Khuaruahharnak Um Lo

October 30

Tlawngkai Nihnih

 

Khuaruahharnak Um Lo

                                                           

Bible Siar Ding: Saam 139:1-6

 

Bawipa in, “Na nui’ pum sungih ka lo seemter hlan ihsin ka lo thei zo ih na suah hlan ihsin miphun tampi hnenih profet si dingah ka lo hril zo a si,” i ti.

– Jeremiah 1:5

Rin lopi in thil pakhatkhat a can hruak ruangih khuaruahhar le mangbang (surprise) ih um khi ka huatuk – ahleice in thil ttha lolam hrimhrim. A caancaan ahcun ka parih thil ttha lo ra thleng dingmi pawl khi rak thei cia in cumi kham theinak le neh theinak dingah timtuah cianak nei thei sehla ti’n saduh ka that ttheu. Cule thil siava ra thleng dingmi thei cia in cumi ih i hnaihnok le siatsuah thei baan lonak hmun ah relh tahrat in suak nawn lo sehla ti’n tla ka thinlung sungin khua ka ruat rero ttheu.

Sihmansehla, Bawipa in a thei. Amah cu ziangkim thei thluhtu (omniscient) Pathian nung a si. Amah cu leitlun ih thilcangmi pawl a thei tthehtu a si lawng si loin, minung bulpak pakhat cio ih nunnak sungih thilcang dingmi – a liamcia caan, atu laifang, le a ralai dingmi, a ttha le a sia – tivek a terek tiang khal a thei thluh.

Amah cun na nunnak ih buainak (crisis) khal a can hlan ihsin a thei cia zo, na cancer natnak, na hnattuan remcaan lonak, le ziangkim khi a thei cia. A thupimi kan ciinken ttulmi cu minung pawl le kan kiangkung ih thilcangmi pawl in in lauter, in mangbangter thei hmansehla Pathian cu ziangtik hmanah an lauter thei dah lo ding timi hi a si.

Cumi thutak vun theih fiang cu ziangtluk ih hnangamza so a si! A ralai dingmi kan hmailam caan cu kan thei fiang thluh lo na’n cumi a theitu Pathian nung kan nei.

Ziangkim theitu (omniscient) Pathian Bawipa, Na fimnak cu ka hrangah theih  baan lo ding khop in mangbangza a si. Nang cu zianghman ih lauter thei lomi Pathian nung na si zia i theihter ruangah ka lungawi. 

Ziangmi thuthang in so khuaruahhar ko i tuah? Pathian cu ziangkim theitu a si ti ka theihnak in cuih thuthang ka hmuh daan ziangti’n a thlengh?

 

@Pennington

(Visited 27 times, 1 visits today)

Comments

comments

Comments

%d bloggers like this: