Kilkhawi dingin Thlah

November 9

Tlawngkai Ninga

 

Kilkhawi dingin Thlah

                                                           

Bible Siar Ding: Seemtirnak 19:1-26

 

Zo khal amah ih nunnak humhim a tumtu cu a nunnak a sung ding;

A nunnak a liamtu cun a nunnak a humhim ngah ding.

–         Luka 17:33

 

Lot ih nupi hi mirethei a va si so! Anih cun a neihmi a leitisa nunnak humhim thei ding a duhtuk lawmmam. Cumi ai ah, a inn le lo, a neihsiah pawl kha thlah le taansan ngam mai in a theih fiangmi nunnak thar hrang lawngah nung ding a si sawn na’n. An innsang ah mikhual danglamzet an ra thleng ih siatralnak a thleng ding, nan inn le nan lo, nan thilri pawl taan in suahsan uh, timi thuthang a theih tikah a khuaruah a harzet.

Tuni ah kannih zumtu pawl in tla cumi vek ih elnak thu le ttongkam pawl kan thei ttheu: “Hell ram le van ram ruahsan cun ka nunnak le ka sinak pawl cu ka taansan siang lo,” tivek ih ttong, asilole “Ka nunnak cu keimai’ taa, keimai’ thuthu, zohman in ka parah thu an nei thei lo,” tivek in a simreltu an um ttheu.

Sihmansehla, Christian sinak taktak hrangah hril theih ding umsun cu thihnak le siatralnak lawng a si, Sodom le Gomorah khuapi an siatral thluh bangin ziangkim hi kumkhua a hmun dingmi an um lo. Lot ih fanu pawl ih pasal pawl cun an thilri neihmi pawl taansan ding le thlahphoih an sian lo ruangah an run umhnawh, asinain anmah le an thilri neihmi a zate’n an ciamral ttheh a si kha!

Lot ih nupi cun tthuktthun phah le dunglam seherh phah cingin a pasal Lot cu a thlun ko, asinain a thinlung cu a nun hlun ah a taangta hrih lai. Hmailam lawng zoh in feh ding asinan thungai loin dunglam a her tikah citthuam ah a cang tariai ee. A lei tisa duhnak a thlah thei lo tikah a dunglam le a hmailam caan a zate’n a sungral thluh.

Pathian in Amah thawn naih awzet ih kan pehtlaih awk asile kan nunnak cu Amah in kumkhua in humhim ding thu in kam. Amai’ humhimnak kan cohlang thei, asilole kanmah te humhim aw tum in ziangtinkim kan sungral thluh thei.

Vancung ih um ka Pa, ka hrangih a tthabik in ret sakmi hawl sawn loin kumkhua a hmun lo dingmi thilri pawl ka tlaihsan ttheumi hi

in ngaidam hram aw;

Zo pawl le ziangmi pawl so thlah thei loin ka tlaihsan ringring? Ziangruangah so harsa fualfo ih ka thlah thei lonak san?

 

@Pennington

Comments

comments

Comments

%d bloggers like this: