KUM ZABI 21 IH THU RUAH DAAN THAR

KUM ZABI 21 IH THU RUAH DAAN THAR

Thawng Bik
Thuhmaihruai

Caan theihthiam hi fimnak thupizet pakhat a si. Caan zoh leh theihthiam lo ruangah a qullomi buainak pawl a suak ih tuahduhmi pawl tuah theilo in mah le mah hnaihnoknak tla a suahpi thei. Leitlun huap (global) ih caan kan theih a qulvek in tualsuak (local) ih caan khal kan theih a qulzet. Mai’ cangai khur sung ih tidaan lawng in a ngah nawnlo vek in Cangai khur leng ih tidaan lawnglawng khal in a cang thei nawn lo. Kopter thiam ih ruahthiam a qulzet thlang.

1.San Umdaan tawite:

Leitlun ah san san (3) kan nei:
1. Santhar Hlan (Pre-Modern)- Kum Zabi 18 tiang,
2. Santhar (Modern)-Kum Zabi 18 ihsin 19 Laifang hrawng,
3. Santhar Hnu (Post-Modern)- Kum Zabi 19 lailak ihsin tuini tiang pawl tla an si.
Kum Zabi 21 cu Santhar Hnu (Post Modern) timi sungah kan lut zo. Kum 2010 cu phundang zawng in, Kum Thawngbi (Third Millenium) Pathum a thoknak, Kum Zabi (Century) Kulhluan Khat ih a hmaisabik Kum Sawmbi (Decade) Pahra a cemnak kum a si. Hih Santhar Hnu timi san ah Laimi khal in kan ruahcih dingmi tete kan nei tiah kan ruat.A tlanglam vek in a tlangpi thu in kan zohtlang hnik pei.

2. Santhar Hnu thuruah

Alvin H. Toffler in “Santhar Hnu (Post-Modern) ahcun:
Khuul (speed) kiah a theih nawnlo.
Thlun ding daan pawl (rules) a um nawn lo.
Khiahri pawl (boundaries) a nein awn lo” tiah a ti.
Asinan Laimi tlamsawn ih kan tualsuak (local) sinak ahcun ti feekfeek, le rikhiahmi tamzet kan neih hrih. Himi lakah mifim tampi in an peekmi ruahnak qhabik cu tualsuak (local) tukkhal silo, leitlun huap (global) lawnglawng khal silo in “tualsuak-leitlunhuap” (glocal) ten fehthiam hi Santhar Hnu (Post-Modern) ih thuruah le tidaan qhabik a si an ti.

3. Natnak thar MIDS

Kum Zabi 21 ih suaktharmi nat tiah Thomas L. Friedman in a sim. Milai pawlkom, ram pakhat lole pahnih ih tum pawlkom pawl ih thuruah daan (thought forms) thawn a pehparbik. Theih olnak dingah AIDS cu Acquired Immcne Deficiency Syndrome ti a si ih MIDS = Michnochip Immune Deficiency Syndrome an ti. AIDS tuar theinak qumsuk testunat tiah a tawinak in let sehla MIDS cu michrochip tuar theinak qumsuk tertu nat a si ding. Information Technology (IT) san ih computer michrochip timi cetthilri te ih hnaquannak le tidaan man nawn lo ruang ih a suakmi thinhar natnak a si.
Zovek pawlkom, pumpaak le hnaquannak khalah a suan awk theihmi nat a si fawn. Thuruah daan asilole hmuhdaan thawn a pehpar aw bik. Idea Sclerosis “ruahnak haakkhalnat” ti khalin kawh a theih. Cuih nat hminsinnak pawl tla cu:

3.1. Ding-thlur thuruahnak

(Linear thinking)

Pakhat qheh in pahnih, pahnih qheh in pathum… tivek ih thuruah a si. Mizaan ah hitin a cang dah, tuini hitin a cang rero ih thaisun ahcun hivek rori a cang ding ti ih a thlur-ding zawng ih ruahnak a si. IT san hlan ahcun a dik ve zet nan IT san hnu cun san a man nawn lo. Ziangah tile Peter Drucker timi pa cun IT hlan cun san hi a peh aw nan tuisan cu “Peh aw nawn lo San” ( Age of Discontinuity) ah kan um a ti. Tontehnak (experience) hnakin thluak (Knowledge) thupi ih ret san kan luh ruangah a si a ti. Tifeekfeek ih thuruah a tumtu cu MIDS nat neitu a si zo.

3.2. Asilole thuruahnak

(either – or logic)

Zianghman umlo (none) timi le a zate (All) timi lakah sinak tamzet a um thei. Tt, malte, tawkfang, a tamsawn, a zate zikzik tvk. Sinan karlak ih thil um thei pawl tan in “ka rual” na silole “Ka raal” tivek ih ruahnak in ciah nehmi kan si le MIDS nat kan nei tinak a si. A dum silole a raang tengteng ti vek silo ih rong dangdang a um thei ti khal theihcih a tul.

3.3. Liamcia caan ngai thuruahnak

(nostalgia)

Caan pathum liamcia, atu, hmailam lakah “atu” le “hmailam” hnakin “liamcia” caan lawnglawng ngainak a si. Thilthar cohlang thei ?? ti khal in kan ko. Hmailam cuan hnakin dunglam cuan ah a tui aw deuh qheu. Biaknak lam ah sile “an nih san lai ahcun” “kan quan lai ahcun” tvk ih liamcia caan hlamsal ringringnak nat a si.

3.4. Lung sangka phit thuruahnak

(Closed minded thinking)

Fim tlanglo (half-educated) pawl hnenah a um duhzet mi nat phun khi a si. Famkim le theibik ah ruat aw pawl hnenah hmuh a theih. Thuhla thar, tidaan thar a suah tikah maih ruahdaan thawn rak zohqhim. A nai aw nawn le “a qha paam” tithei, a hlat awk pang ahcun “luthiing” phun thuruah a si. Kan tawk kan famkim, kan dikbik, thilthar dang kan qul nawn lo ti ih thinlung sangka phurpit ih thu ruah daan a si.

3.5. Tengteng thuruahnak

(For Certain appnoach)

Kan hlawhtling “tengteng ding”, “a si tengteng”, “a cang tengteng” tivek ih thuruahnak a si. Thinlung thapeknak ahcun thil qhazet a bang nan a taktak ah a cang tengteng, hlawh tling tengteng lo hi a tam aw duh sawn. Tengteng tivekin kan pok veten sikher lo theinak (uncertainty) le kekkuai theinak (fragility) pawl kan tansan tluk a si. IT san hrangah a peeng zomi, a mil-aw nawn lomi thuruah daan pawl an si. MIDS ih natnak langnak phunkhat a si ve.

4. MIDS nat canglo dingin:

Thomas L. Friedman thotho in damnak ding sii a hmuhsak. Cucu, “mah le mah cekfel-zoihnitawknak” (introspection) a si a ti. Zohsalawknak menmen silo in dingfel (honest) zet ih mah leh mah zohawk a si. Cu hman ah Sensirh dingfelnak (brutally honest) thawn zoihnit awk a si. Tuqhimnak ah kei ka hmin cu, Hlawn Dawh Thang, Ka hnaquan cu Kawhhran upa, Tidaan kel uartakmi ka si, ca ka siar tuklo…tvk.

Thutlaang Khulnak

Mai’ sinak tlangko hmuhawk felnak cun nun tuahqhatawksalnak ah le Kum Zabi (21) hrang ih a milawmi thuruahnak pawl a suahpi thei a si. Tifekfek tuknak, thu lungkhen neih tuknak, hlansan ngai ringringnak, a ding zawng lawng ih thuruahnak tipawl cun Kawhhran sungah siseh, zatlang nun pawlkomnak le pumpaak hnaquannak pawl hrangah hlawhtlinnak hnak in qumsuknak a suahpi sawn thei a si.

Comments

comments

One Comment

  1. Saya Thawng na ti tha nasa.
    Theological term te te tla kan Chin tawng in na run ngan tel ih a lungawi um tuk.
    Can na neih len Theological term pawl tla hi kan chin ca in run ngan peh thei aw la a duh um nasa ding.

    Ka ruah mi cu Either -Or logic kha nat nak pakhat asi len Both-And ruah nak teh nat nak a si ve thei kei maw?

    Ka lungawi nasa

Comments

%d bloggers like this: