Khuangli Khua Kum 600 Puaipi Tuah Ding


Chin ramkulh Falam peng sungih um Khuangli khua cu 17 – 24 April 2017 ah kum 600 kimnak puaipi an tuah ding. Hi puaipi ahhin Sim ram rak uktu netabik Miuk Mang Cung Nung hmin suang in bawhlung bengnak khal an tuah ding.

Kum 600 puaipi ih Miuk Mang Cung Nung Cup bawhlung bengtu dingih an sawm mi khua pawl cu Zathlir, Cerhmun, Lianduh, Bocung, Relsing, Hlawnmual, S.Dihai, Cicai, Bualmin, Saihmun, Khawdar, Losau, Thlancing le Lairawn ih Khuangli pawl an si. Lehpannak lam si lo ih Jubilee puaipi rori hmanpitu dingah Bualhrei khua khal sawm an si tiin thu kan dong.

Miuk Mang Cung Nung Cup bawhlung bengnak ah thiam hleice laksawng a um dingih pakhatnak belpi khap 12, pahnihnak belpi khap 10, pathumnak belpi khap 9 pek an si ding tiah Khuangli Khawbawi Pa No Lian Sum hnen ihsin kan thei. Lehpannak hi Miuk Mang Cung Nung Cup lawng tuah loin bawhlungsit, Chinlung, Hridirh, Lungsok, Feikhawh, Lukhamvuak, Tlanzuamawknak, Thimthul le lehnak dangdang khal tuah ding an si.

Hi puaipi ahhin sun caan ah lehpannak phunphun tuah ding a siih zaan caan ah Pathian thangthat khawmnak le concert, nomawknak phunphun in caan hman a si ding. Khuangli Khua Kum 600 Kim Puaipi ah awnmawi kaitu ding cu 3 Amen band an si thu Global Khuangli Youth Association ih sungtuan Salai Lal Chhan Him hnen ihsin theih a si.

Khuangli Khua Kum 600 Kim Puaipi ahhin Khuangli Khua Kum 600 Kim Hminsinnak Cabu khal tlangzarh cih a si ding. Cuihleiah T-shirt khal tawkfang nawn tuah suak a siih T-shirt cu man um loin mipi hnenah zemdarh a si ding. Hi puaipi sungah kan pi le pu pawlih rak hman rero mi hlawnthilri, khokheng le bungbel, thuamhnaw le khua le ram zuk pawl khal mipi hmuhnak a um ding tiah Global Khuangli Youth Association ih President Salai Van Lian Sui hnen ihsin theih a si.

Khuangli Khua Kum 600 Puaipi cu Khuangli tefa hmuntinkim in suahsennak khua ah tlung in an hmang ding. Jubilee Lungphun cu 22 April 2017 ah onnak neih ding a siih USA lam hi tlunnak a harsat deuh ruangah a tlunglotu zaten Jubilee lungphun ni ah Chin Center, Indianapolis, USA ah sunglawi zetin an hmang ve ding. USA ahhin Khuangli khua mi innsang mipa 47, nunau 19, innkhi zaten 66 an um thu USA ih um Khuangli Pawlkom President Pa Job Ren Lian hnen ihsin theih a si.

Khuangli khua cu Chin ramkulh Falam peng sungah a um ih Falam ihsin peng 15 hlatnak hmun ah a um. Sim ram Miuk tonak khua a siih inn 500 lenglo an rak kim dah. 2012 kum thal sungah Acozah in motor zin khal a rak ceh suak sak. Tui dinhmun ah innkhi 68 an um ti khal theih a si.#

Thuthang lakhawmtu le suthlamtu – May Myo Moon

Comments

comments

Comments

%d bloggers like this: