KHRISTIAN LE CALAI

Salai Siang Lian Uk (Kianghrol Hmingte)

Brunstad-Christian-Church-literature-585x293

1. Calai ih Huapcin (Scope of Literature)

Calai timi hi a huap kau theibik ih hman cun ‘ngan mi ca hmuahhmuah’ a huap tiah an sim ttheu. Dictionary tampi khal ah calai ih sullam pakhat ah himi hi an ret. Hnihsuah capoh thu ngan mi, zuar mi thilri parih ngan mi (ben mi) ca tivek ihsi thok in American calai mithiam hminthang Mark Twain le English thuanthucawn nganthiam le bezaipu hminthang William Shakespeare ih kutsuak tiang in a huap thluh. Asinan himi simfiangnak hi cu calai khawvel lenglam le zirnak khawvel lenglam hrangih hman mi a si deuh ttheu.

Calai timi hi a huapbibik ih hman ahcun ngan mi ca hmuahhmuah a huap nawn lo. Calai cu French ttong ih belles-lettres an timi lawng khi a huap ih, nganca mawi (beautiful writing) tican a si. Nganca mawi timi calai ahcun biazai, nunthuleng, thuanthucawn, nunthuanthu, essay le bulpak hminsinca (memoirs) tivekpawl an tel. Himi simfiangnak hi sawkhaw lenglam (secular) zircawnnak khawvel in calai ti ih a pom mi a si ih, cozah tuah mi tlawng zir ca khal ah himi simfiangnak ih hmelhmang kan hmu thei.

Danglamtertu ttongfang (adjective) a tel mi calai simfiangnak khal a um fawn. Tthimnak ah French Calai (French Literature) kan ti tikah French ttong ih ngan mi capawl lawng a huap (himi cun hman mi ttong a thupitter). Red Indian calai timi cun Red Indian miphun ih calai lawng a huap lala (himi cun miphun a thupitter). Cuihleiah a caanbi (period) zawng ih kawhdan khal a um. Tthimnak ah kumzabi 18 sungih ngan mi calaipawl cu ‘kumzabi 18 calai’ tiah kan ko thei. A thuhla (subject) zawng ih kawhdan khal a um hrih. Tthimnak ah hmuantuahdan thuhla ngannak ca cu hmuantuahdan calai (literature of gardening) tivek in. Hivekpawl hi cu danglamtertu ttongfang (adjective) a tel mi calai a si ruangah subject tinkim a tlem kan ti thei. Himi hi calai mithiam tthenkhat cun thuhla pakhatkhat parih a tthum aw mi (Literature on…….) ti khal in an sim.

Christian calai kan timi hi danglamtertu ttongfang a tel mi calai phun khat a si ve. Sakhualam calai (religious literature) sung ih tel ve a si ih a hnattuan khal Christian sakhaw sawhhngetawk-nak le darhzainak lam a hoi.

Cun, amah calai sung lala ahhin tthendan dang tampi a um lala. Theih larbik mi cu sersuah calai (fiction) le sersuah si lo calai (non-fiction) timi hi a si. Sersuah calai ah biazai, nunthuleng, thuanthucawn tivek an tel ih; sersuah si lo calai ah nunthuanthu, essay, le bulpak hminsinca tivek an tel. Khristian calai hrang lawng ih kan rel bet asile, sersuah si lo calai ahkhin (a tlun ih rel zo mi hlei ah) khristian nun bawmtu ding hmuitin ih ngan mi cahram, sermon ngan suah mi, rawngbawlnak ih tontehnak ngansuah mi ca, nunphuannak (testimony), theology zircawnnak cabu le bible simfiangnak cabu tivekpawl an tel bet ding.

2. Khristian le Calai

Khristianpawl ih kan biak Cung Pathian cu calai thawi’ hna a ttuantu Pathian a si. Bible sungah “Pathian in a ti” timi ttongkam hi 3800 lenglo kan hmu thei. Curuangah Seemtirnak cabu ngantu Moses ihsin Thuphuan ngantu Johan tiang in Pathian ih fialnak thawn an ngan mi a si ti kan hmu thei (2 Tim. 3:16; Rm. 15:4; 2 Pe. 1:20-21). Amah kan Pathian rori khal in ca a ngan cang a um (Suah. 31:18; John 8:6,8; Daniel 5:5).

Thukam Hlun cabupawl ah Pathian le sersiam mi thilnungpawl karlak thuhla, minung in a theih a ttul mi thuhla phunphun, phunhnam tundinawkdan tivek ihsi thok in bulpak nunram tuahtthatnak tiang a tel. Cu bang in Thukam Thar sungih a tel mi cabupawl kan zoh tik-khal-ah kawhhran, zumtu mihlawm le bulpak siar ding ih ngan mi cakuatpawl an si ti kan hmu thei. Curuangah calai hi kawhhran, zumtu mihlawm le bulpak nun kaihhruainak, thazangpeknak, nunsimnak le tundinnak pawl Pathian in a hmang vivo a si ti kan hmu thei.

Cuihleiah Bible sungah hin biazai, thuanthucawn, nunthuleng, thuanthufim (fable/parable) tivek le calai ruang-am dangdang an um. Curuangah tuisan ih kan hman mi calai ruang-am phunphun khal hi Khristian rongbawlnak hrang ih hman theih an si ti a lang. Phunhnam tthangso pawl lak ih Khristianpawl cun calai ruang-am phunphun hmang in rongbawlnak an nei rero ti khal kan hmu thei. Khristian hruaitu ropi tam zet cu calai rawngbawlnak a ngaihsaktu an si ti khal santhuanthu kan zoh tikah kan hmu thei fawn.

Kawhhran in siseh, zumtu bulpak in siseh Khristian nun dik thawi’ kan tthanlentheinak dingah Khristian calai hi kan siar a ttul. Tirhthlah 17:11 ah, “Hitawk ih minungpawl (Berea mipawl) cu Thessalonika mipawl hnak in an cuangmuar deuh, thinlung khawruahnak tiar aw cia in Paul ih sim mi thu cu an cohlang ih, a si ngai maw ti theifiang dingin nitinte’n Cathianghlim sungah an hliakhlai,” (KJV) ti kan hmu.

Khristian hruaitu ropi zetzet cu casiar a ngainatu an si ti khal kan hmu thei. Calai hmang ih rongbawltu hminthangbik Tirhthlah Paul cun thawnginn sungih a um lai khal ah Timothy cu, “Na rat tikah Troas khua, Karpas hnen ih ka tan mi korfual le cazualpawl kha rak keng aw, a hleice in savun cazualpawl kha rak keng tengteng aw,” tiah a cah (2 Tim. 4:13). Cuihleiah Timothy khal casiar taima ding in a fawrhfial (1 Tim. 4:13). Rongbawltu hminthang John Wesley khal ni khat ih peng 50 ihsin peng 90 tiang lai khual a tlawnvah cang khal ah rang to phah in ca a siar ringring.

Kan ralpa Satan khal in Cathianghlim a siar ih a theih ve zet ruangah Cathianghlim simfiangdan dik lo hmang in zumtupawl in thlem ttheu (Mat. 4:5,6). Curuangah zumnak dik kan kaihhnget ringring theinak dingah Khristian calai ttha pawl taimak suah ih kan siar a ttul ih, kan siar mi khal kan nunpi a ttul sinsin.

Kan Pathian ih in khihhmuh mi kalhmang cu thlurh vivo ding a si ih, Khristian hruaitu hminthang pawl ih keneh mawi khal thlun vivo ding a si. Curuangah Khristian calai ttha kilkhawi le punzaiter vivo hi Khristian hmuahhmuah ih kan ttuanvo a si ih, cui Khristian calai ttha pawl hmang in kan Khristian nun tthansohter vivo ding khal cin le thlun tlak lamzin a si.

Hminsin: Independent Presbyterian Church of Myanmar ih Literature Sunday hrang siar ding ah ka ngan mi Paper a si.

Comments

comments

Comments

%d bloggers like this: