pakhat pehzom awk, pawlkom awk le pehtlaih awk ih ton awk le thazang pek awk “ringring” a thupit zia hmel a cuang ter pam in ka thei. Hih pehtlaih nun hi Jesuh dungthluntu pawlih nitin nun cawmdawltu le zumtu taktak an sizia phuanlangnak tha bik a rak si taktak. “An zate in tirhthlah pawl hnen ihsin an zir ih, tirawl ei tlaangnak le thlacam tlaangnak thawn pawlkomnak an nei ringring(Tirhthlah 2:42). Cun, Pathian in minung a sersiam tik khalah amah Khawzing Pathian thawn pehzom ringring ding (Thup. 21:3) lawng silo in kan minungpi dang thawn pehtlaih aw ringring ding (Eccl 4:9-12) ih sersiam kan si hrimhrim.

2009 kumthar sungah paksai nun, peu nun le mah fimbik thiambik ih rinsan awk nun, mi ziang siar lo nun tanta in, kan umnak dangin kan sinak bang aw lo hman sehla Khrih ah kan pehzom aw thluh thotho ruangah, a hnge a tek men ah buaituk lo ten kan nunnak sutpi Khrih ah fumkhawm aw ih khat le khat dawtnak puan kan zar le Pathian a sunglawi sin dingih kan zaten thlawsuah co tlangin rah duhnung kan suah thei ding a si. Na thlennak kipah zumtu dang thawn pehzom le pawlkom ringring theih hngilh pang kei ci!

Bawipan Kumthar thlawsuah lo pe sin hram seh. Amen.

Nan hnatuanpi

ATH

Comments

comments

Comments

%d bloggers like this: