Khristian, Democratic Society

KHRISTIAN, DEMOCRATIC SOCIETY

(CHRISTIAN, DEMOCRATIC SOCIETY)

Hre Mang

Chin State cu “Khristian State maw asi ding, Secular State” timi thu ah nasa ten ruahdan bang aw lo a um. Kan dung naite ah Zophei Christian mino zarual pawl hnenah Youth Leadership Lecture ka pek lai ah Chin State cu Khristian, Democratic State asi dingmi asi tiah ka rak sim dah. Chin State cu ziangvek ciah kan si ding timi a sual aw rero lai fang asi kan ti thei. Khrihfa hruaitu pawl lala in “Secular State” le “Khristian State” ih umzia fiang tuk lo tla kan um lai hrih asi thei. Khristian Democratic State timi cu ziang asi ti tawiten a hnuailam ah kan sim ding.

Chin Khrihfa pawlin kum 100 sungah Chin mi zapi ten Khrihfa cang theh dingin an rak zuam ih Chin for Christ in One Century (CCOC) ti in hmin vuah in rawngbawlnak an rak nei. Asinan a tufang ah Chin State ih thuneihnak sangbik, innpi sungah laireltu cu Buddhist mi tamsawn an si taria, Chin mi rori an si. Chin Khrihfa kan nulepa pawlin an rak tumtah mi cu kan hlawhtling ciah lo asi kan ti thei. Khrihfa rak si theh sehla rel ding um loin Khristian State cu kan si tiah zohman in a el an um lo ding. Cangan mi sungah “Khristian State” kan si tiah daan hrampi sungah ngan dingmi thu sim asile ih Chin State cozah kumpi lairel nakah Khristian thurin, Bible in asimmi milai bulpak, mibur canpual, tuanvo le zalennak tvp pawl parah hngat aw in a cangvaimi kumpi cozah asi dingmi a thupi mi asi.

Umzia cu tawiten sim tum uhsi.

1) RUALRAN MI MILAI SINAK

Khuahlan siangpahrang san lai ahcun hrin hnam, miphun thleidan awknak a rak nasa zet. Tefavangnau hrangah nekcepnak, nautat awknak a rak tam zet. Khrihfa, secular, democratic society ahcun milai sinak cu mi zapi ten bangran zetin kan nei. Milai pakhat cio in milai sinak ih kan man a bangrep asi tiah zumnak thuhrampi ah a thum aw mi asi. America ram dintu pawl hi zumtu pawl an rak si vekin an rampi daan hrampi ah “All men are created equal” “mi zapi ten ruanran ten sersiam kan asi” tiah an rak pom ih an rak ngan. Cumicu tuisan, Khrihfa, Secular, Democratic thuhrampi pakhat asi. Chin mi lak khalah kan thuhrampi asi dingmi asi. Farah nauta, biaknak, lennak thatnak, fimthiamnak, tvp betcawpmi pawl ruangah siseh suahkeh in sinak ruangah siseh milai pakhat ih man cu a nep cuanglo, a sang cuang lo, mi zapi ten milai sinak le canpial bangran, rualran zetin sinak kan nei timi thuhrampi parah hngat aw in a dingmi society pakhat kan si dingmi asi.

2) REMDAIHNAK IN A UM TLANGMI

Khrihfa, secular, democratic society ahcun mi zocio khalin daiten, khat le khat hnaihnok aw lo ten mai duhmi, a thabik tiah ruahmi, lungawinak zalen zetin hawl thei nak an nei cio. Milai pehtlaih awknak ah insang, veng, khua, tlang, peng, le miphun zapi huap in cozah siseh cozah asi lo mi mibur pawlkom le pehtlaih nak khalah remdaihnak zalennak thuhrampi parah a hngat aw mi society si dingmi kan si.

3) MAI DUHHRILNAK IN A UMTLANG, PEHTLAI, TUAN TLANGMI

Khrihfa, secular, democratic society ahcun mi zokhal, thahrum hmangin nawr awknak ruangah siseh diklo zetin bum le lemsiah awknak ruangah si loin mi zo cio khal a zalenmi duhhrilnak liolio in midang thawn pawlkom, pehtlaih, sihcih aw dingmi an si theh. Midang lungawinak siatsuah lo le hnaihnok loin mi pakhat in amai hrangah a thabik tiah a ruahmi amai lungawinak hrangah a duhhrilmi parah midang zohman in mawhsiat theinak an nei lo. Mi zocio khalin tha an timi midang in an thlunve an duh asile a nemzawngin fiangzet in theihter awk theinak sawm awk theinak khal an nei cio asi. Thahrum hmang in siseh tongkam siava hmang in siseh mai tha timi, duhdan, hmuhdan, pomdan, thurin, pawl kha midang thlunter, duhter, pomter, theinak zohman in an nei lo. Mi zocio khalin mai duhhrilnak liolio in midang thawn pehtlaih, pawlkom, sicih in zalen zetin cangvaih theinak an nei cio dingmi asi.

4) KHAT LE KHAT UPAT TAWN AWKNAK

Suahkeh ruangah siseh thanlen pi mi ruangah siseh ruahdan, duhdan, hmuhdan, fehdan bang awlo a um mi karlakah khat le khat upat tawn awknak thawn nun tlang asi. Khrihfa, secular, democratic society ahcun mai ruahdan, duhdan, hmuhdan thawn a bang aw lomi hnenah “mi aa” “misual” “mi tha lo” na si, “na dik lo” ti thei nak zohman in an nei lo. Mi pakhat in midang pakhat a duh lo ruangah vuivai theinak a nei lo ih mawhsiat thei nak khal a nei fawn lo. Khat le khat duhdan, hmuhdan, pomdan upat awknak thawn society pakhat sungah nungtlang, lentlang, um tlangmi mibur kan si dingmi asi.

5) SENPI VANGTLANG THATNAK HRANG BULPAK TUANVO

Khrihfa, secular, democratic society ahcun mibur um khawm tikah khat le khat hnaihnok aw lo dingin siseh bulpak le senpi vangtlang thatnak hrangah siseh daan le dun nei in nun tlang asi. A cakcak ih thu in nun asi lo ih a dikbik, a thabik, a thianghlimbik, mi tambik hlawknak, rampum huap thatnak, kum saupi rei a daihmi nuntu khawsak thawn a mil aw mi, senpi vangtlang pom tlangmi daan le dun thawn a kaihruai aw mi society asi dingmi asi. Cui daan hrampi cun bulpak cio ih sinak canpual a humhim rualrualin bulpak pakhat cio in senpi vangtlang, soceity hrangah ziang tuanvo a nei, a neihmi thazaang, sumpai, theihnak ziangvek senpi vangtlang hrangah a pek ve a tul, tvp lungrual tlangmi thuhrampi parah hngat aw aw in society pakhat ah um tlang, nun tlang asi. A cuih senpi vangtlang thatnak, society hrangah a tuanvo a tuan ve duh lo asi ahcun a cuih society ah um theih asilo. Tahthimnakah senpi vangtlang riantu dingah cozah kumpi din asi vekin cozah kumpi hnatuan tuan suak thei dingin a tulmi sumpai le bungrua cu senpi vangtlang, bulpak pakhat cio in thawhsuah asi. Cucu ‘Siah” “Tax” tiah an ko. Bulpak zokhal in tuanvo an neiih an neihmi tuanvo cu mai lungsung duhhrilnak liolio in tuanve, tuah famkim ve dingin lungkimmi asi.

6) MIBUR TUANVO MIBUR THAZAANG

Khrihfa, secular, democratic society ahcun bulpak pakhat cio in nung men si loin senpi vangtlang kom khawm aw in hnatuan tlang tikah senpi vangtlang, bulpak siatnak cu do in, thatnak tampi suahpi thei ding asi tiah ruahsannak ruangah mibur pawlkom pawl cu din asi. A cuih pawlkom cu phunhnih in then theih asi: cozah kumpi le cozah kumpi asilo mi pawlkom. Cozah kumpi cu mi zapi ten lungrual tlangmi daan hrampi vekin senpi vangtlang riantu dingah dinmi kumpi cozah asi. Cuvek thotho in cozah kumpi asi lo mi pawlkom cu phunhnih in then theih lala asi: hlawknak (profit) hawl pawlkom  le hlawknak a hawl lo mi (nonprofit) pawlkom ti in. Hlawknak hawl pawlkom pawl cu Business company pawl an si ih hlawknak hawl lo pawlkom pawl cu biaknak lam, fimthiamnnak, harhdamnak le senpi vangtlang thatnak tuahnak, tvp pawlkom pawl tla an si. Cozah aislo mi pawlkom cu mi pakhat khatlin a din, hram a thawk thei ih mi pakhat hnakih tam khal in a din thei mi asi. Cozah kumpi cu society sungtel zapi ten a lo theih lo in lungrual tlangmi vekin tel theh asi ih cozah kumpi asi lo mi pawlkom, mibur cangvaihnak cu mah ih duhrilnak vekin mi pakhat cio in anmai hrangah a thabik a hlawkbik lungawinak tampi a suahpi thei ding tiah an ruahmi cio vekin pawlkom mibur cangvaihnak ah tel, cangvai thei an si.

7) ZAPI DO TLANGMI SIATSUAHTU

Khrihfa, secular, democratic society ahcun senpi vangtlang siatsuahtu, hmasawnnak daltu pawl cu zapi tangrual in do asi. Curuangah lungkim tlangmi vekin daan hrampi tuah asi ih senpi vangtlang siatsuahtu do in cuvek a tuahtu pawl khal thawng inn ah thlak lole hremnak pek an si.

Khrihfa democratic society pitling nei thei dingin fimnak thiamnak khal a tulih bulpak pakhat cio ih tuanvo khal famkim zetin an tuan cio a tul. Siatnak do tlangin thatnak hrang bulpak tuanvo tuan cio lawngah a cang thei mi asi.

Leitlun santiluang a thleng aw rero mi ah Chin mi pawl khalin Khrihfa, Democratic society dinsuah thei dingin bulpak tuanvo tuansuak in mai duhhrilnak liolio in mibur cangvaihnak khalah telve, tuanve, thawhve cio a thupi in a tul hrimhrim asi. Cutin senpi vangtlang thatnak hawl tlang tikah thahrum, tongkam cia, huat awknak, nautat namthlak awknak, tvp cu hmang lo lawng si loin do tlang, hrial tlang, in thiltha tuah tlang duhmi cu mi zocio khalin zalen zetin mai duhhril theinak cu hmangin tuan tlang, umtlang, sihcih pehtlaih pawlkom awk cio in a dingmi society asi.

(Visited 57 times, 1 visits today)

Comments

comments

Comments

%d bloggers like this: