Korea Fala Mawi Dan Leh Mawi Duh Dan

Chinland Today
Salai Seoul

Korea fala pawl cu an hmel a ṭha zet nan a tlangpi thu in an pawhte leh an taw tit lawng te hawm thawh an um deuh

Khua hlan lai deuh kan vun thlir sal a si len mi mawi deuh le ngo deuh cu Japan fala vek, Tuluk/Chinese fala vek tin an rak tah ṭhim ṭheu. Hmansehla, santiluan a thleng aw vivo ih, tu lai san thar ahcun mawi ngo deuh leh style deuh cu Korea fala thawn tah ṭhim an si thlang.

Korea fala pawl cu an pianphung ihsin mi ngo, tak sa no nal, ṭawl nawn leh mi dam cak mi an si. Tak sa thian hmil leh hmel mawi tak ih ceiawk hi uar hlei cuang mi tla an si. Cu lawng si lo an sam a phun phun ih tuah leh rawng hnih hi an duh in nuam an ti zet. Fala no deuh pawl in long wavy hiar hi an uar bik mi style pakhat a si. Hi vek style in an hmel a ti no ih a ṭhen khat fala cu zuk lem te vekin a ti bang. Chocolate brown leh blond color pawl an uar hleice. A can leh tik cu zirin sam rawng thleng an hmang.

Korea fala pawlin a thu pi bikih an ruat mi leh heh-le-chet tiih a zuam bikmi cu hmel ṭhat ding rori a si. An mipa pawl khalin fala an zoh tikah a hmaisabikah an hmel a ṭha maw thalo tih lawng an zoh. Thil dang an zoh tuk lem lo. Hmel ro ri a thupi bikah an ret. Korea fala pawl cu an hmel a ṭha zet nan a tlangpi thu in an pohte leh an taw tit lawng te hawm thawh an um deuh, duh thu an sam deuh lo.

Hmel ṭhat ding hi an duh mi leh an cak bik mi a si vekin Korea fala a tam sawn cu an hmai plastic surgery an tuah na sa. An hmel an tuah nasa tukih tu lai cu hmel bang awk zik zik an tam nasa. Korea pastor pakhat in “kan korea fala pawl cu an hmel an rem ciam co ih van ram an kai tikah van cung sangka kil tu in an hmel tak tak a rak thei thiam nawn lo ah cun an buai nasa ding” tin a serom nakah capoh thu ngai in a sim. Asia ram ah cun Korea hi plastic surgery tuah tam bik nak ram a si.

Korea fala pawl cu mawi an duh tukih an feh nak kihah thlalang, thaithih, ceiawhnak phunphun le hand cream pai phahin an hmang phah ringring. Mipi um khawmnak lak khal ah ceiawk hi ning zah ah an neih lo. Hmel lawng si lo taksa mawinak ding a si phawt ah cun taksa hrang ih a ṭha ti mi cu a thaw lo khal len an ei mei. Ziang tik can khalah mawi zet leh style takih um an tum ring ring.

Fala pawl lawng si lo nupi nu leh pitar te tla si seh thianghlim zet le mawi zet ih um an duh mi cu uar um zet a si. South Korea tlang val an tuakih North Korean fala pawl an mawi sawm. Korea fala in a hna ih ngai nuam a ti bik mi leh theih a duh bik mi cu ‘naw-mu-yae-paw/na mawi tuk’ tih ro ri a si.

Comments

comments

3 Comments

  1. Ngan tha lawlaw.
    Siar nuam in informative a si.

    Hnisuak tla umsi.

  2. Salai Lal Hre Luai says:

    Plastic surgery ruangih an hmai lawng mawi mi hi cu a poi zet.

  3. Na thiam…. Siar nuam ka ti…

Comments

%d bloggers like this: