Kum 3 Hnu ah Lal Par Mawi ih Pathian Thangthatnak Hla in Ka Lung I Tho Ter Sal

11692753_10207081341250996_3950108656907585025_n (1)

 

– Uk Lian

Lal Par Mai ih Pathian thangthatnak hla fing 12 a suah nak kum 3 lenglo a liam zo nan tuini ah a thar in ka thinlung a kai tho sal asi. Mi tampi cun, a hla pawl nan ngai neknek thluh zo ko ding. Mi hrek cun, a hla pawl hi nan duh kelten nan duh zet ko ding, mi hrek lala cun Pathian thangthatnak hla dang bangin a thatnak le a hleicetnak thleidang thiam lemlo in nan maimalh men tla a si thei.

Mithen khat cun, a hla pawl hrimhrim rak thei lemlo tla kan um ding. Asinan, Mai Lal Par Mawi ih hla “I Kotu” timi sung ih hlafing 12 hi cu uar tlak le sunsak tlak rori asi tiin ka hmu. “I Kotu” timi sungih hla pawl phuahtu cu Tha Nei Khar le Hoi Lo Par (NyNy) an si. 2012 lam ih rak suah zo mi a si. Liam cia caan ahcun tui ka ngaihsak vekin ka rak ngaihsak emem thiam lo.

Asinan, tuini ah cawl lo in a hlafing pawl cu pakhat hnu pakhat ka ngai sal tikah hivek hla thuk le mawi kan nei tamlo zia ka thei fiang sinsin. Hla phuahtu tei pahnih hin an thinlung muril Pathian hrangah an pe ngah. Ahleice in, Pu Tha Nei Khar cu kan Lai hla phuah mi lakah, a hla hi a dangdai thei hrimhrim. Sap Lian Thang thawn an hla phuahmi hi sah a nuam in a muril thei ringring asi.

Hi hla pawl hi a phuah menmen lo, a thinlung muril thletnak hmun pi vekin ka ruah sak thiam. A hla pawl hi a nunnak ih a tonteh ngahmi le a culmam mi pawl an si. Ngaitu hrang, ngai a nuam ih, a saktu pawl hrang sak le vawr nuam zet asi phah.

Screen Shot 2015-07-09 at 7.42.50 am

Pu Tha Nei Khar ih phuah mi “Bia Thu An Tiam” timi sung ih hla chorus hi mawi le thinlung sung ih cohlan tlak rori asi in ka thei.

Tifinriat bang luang seh duhdawtnak

Zilthli bang hrang seh anka mawi

Cirhti bang irh seh ngaidamnak

Rihling bang hmun seh lungawinak nan run-inn ah 

Ahleice in “Rihli bang hmun seh, lungawinak nan run-inn ah” timi te khi duh a nung in duhdawtnak ih sanzia hla phuahtu in a pholang ngah a si. Cun, a hnuai ih hla hi hla phuahtu in a nui’ duhdawtnak hla ih a phuahmi cu a si. Pu Tha Nei Khar ih phuahmi thotho asi. A zaten tarlang lo in, cang khat le thu-non lawng ka tarlang thei. A nui’ duhdawtnak hivekin a pholang thiam hi cu aw, pa ngaisan tlak rori asi.

Thalfang bang I pai ih thisen thawi I hring tu

A hnawi thlum in I cawm, a ei ai in fahtu

Ka ninghang I siang lo, ka tah mitthli I hnul

Sunghno ka nui kutnem hngilh siang hlang ee

Thu-non-

Thlum cuang hleice ee, ka nu ka nu ti hi

A tel lo cun rialti bang dai kan run-inn hi

Ka hlam theu an-hai ah ka nu ka nu tiin

Ka hrang lungvar mankhung hringtu ka nu

Nui’ duhdawtnak hla mawi tampi lakah hivek hla thu hi cu dangdai zetin ka hmu. Nu in a pum sungah thalfang bangin a pai timi cu minung pum sung kan um hi a paitu hrangah ziangtluk a har timi fiangte’n a langter ngah asi.

“A tel lo cun rialti bang dai kan run inn hi” a timi hin, a nu cu an run-inn ah ziangkim ih ziangkim asizia a langter ngah ih a nu a um lo ahcun an inn cu zianghman um lo vekih a ruahnak pawl tla a pholang ngah bet.

A hnuai ah YouTube ah “I kotu” album a zaten ret a si…..

Hla phuhtu Pu Tha Nei Khar le hla saktu Lal Par Mawi hi hmaiton in veikhat khal ka hmu dah lo. Asinan, hla phuahtu hin hlafing 12 sung ah pacangtha le khawruat thiam asizia a pholang aw ngah. Cun, minung sinak ah tlinglo zet cingin Pathian in a kawhnak pawl tla a pholang ngah thotho. Hla saktu Lal Par Mawi hin, hla sak menmen siloin, hla mawibik ka sak ngah ti bangin, mawi vervo te in a awih thiam tikah hla le biazai kom sam-suak mi zaihla mawizet ah a can ter.

Pu Tha Nei Khar cun, Pathian ih kawh mi le cohlan tlak ah amah le amah a ruat aw lo zet nan, Pathian cun minung ziangvek le zovek khal a ko ih a duhdawt theh timi ahnuai hla thu-non ah a tarlang ngah lala.

Maw Bawipa kei misual hi

Na rawngbawl hna sunglawi ah

Telve I sin ka ruah ah

Zangfahnak makzia ka hmu

Misualbik lakah misual bik

Felnak ah ka tling si lo

Thlahthlam lawn in hruai aw

I kotu na si

Himi hla thu-non ah, Pu Tha Nei Khar cun a kotu cu Pathian asizia a thei ih thlahthlam lawn I hruai aw tiah Pathian a ngennak hla in a phuah ngah. Lal Par Mawi khalin, hla phuahtu ih duhdaan in a sak ngah dingah ka ruat. A thluk daan le a aw a mawi ter daan pawl ngai tikah ngaitu thinlung a kuai ih lung aleng ter hrimhrim asi.

Comments

comments

Comments

%d bloggers like this: