Khuimi Group Ah Na Tel?

Khuimi Group Ah Na Tel?

(Luka 19:28-40)

– Rev. Run Cung Mang

Thuhmaihruai:

Khristian Calendar vek cun tuni hi “Tuum Kung Nipi Ni (Palm Sunday)” a si. Hih ni ih danglamnak le thupitnak cu kan Bawipa Jesuh Khrih Jerusalem khua sungah sunglawizet ih a luh ni a si. A suah tikah nautabik caw rawl einak kuang sungin a suak; inn le lo nei lo, farahzet le retheizet in a um, harsatnak a phunphun a tuar. Asinan Jerusalem a luh tik ahcun Messiah a sinak langter in mipi hmai ah laak note to in a fehnak ding lamzin tluan ah puan le tthulhfau hnah phah in sunglawizet in a lut. Himi ni ih thil cangmi parin thlarau thazaang la tlang dingah lo sawm ka duh. A bikin hih ni ih teltu hi mibur pali in tthen a theih ih cuih mibur pali sungah nang le kei teh khuimi group ah kan tel, ti cek aw dingah ka lo sawm-ngiar (challenge) duh.

1. Dungthluntu mi pahnih (Luka 19:29)

“Olif tlang ih Bethphage le Bethani khua kiang an thlen tikah a hmai ah a dungthluntu pahnih kha a thlah ih hiti’n thu a cah: “Nan hmai ih a ummi khua sung ahkhin va lut uhla zohman ih an to dah lomi laak note pakhat hri in an khihmi kha nan hmu ding. A hri phoih uhla hinah rak hruai uh. Zokhal in ziangah so nan phoih, tiah an lo sut asile Bawipa in a hai tiah va sim uh, a ti. An va feh ih Jesuh ih a sim vek cekci in ziang hmuahhmuah cu an hmu. Laak note cu hri an phoih rerolai ah a neitu pawl in, “ziangah so nan phoih?” tiah an ti. Annih in, “Bawipa in a hai” tiah an let. Cule laak cu Jesuh hnenah an hei hruai” (cc.29-34).

Jesuh in a dungthluntu tampi lak ihsin a rinsan hleicemi mi pahnih a hril bangin kannih teh Khrih hrangah rinsanmi kan si ve maw? Khrih le miphun hrangah rinsantlak riantu ttha si thei ding zuam uhsi! A rinsan hngai vekin a dungthluntu mi pahnih hi uar an um ngaingai. Ziangahtile an Bawipa ih fialmi hnattuan hi thil olzet cu a si lo. Sikhalsehla, dungthluntu mi pahnih hi mi raalttha le hruaitu ih thuthlun nun neitu an si, zianghman el lo le thusut hnuaihni loin ee an ti thei. Culawng si loin an Bawipa in sim ding a timi ttongfang cekci lawng an sim timi hin mifel, rin-um an sizia a fiang. Thusup, thubet le thuphan perhhleuh an hmang lo. Kannih tla Bawipa ih hnattuan in fialmi thupibik ah re ih thungainak nun nei in pumpetu kan si ding a thupi. Cule leitlun thuanthu phuahcop men aupi rerotu si loin Bible Ca Thianghlim, Pathian Thutak lawng sim le phuangin, atak in ttuantu si zuam cio uhsi!

2. Laak note neitu innsang (Luka 19:33)

“Laak note cu an phoih rerolai ah a neitu pawl in, “Ziangah so nan phoih?” tiah an ti. Annih in, “Bawipa in a hai” tiah an let. Cule laak cu Jesuh hnenah an hruai. Cun laak par ahcun an puan an dam ih Jesuh cu an toter” (cc.33-35).

Hitawk ahhin, laak note neitu pawl ih nunnak hi uar a um nasa. Jesuh Khrih in a ttul ti an theih tikah siangzet in an neihmi rannung cu an pe. An neihmi thil ziangkim hi Pathian ih pekmi thluasuah hlir an sizia an thei fiangih Khrih hrangah uimi zianghman an nei lo. Jesuh ih thlahmi dungthluntu pawl ih simmi parah rinhlelhnak zianghman an nei lo. Zumtu pitling an sizia a lang. Peknak nun neitu an sizia khal a fiang. Zumtu kannih teh kan nunram cekfel hnik uhsi! Khrih hrangah siannak thinlung kan nei maw? Tirhfakzet in ti ttengtteng in kan um pang maw? Falam ah mi pakhat in tulai zumtu pawl hin ziangkim kanmai’ taa ah kan ruat ih kan ham thluh a ti. Curuangah hiti’n thla a cam ti a si: “Maw Bawipa, leiram hmuahhmuah hi Mittaing pawl in kan taa an ti; Inn-hmun zate le Sipin pawl in kanmai’ taa an ti fawn; Thingkung pawl le Tit-ttaw pawl in kanmai’ an ti lala. Bawipa, Na hrangah ziangso a taang nawn?” ti’n. Zumtu nu le pa u le nau pawl, laak note neitu innsang bangin kannih tla kan neihmi Khrih hrangah siangzet in petu si dingin zuam uhsi!

3. Jesuh thluntu miburpi (Luka 19:37-38)

“Jerusalem khua kiang lamzin Olif tlang ihsin a vung suhnak zawn an thlen tikah a thluntu miburpi pawl cun Pathian an thangtthat ih, thilmak zetzet tampi an hmuh ruang ahcun an aw neih patawp in an au ciamco. ‘Bawipa ih hmin in a rami siangpa-hrang parah Pathian thluasuah um ko seh’ tiah an ti” (cc.37-38).

Hitawk ah miseenpi asilole miburpi nun kan hmu thei. Jesuh Khrih cu laak note parah to in Jerusalem khua sung a luh tikah an lungawi ngaingai.  Ziangahtile uktu siava dopet in siangpahrang a ttuan thlang ding, a uknak ram a dinh thlang ding ti’n an ruat. Tisalam mit in an cuan ih an lawm ciamco. Tusan zumtu tampi tla miburpi zawngah phuurzet ih cangvaih kan hmang. Asinan, Jesuh cu an ruahsan vekin huham le nehnak thawn bawi tokham ah to loin Amah dodaaltu pawl ih kaih le khih, hmuhsuam le nautat a tuarmi an hmuh tikah an thinlung an thlengh tamai. Pilat in, “Barabbas maw Jesuh, zo sawn ka thlah ding?” a ti tikah an aw neih patawp suah ih an thangtthatmi Jesuh cu an hnong riangmang ih, “Thinglamtah ah that aw, thinglamtah ah that aw” (Luka 23:21) ti’n an aw neih patawp in an au. Ziangtluk riahsiatza so a si! Tuni ah zumtu a ti awtu mi tampi cu: ka piangthar, thutak ka thei, Jesuh cu ka ziangkim tiah Biakinn le khawmnak ah tettikhan in an aukio rero ttheu nain cumi kaa lala in zuuk le hmawm in, nun borhhlawh ih nung in, mi soisel, mi dokalh le mi thangsiat in Jesuh mualphotertu ah an cang saal ttheu. Zumtu kan nun daan raalring uhsi!

4. Farasi tthenkhat pawl (Luka 19:39)

Cule miburpi lakih a ummi Farasi tthenkhat pawl in Jesuh cu, “Sayapa, na dungthlun pawl hi dai tein um hngai seh, sim aw,” tiah an ti. Jesuh in, “Fiangte in ka lo sim: Annih pawl daite ih an um asile hih lungto pawl hi an hung au ciamco ding a si,” tiah a ti (cc.39-40).

Hitawk ahhin Jesuh sanlai ah a duh awzetmi biaknaklam ih upa Farasi pawl ih mizia kan hmu thei. Himi pawl hi anmah le anmah cu thungaipi ih ruat awtu an si. Biaknaklam zuamtu le mi thianghlim ah an neih aw. Jesuh sual hawltu, that dingih phiarsawmtu pawl an si. Jesuh ih dung a thluntu mipi an tam vingvo tikah an ngaih lo, an iksik ih an ttih fawn. Curuangah miburpi pawl kha daite ih umter an duh. Anmah in le an dawi ngam lo tikah Jesuh hnenah, “Sayapa, na dungthlun pawl hi dai tein um hngai seh, sim aw,” tiah an ti. Asinan Jesuh in, “Annih pawl daite ih an um asile lungte pawl an au ding” a ti san. Tusan khal ah kawhhran upa hrekkhat piangthar lo le thutak thei lo pawl cun, miburpi in thathozet le hlimzet ih Pathian thangtthatnak an neih tikah hmu thiam loin an kham ttheu. Thlaraulam tthangphawknak a um tikah cosang thei loin feh sual ah ruat in don le kham an tum ttheu. Zumtu nang le kei teh Farasi dinhmun ah kan um pang maw? Cekfel awk a ttul.

Thunetnak:

Duhdawtmi zumtu, na nunram ttha tein zohfel hnik aw. Na zumnak cekfel hnik. Jesuh ih dungthluntu mi pahnih bangin Jesuh thupekmi ngai in a feh le a ttuantu kan si maw? An group ah kan tel thei ve maw? Cun laak note neitu pawl bangin kan neihmi Jesuh hrangah siangzet in kan pe ngam maw? Himi group ah teh kan tel thei ve maw? Asilole miburpi bangin a nom caan lawngih Pathian thangtthat thei in, mai’ duh vek a si lo caan le ngolsan, mi vuivai, mi soisel in Khrih phatsantu kan si pang maw? Hih group ah kan tel ve maw? Culole Farasi pawl vekin mi an pianthar ih Pathian an thangtthatmi mitkem le ngaih loin tla na rak um pang maw?

Pathian in A thuthlun ding le A hnenah siangzet ih pe ding in duhsak. A nuamzawng le phuurzawng lawng hawltu, mi phunzai le mi soisel hmangtu si ding in siang lo. Pathian thangtthattu le A hnattuantu pawl dokalhtu si ding khal in duhsak lo. Dungthlun pahnih le Laak note neitu pawl group sung teltu si ding in duhsak ih miburpi le Farasi lakih tel ding cu in siang hrimhrim lo. Duhdawtmi zumtu unau, nang teh khuimi group ah na tel?

(Visited 59 times, 1 visits today)

Comments

comments

Comments

%d bloggers like this: